Luk 5 - An Bibel Kernewek 20234 (Kernewek Kemmyn)

Galow an Kynsa Dyskyblon

¹ Y hwarva, pan esa an routh ow kwaska warnodho dhe glewes ger Duw, yth esa ow sevel ryb lynn Gennesaret,

² hag ev a welas dew worhel ow sevel ryb an lynn; mes an byskadoryon galsa yn-mes anedha hag yth esons ow kolghi an roesow.

³ Ev eth a-bervedh yn onan a'n gorholyon, esa dhe Simon, ha govynn orto pellhe nebes dhiworth an lann. Ena ev a esedhas, ha dyski an routhow a-dhiworth an gorhel.

⁴ Ha pan astelas kewsel, yn-medh ev dhe Simon, ‘Pellha y'n downvor, ha tewlewgh agas roesow rag pyskessa.’

⁵ Ha Simon a worthybis ow leverel, ‘Mester, ni re lavuryas dres oll an nos heb kavoes travyth; mes herwydh dha er my a dewl an roesow.’

⁶ Ha wosa gul henna, i a geas niver meur a bysk, may tallathas aga roesow bos terrys.

⁷ Hag i a wrug sinys dh'aga heskowetha y'n gorhel arall a dhos dhe weres dhedha; ytho i a dheuth ha lenwel an dhew worhel, may tallethons sedhi.

⁸ Simon Peder pan y'n gwelas a goedhas orth dewlin Yesu ow leverel, ‘Diberth dhiworthiv, rag gour peghus ov, A Arloedh.’

⁹ Rag marth a'n jeva, ev ha peub esa ganso, a'n myns a bysk a gavsons,

¹⁰ ha keffrys Jamys ha Yowann, mebyon Zebede, o keskowetha dhe Simon. Ha Yesu a leveris dhe Simon, ‘Na borth own; alemma rag ty a vydh ow kachya tus.’

¹¹ Hag ow tri aga gorholyon dhe'n tir i a asas pup-tra ha'y holya.

Glanhe Klavorek

¹² Hag y hwarva, pan esa yn onan a'n trevow, awotta gour leun a lovryjyon. Ow kweles Yesu, ev a goedhas war y fas ha'y bysi ow leverel, ‘Arloedh, mar mynnydh ty a yll ow glanhe.’

¹³ Hag owth ystynn y leuv ev a'n tochyas ow leverel, ‘My a vynn, bydh glanhes.’ Hag a-dhesempis an lovryjyon a'n gasas.

¹⁴ Hag ev a worhemmynnis dhodho, na lavarra dhe dhenvyth; ‘Mes ke dhe omdhiskwedhes dha honan dhe'n oferyas, ha gwra offrynn rag dha lanheans kepar dell worhemmynnis Moyses, yn dustuni dhedha.’

¹⁵ Mes yth esa an son anodho ow mos a-dro moy ha moy, ha routhow bras a dho war-barth rag y glewes, ha may fens yaghhes dhiworth aga klevesow.

¹⁶ Mes ev a vedha owth omdenna dhe dylleryow ynyal, ha pysi.

Yaghheans Den Palsyes

¹⁷ Hag y hwarva yn onan a'n dydhyow na, hag ev ow tyski, yth esa Fariseow ha dyskadoryon an lagha a'ga esedh ena, devedhys a bub tre a Alile, hag a Yudi, hag a Yerusalem; hag yth esa galloes an Arloedh ganso dhe yaghhe.

¹⁸ Hag awotta, gwer ow toen den war ravath, neb o palsyes, hag i a hwila y dhri a-ji ha'y worra a-ragdho.

¹⁹ Ha rag na gavsons fordh dh'y dhri a-ji drefenn an routh, i a yskynnas dhe benn an chi ha'y iselhe der an prileghennow gans an gravath y'n kres a-dherag Yesu.

²⁰ Hag ow kweles aga fydh ev a leveris, ‘Den, dha beghosow yw gevys dhis.’

²¹ Ha'n skribys ha'n Fariseow a dhallathas resna, ow leverel, ‘Piw yw hemma, ow kewsel blasfemiow? Piw a yll gava peghosow saw unnsel Duw?’

²² Mes Yesu owth aswonn aga frederow a worthybis ha leverel dhedha, ‘Pandr'a resnowgh yn agas kolonn?

²³ Pyneyl yw esya, leverel “Bedhes dha beghosow gevys”, po leverel “Sav ha kerdh”?

²⁴ Mes may hwodhvowgh bos galloes dhe Vab an den war an nor dhe ava peghosow’ (ev a leveris dhe'n palsi) ‘my a lever dhis, sav, drehav dha ravath ha ke dhe'th tre.’

²⁵ Ha hware ev a sevis a-ragdha, ha drehevel an dra re bia ow krowedha warnodho, ha mos dh'y dre, ow kormel Duw.

²⁶ Ha pubonan a's teva marth, hag yth esons ow kormel Duw ha lenwys a own vons i, ow leverel, ‘Ni re welas marthusyon hedhyw.’

Galow Levi

²⁷ Ha wosa hemma ev eth yn-kerdh ha gweles toller, Levi y hanow, esedhys orth an dollva, hag ev a leveris dhodho, ‘Hol vy.’

²⁸ Hag ev a asas pup-tra, hag a sevis yn-bann ha'y holya.

²⁹ Ha Levi a wrug kevewi bras ragdho yn y ji, hag yth esa routh veur a dolloryon hag erell esedhys orth an voes gansa.

³⁰ Ha'n Fariseow ha'ga skribys a grodhvola war y dhyskyblon ow leverel, ‘Prag y tebrowgh hag eva gans tolloryon ha peghadoryon?’

³¹ Ha Yesu a worthybis ow leverel dhedha, ‘Nyns eus edhomm a vedhek dhe dus yagh, saw dhe glevyon;

³² ny dheuvev dhe elwel re wiryon saw peghadoryon dhe edrek.’

An Govynn a-dro dhe Benys

³³ I a leveris dhodho, ‘Dyskyblon Yowann menowgh a wra penys owth hepkorr dybri, hag ow kul pysadow, ha keffrys dyskyblon an Fariseow, mes dha dhyskyblon jy a dheber hag eva.’

³⁴ Yesu a leveris dhedha, ‘A yllowgh gul dhe gowetha an gour pries gul penys ha'n gour pries hwath gansa?

³⁵ An dydhyow a dheu, pan vydh an gour pries kemmerys dhiworta, hag ena i a wra penys y'n dydhyow na.’

³⁶ Hag ynwedh ev a leveris parabolenn dhedha: ‘Denvyth ny skward klout dhiworth pows nowydh ha'y wrias war bows koth, poken ev a skward an bows nowydh, ha ny akord klout an bows nowydh gans an bows koth.

³⁷ Ha ny worr denvyth gwin nowydh yn gwingreghyn koth; poken an gwin nowydh a derr an kreghyn hag a vydh skoellys, ha'n kreghyn a vydh distruys;

³⁸ mes gwin nowydh yw gorrys yn kreghyn nowydh.

³⁹ Ha ny vynn denvyth a yv gwin koth eva gwin nowydh; rag hware ev a lever, “Gwell yw an gwin koth.” ’