Luk 4 - An Bibel Kernewek 20234 (Kernewek Kemmyn)

Temptyans Yesu

¹ Ha Yesu, leun a'n Spyrys Sans, a dhehwelis dhiworth an Yordan hag yth esa hembrenkys a-dro gans an Spyrys y'n gwylvos

² dew-ugens dydh, temptys gans an jowl. Ha ny dhybris travyth y'n dydhyow na, ha wosa i dhe worfenna, nown a'n jeva.

³ Ha'n jowl a leveris dhodho, ‘Mars osta Mab Duw, argh dhe'n men ma bos bara.’

⁴ Ha Yesu a worthybis dhodho, ‘Skrifys yw, “Mab-den ny wra bewa unnsel orth bara.” ’

⁵ Ena ev a'n hembronkas yn-bann ha diskwedhes dhodho oll gwlaskordhow an bys yn unn pols,

⁶ ha'n jowl a leveris dhodho, ‘My a re dhis oll an galloes ma ha'ga splannder, rag y feu kemmynnys dhymm, ha my a'n re dhe biwpynag a vynnav;

⁷ ytho mar kwre'ta plegya a-dheragov, oll an re ma a vydh dhis.’

⁸ Ha Yesu a worthybis ow leverel dhodho, ‘Skrifys yw, Ty a wra gordhya an Arloedh dha Dhuw hag ev yn unnsel ty a wra servya.’

⁹ Ena ev a'n hembronkas dhe Yerusalem ha'y worra war bynakyl an tempel ha leverel dhodho, ‘Mars osta Mab Duw, omdowl dha honan alemma dhe'n leur;

¹⁰ rag skrifys yw, “Ev a worhemmynn dh'y eledh y'th kever may hwrellens i dha witha”,

¹¹ hag arta, “Yn aga diwleuv i a'th teg, ma na dheghessi dha droes erbynn men.” ’

¹² Ha Yesu a worthybis ha leverel dhodho, ‘Leverys yw, “Ny goedh dhis temptya an Arloedh dha Dhuw.” ’

¹³ Ha wosa gorfenna pub temptasyon an jowl a omdennas dhiworto, ow kortos termyn gwiw.

Dalleth an Menystri yn Galile

¹⁴ Ena Yesu a dhehwelis yn nerth an Spyrys dhe Alile, ha son anodho eth yn-mes der oll an rannvro a-derdro.

¹⁵ Hag ev a dhyski yn aga synagys, enorys gans pub den oll.

Yesu Skonys yn Nazareth

¹⁶ Ena ev a dheuth dhe Nazareth, may fia megys, hag ev eth y'n synaga war-lergh y usadow yn dydh sabot, ha sevel dhe lenna.

¹⁷ Hag y feu res dhodho lyver an profoes Ysay, ha wosa dirolya an lyver ev a gavas an tyller mayth o skrifys,

¹⁸ ‘Yma Spyrys an Arloedh warnav vy, rag ev re'm untyas dhe dhri nowodhow da dhe'n voghosogyon; ev re'm dannvonas dhe bregoth livreson dhe'n gethyon, ha restorita gweles dhe'n dhellyon, dhe dhannvon dhe-ves yn rydh an re arweskys,

¹⁹ dhe bregoth blydhen gemmeradow an Arloedh.’

²⁰ Ena ev a rolyas an lyver, ha'y dhaskorr dhe'n servont, hag esedha; hag yth esa dewlagas peub y'n synaga stag warnodho.

²¹ Hag ev a dhallathas leverel dhedha, ‘Hedhyw an skryptor ma yw kollenwys yn agas diwskovarn.’

²² Hag yth esens i oll ow tustunia a-dro dhodho, ha marth a's tevo a'n geryow a ras a dheuth a'y anow, hag yn-medhons, ‘A nyns yw hemma mab Yosep?’

²³ Hag ev a leveris dhedha, ‘Sur, hwi a lever dhymm an lavar ma, “Medhek, omyaghha dha honan! Gwra omma y'th vro dha honan an taklow gwrys yn Kapernaum, dell glewsyn.” ’

²⁴ Mes ev a leveris, ‘Yn hwir y lavarav dhywgh, nyns eus profoes vydh kemmeradow yn y vro y honan.

²⁵ Mes dhe wir my a lever dhywgh, yth esa lies gwedhwes yn dydhyow Elias yn Ysrael, pan veu an nev kes teyr blydhen ha hwegh mis, may feu divoetter meur war oll an tir.

²⁶ Mes ny veu dhe nagonan anedha i may feu Elias dannvenys dhodho, mes dhe Sarepta yn Sidon, dhe venyn o gwedhwes.

²⁷ Hag yth esa lies klavorek yn Ysrael yn termyn Elisha an profoes, mes ny veu nagonan anedha gwrys yagh marnas Naaman an Syriek.’

²⁸ Hag oll an dus y'n synaga a veu lenwys a sorr, ow klewes an taklow ma,

²⁹ hag i a sevis yn-bann ha'y jasya yn-mes a'n sita, ha'y worra bys yn tal an vre may feu aga sita drehevys, rag ma'n deghessens yn-nans;

³⁰ mes ev, ow tremena der aga mysk, eth yn-kerdh.

An Den hag Ynno Spyrys Avlan

³¹ Ena ev a dhiyskynnas dhe Kapernaum, sita yn Galile, hag yth esa orth aga dyski y'n sabot;

³² ha marth a's teva a'y dhyskas, rag bos y gows gans awtorita.

³³ Hag yth esa y'n synaga den ha dhodho spyrys a dhyowl avlan, hag ev a grias gans lev ughel,

³⁴ ‘Ha! Pandr'a vynnydh tejy genen ni, Yesu a Nazareth? Osta devedhys rag agan diswul ni? My a'th aswonn, piw os, an Sans a Dhuw.’

³⁵ Mes Yesu a'n keredhis ow leverel, ‘Taw, ha deus yn-mes anodho!’ Ha wosa an jowl dh'y dewlel dhe'n dor yn aga mysk, ev eth yn-mes anodho, heb y bystiga vytholl.

³⁶ Ha marth a's tevo i oll, hag yn-medhons an eyl dh'y gila, ‘Pyth yw an ger ma? Rag gans awtorita ha galloes ev a ergh dhe'n spyrysyon avlan, hag i a dheu yn-mes.’

³⁷ Hag yth esa son anodho ow lesa dres pub tyller y'n pow a-dro.

³⁸ Ena ev a sevis ha gasa an synaga, ha dos yn chi Simon. Hweger Simon o grevys gans fevyr meur, hag i a wovynnas orto a-dro dhedhi.

³⁹ Ytho, ev a sevis a-ughti ha keski an fevyr hag ev a's gasas; ha hware hi a sevis ha'ga servya.

⁴⁰ Lemmyn pan veu an howl ow sedhi, oll myns a'n jeva tus klav gans divers klevesow a's dros dhodho; hag ev a worras y dhiwleuv war bubonan anedha ha'ga yaghhe.

⁴¹ Ha dywolow ynwedh a dho yn-mes a lies, ow kria ha leverel, ‘Ty yw Mab Duw.’ Mes ev a's keredhis, ha ny asas dhedha kewsel, rag yth aswonnsons ev dhe vos an Krist.

⁴² Pan veu dydh devedhys ev eth dhe-ves hag omdenna dhe dyller ynyal; ha'n routhow a'n hwila hag a dheuth dhodho, ha'y lesta ma na dhibartha dhiworta.

⁴³ Mes ev a leveris dhedha, ‘Res yw dhymm pregoth gwlaskor Duw dhe'n sitys erell, drefenn rakhenna y feuv dannvenys.’

⁴⁴ Hag yth esa ow pregoth yn synagys Yudi.