Luk 23 - An Bibel Kernewek 20234 (Kernewek Kemmyn)

Yesu Dres a-rag Pilat

¹ Ena an routh oll a sevis hag a'n dug a-rag Pilat.

² Hag i a dhallathas y guhudha, ow leverel, ‘Ni a gavas an den ma ow tomhwel agan kenedhel, hag ow tifenn trubyt dhe vos res dhe Sesar, hag ow leverel ev y honan dhe vos Krist, myghtern.’

³ Ha Pilat a wovynnas orto, ‘Ty yw myghtern an Yedhewon?’ Ev a leveris dhodho, ow korthybi, ‘Ty a'n lever.’

⁴ Ena yn-medh Pilat dhe'n bennoferysi ha'n routhow, ‘Ny gavav travyth kablus y'n den ma.’

⁵ Mes i a ynnias dhe greffa ow leverel, ‘Movya an bobel a wra ev, ow tyski dres oll Yudi, ow talleth dhiworth Galile bys omma.’

Yesu a-rag Herod

⁶ Pan glewas Pilat henna, ev a wovynnas, mar pe an den a Alile,

⁷ ha wosa dyski ev dhe vos dhiworth arloetteth Herod ev a'n dannvonas dhe Herod, neb esa y honan ynwedh yn Yerusalem y'n dydhyow na.

⁸ Pan welas Herod Yesu, pur lowen o, rag seuladhydh ev a vynna y weles, rag ev re glewsa anodho, ha govenek a'n jevo gweles neb tokyn gwrys ganso.

⁹ Ytho ev a wovynnas orto lies tra, mes ny worthybis ev travyth dhodho.

¹⁰ Ha'n bennoferysi ha'n skribys a sevi ena orth y guhudha yn fen.

¹¹ Ha Herod, gans y soudoryon a'n despityas ha'y skornya, ha wosa y gwetha yn dillas splann ev a'n dannvonas arta dhe Pilat.

¹² Ha Herod ha Pilat a dheuth ha bos kowetha y'n jydh na an eyl gans y gila; rag kyns i re bia eskerens.

Yesu Dampnys dhe'n Mernans

¹³ Ena Pilat a elwis war-barth an bennoferysi ha'n rewloryon ha'n bobel

¹⁴ ha leverel dhedha, ‘Hwi a dhros dhymm an den ma avel nebonan a gammled an bobel, ha mirewgh, my re'n apposyas yn agas golok, ha ny gavav fowt y'n den ma a-dro dhe'n kuhudhansow a dhresowgh er y bynn;

¹⁵ na ny gavas Herod na hwath, rag ev a'n dastannvonas dhyn; ha mirewgh, ny wrug ev travyth a dhervynn an mernans.

¹⁶ Rakhenna my a wra y gessydhya hag ena y dhelivra.’

¹⁷ Rag res o dhodho delivra unn den dhedha y'n goel.

¹⁸ Mes i a armas oll war-barth ow leverel, ‘Dhe-ves ganso! Delirv dhyn ni Barabbas.’

¹⁹ (Ev re bia tewlys yn prison drefenn neb rebellyans gwrys y'n sita, ha drefenn denladh.)

²⁰ Ytho Pilat a gewsis dhedha arta, ow mynnes delivra Yesu;

²¹ mes i a besyas garma, ‘Krowsy e, krowsy e!’

²² An tressa gweyth ev a leveris dhedha, ‘Pana dhrog a wrug an den ma? Ny gavav ynno ken dhe'n mernans; ytho my a wra y gessydhya hag ena y dhelivra.’

²³ Mes i a ynnias gans garmow ughel, ow kovynn may fe krowsys, ha'ga garmow a brevaylyas.

²⁴ Ha Pilat a vreusis, aga mynnas dhe vos grontys.

²⁵ Ytho ev a dhelivras an den a vynnens, neb re bia tewlys yn prison drefenn rebellyans ha denladh, hag ev a ros Yesu dhedha dhe wul aga bodh.

Krowsyans Yesu

²⁶ Hag i orth y dhoen dhe-ves, i a dhalghennas unn Simon, den a Kyrene, devedhys a'n pow; ha gorra an grows warnodho, dh'y doen war-lergh Yesu.

²⁷ Routh veur a'n bobel a'n siwya, hag a venynes owth omweskel hag ow kyni ragdho.

²⁸ Mes Yesu a dreylyas dhedha ha leverel, ‘Myrghes Yerusalem, na oelewgh warnav vy; mes oelewgh warnowgh agas honan ha rag agas fleghes,

²⁹ rag otta, an dydhyow a dheu pan leverons, “Gwynnvys an re anvap, ha'n torrow bythkweth na dhineythis, ha'n bronnow na vagas.”

³⁰ Ena i a dhalleth leverel dhe'n menydhyow, “Koedhewgh warnan ni!” ha dhe'n breow, “Kudhewgh ni!”

³¹ Rag mar kwrens hemma y'n prenn gwyrdh, pandr'a vydh gwrys y'n prenn sygh?’

³² Dew arall, drogoberoryon, o hembrenkys war-barth ganso dhe vos gorrys dhe'n mernans.

³³ Ha pan dheuthons dhe'n tyller henwys An Grogen, i a growsyas Yesu ena, ha'n dhrogoberoryon, an eyl a-dhyghow ha'y gila a-gledh.

³⁴ Ha Yesu a leveris, ‘A Das, gav dhedha, rag ny wodhons pandr'a wrons.’ Hag i a rannas y dhillas ow tewlel prenn.

³⁵ Ha'n bobel a sevis ena ow mires; an rewloryon ynwedh a skornya ganso, ow leverel, ‘Ev a sawyas erell, omsawys ev y honan mars yw an Krist a Dhuw, an Dewisys.’

³⁶ Ha'n soudoryon ynwedh a wrug ges anodho, ow tos ha profya dhodho aysel,

³⁷ hag ow leverel, ‘Mars osta myghtern an Yedhewon, omsaw dha honan.’

³⁸ Hag yth esa pennskrifa a-ughto, ‘Hemm yw Myghtern an Yedhewon.’

³⁹ Hag onan a'n dhrogoberoryon kregys ena a'n despityas ow leverel, ‘A nyns osta an Krist? Omsaw dha honan ha saw ni ynwedh!’

⁴⁰ Mes an arall a worthybis, hag a'n keredhis ow leverel, ‘A ny'th eus own a Dhuw, ha ty yn-dann an keth vreus?

⁴¹ Ha ni yn tevri gwirvreusys, rag ni re gavas agan gober gwiw rag an taklow a wrussyn; mes hemma ny wrug travyth kamm.’

⁴² Hag yn-medh ev, ‘Yesu, porth kov ahanav pan dheudh y'th wlaskor.’

⁴³ Hag yn-medh ev dhodho, ‘Yn hwir y lavarav dhis, hedhyw y fydhydh genev yn Paradhis.’

Mernans Yesu

⁴⁴ Ha lemmyn y feu a-dro dhe'n hweghves eur, hag yth esa tewlder dres oll an tir bys y'n nawves eur.

⁴⁵ An howl a dhifygyas, ha vayl an tempel a veu skwardys y'n kres.

⁴⁶ Ha Yesu a grias gans lev ughel ha leverel, ‘A Das, y'th tiwleuv y kemmynnav vy ow spyrys.’ Hag ow leverel hemma, ev a anellas y spyrys yn-mes.

⁴⁷ Mes an penn-kangour pan welas pup-tra a hwarva a ros glori dhe Dhuw ow leverel, ‘Yn hwir, den gwiryon o hemma.’

⁴⁸ Hag oll an routhow omguntellys dhe vires orth hemma, pan welsons an taklow a hwarva, a dhehwelis tre, ow kweskel aga bronn;

⁴⁹ mes oll y geskowetha, ha'n benynes a wrussa y holya dhiworth Galile, a sevi a-bell ha gweles an hwarvosow ma.

Ynkleudhyans Yesu

⁵⁰ Hag otta, yth esa gour henwys Yosep, esel a'n konsel, gour da ha gwiryon;

⁵¹ ny wrussa assentya dh'aga thowl na dh'aga gweythres. Yth esa a Arimathea, sita a'n Yedhewon, neb esa ow kortos gwlaskor Duw.

⁵² Ev eth dhe Pilat, ha govynn korf Yesu.

⁵³ Hag ev a'n dug yn-nans, ha'y vaylya yn lien, ha'y worra yn bedh treghys y'n garrek ma na via denvyth bythkweth ynkleudhys ynno.

⁵⁴ Hag yth o dydh an darbar, hag yth esa an sabot ow talleth.

⁵⁵ Ha'n benynes neb re dhothya dhiworth Galile ganso a siwyas, hag a welas an bedh ha fatell veu y gorf gorrys ynno,

⁵⁶ hag i a dhehwelis ha pareusi spisys hag unyentys. Hag i a bowesas y'n sabot herwydh an gorhemmynn.