Luk 3 - An Bibel Kernewek 20234 (Kernewek Kemmyn)

Pregoth Yowann Besydhyer

¹ Y'n pymthegves blydhen a reyn Tiberius Sesar, pan veu Pontius Pilat governour Yudi, ha Herod tetrargh Galile, ha'y vroder Felip tetrargh Iturea ha rannvro Traghonitis, ha Lysanias tetrargh Abilene,

² pan veu Annas ha Kayfas arghoferysi, ger Duw a dheuth dhe Yowann mab Zakaria y'n gwylvos.

³ Hag ev a dheuth yn oll an pow a-dro dhe'n Yordan, ow pregoth besydh edrek yn dehwelyans peghosow,

⁴ kepar dell yw skrifys yn lyver geryow Ysay an profoes, ‘Lev onan ow kria y'n gwylvos, “Pareusewgh fordh an Arloedh, gwrewgh kompes y hynsyow ev.

⁵ Pub nans a vydh lenwys ha pub menydh ha bre a vydh iselhes, an tylleryow kamm a vydh ewnhes ha'n tylleryow garow a vydh leven;

⁶ hag oll kig a wel selwyans Duw.” ’

⁷ Ytho ev a leveri dhe'n routhow a dheuth mes dhe vos besydhys ganso, ‘Askorr nadres! Piw a'gas gwarnyas dhe fia dhiworth an sorr a dheu?

⁸ Ytho, degewgh frut gwiw rag edrek ha na dhallethewgh leverel, “Ni a'gan beus Abraham dh'agan tas.” Rag my a lever dhywgh, Duw dhe alloes drehevel fleghes dhe Abraham dhiworth an meyn ma.

⁹ Ha lemmyn ynwedh yma an voel gorrys orth gwreydhenn an gwydh; ytho pub gwydhenn na dheg frut da yw treghys dhe'n dor ha tewlys yn tan.’

¹⁰ Ha'n routhow a wovynni orto, ‘Ytho pandr'a goedh dhyn ni dhe wul?’

¹¹ Ev a worthybis ow leverel dhedha, ‘Neb a'n jeffo dew bows, kevrennes gans neb na'n jeves nagonan, ha neb a'n jeffo boes, gwres y'n keth vaner.’

¹² Ynwedh tolloryon a dheuth dhe vos besydhys ha leverel dhodho, ‘Mester, pandr'a wren?’

¹³ Hag ev a leveris dhedha, ‘Na guntellewgh moy es dell yw ordenys dhywgh.’

¹⁴ Ha soudoryon ynwedh a wovynni orto ow leverel, ‘Ha ni, pandr'a wren ni?’ Hag ev a leveris dhedha, ‘Na ledrewgh dre wodros dhiworth denvyth, ha na guhudhewgh yn fals, ha bedhewgh kontentys gans agas arveth.’

¹⁵ Rag bos dhe'n dus gwaytyans meur, hag i oll owth omwovynn yn aga holonn a-dro dhe Yowann, mar pe ev an Krist,

¹⁶ Yowann a worthybis, ow leverel dhedha i oll, ‘My dhe wir a'gas besydh gans dowr; mes nebonan yw kreffa agesov vy a dheu, ma nag ov vy gwiw dhe dhigelmi kroen y eskisyow. Ev a'gas besydh y'n Spyrys Sans ha tan.

¹⁷ Yma y wynsell yn y dhorn, hag ev a burj y leur-drushya, ha kuntell an ys yn y skiber, mes an kulyn ev a lesk gans tan na yllir y dhifeudhi.’

¹⁸ Ynwedh gans lies ynnians arall ev a bregowtha dhe'n bobel.

¹⁹ Mes Herod an tetrargh, keredhys ganso a-dro dhe Herodias, gwreg y vroder Felip, ha rag oll an drogoberow a wrug Herod,

²⁰ a geworras hemma ynwedh dhe bup-tra arall, hag a geas Yowann yn prison.

Besydh Yesu

²¹ Ytho wosa oll an bobel dhe vos besydhys, ha wosa Yesu ynwedh dhe vos besydhys, hag ev ow pysi, an nev a veu igerys,

²² ha'n Spyrys Sans a dheuth yn-nans warnodho yn furv gorfek, kepar ha kolomm, ha lev a dheuth a nev, ‘Ty yw ow Mab karadow; ynnos yma ow delit.’

Aghskrif Yesu

²³ Ha Yesu o neb deg bloedh warn ugens pan dhallathas y venystrans, hag ev mab (dell o tybys) dhe Yosep, mab Heli,

²⁴ mab Matthat, mab Levi, mab Melki, mab Yannay, mab Yosep,

²⁵ mab Mattathias, mab Amos, mab Nahum, mab Esli, mab Naggay,

²⁶ mab Maath, mab Mattathias, mab Semein, mab Yosegh, mab Yoda,

²⁷ mab Yoanan, mab Rhesa, mab Zerubbabel, mab Shealtiel, mab Neri,

²⁸ mab Melki, mab Addi, mab Kosam, mab Elmadam, mab Er,

²⁹ mab Yoshua, mab Eliezer, mab Yorim, mab Matthat, mab Levi,

³⁰ mab Simeon, mab Yuda, mab Yosep, mab Yonam, mab Elyakim,

³¹ mab Melea, mab Menna, mab Mattatha, mab Nathan, mab Davydh,

³² mab Yesse, mab Obed, mab Boaz, mab Salmon, mab Nahshon,

³³ mab Amminadab, mab Admin, mab Arni, mab Hesron, mab Peres, mab Yuda,

³⁴ mab Yakob, mab Ysak, mab Abraham, mab Teragh, mab Nahor,

³⁵ mab Serug, mab Rew, mab Peleg, mab Eber, mab Shela,

³⁶ mab Kaynan, mab Arfaksad, mab Shem, mab Noy, mab Lamek,

³⁷ mab Methusela, mab Enok, mab Yared, mab Mahalalel, mab Kaynan,

³⁸ mab Enosh, mab Seth, mab Adam, mab Duw.