Luk 2 - An Bibel Kernewek 20234 (Kernewek Kemmyn)

Dineythyans Yesu

¹ Hag y hwarva y'n dydhyow na, y feu ordenans dyllys dhiworth Sesar Awgustus, oll an bys dhe vos kovskrifys.

² An kovskrif ma, an kynsa, a hwarva pan veu Kwirinius governour Syria.

³ Hag yth esa pub huni ow mos dhe vos niverys, peub dh'y sita y honan.

⁴ Ha Yosep ynwedh eth yn-bann dhiworth Galile, yn-mes a'n sita Nazareth, dhe Yudi, dhe sita Davydh, Bethlehem y hanow, rag ev dhe vos a ji hag a linyeth Davydh,

⁵ dhe vos kovskrifys war-barth gans Maria, ambosys dhodho yn demmedhyans, ha hi gans flogh.

⁶ Pan esens ena, kowlwrys veu an dydhyow rag hi dhe dhineythi,

⁷ ha hi a dhineythis hy mab kynsa-genys, ha'y vaylya yn lystennow, ha'y worra a'y wrowedh yn presep, rag nag esa le ragdha y'n ostel.

An Vugeledh ha'n Eledh

⁸ Hag yth esa bugeledh y'n pow na, trigys y'n goenyow, ow koelyas dre nos dhe witha aga flokk.

⁹ Hag otta, el an Arloedh a sevis a-dheragdha, ha golewder an Arloedh a splannas a-dro dhedha, hag own bras a's teva.

¹⁰ Ha'n el a leveris dhedha, ‘Na berthewgh own, rag otta, my a dhre dhywgh nowodhow da a lowena veur hag a vydh rag oll an bobel,

¹¹ bos genys ragowgh hedhyw yn sita Davydh Selwyas, neb yw Krist an Arloedh.

¹² Ha hemm yw an tokyn dhywgh: hwi a gyv baban maylys yn lystennow hag a'y wrowedh yn presep.’

¹³ Ha distowgh yth esa gans an el routh veur a'n lu nevek ow kormel Duw, hag ow leverel,

¹⁴ ‘Gordhyans y'n ughelder dhe Dhuw hag y'n bys kres dhe dus y volonjedh da.’

¹⁵ Ena, wosa an eledh dhe dhiberth dhiworta bys yn nev, yth esa an vugeledh ow leverel an eyl dh'y gila, ‘Deun ni lemmyn dhe Bethlehem ha gweles an dra ma yw hwarvedhys, a wrug an Arloedh y dhiskwedhes dhyn.’

¹⁶ Hag i a dheuth yn unn fyski ha kavoes Maria ha Yosep, ha'n baban a'y wrowedh y'n presep.

¹⁷ Ha pan y'n gwelsons, i a dherivas an dra a veu leverys dhedha a-dro dhe'n flogh ma.

¹⁸ Ha myns a'n klewas a's teva marth a'n taklow derivys dhedha gans an vugeledh.

¹⁹ Mes yth esa Maria ow kwitha oll an taklow ma, owth ombrederi yn hy holonn.

²⁰ Ha'n vugeledh a dhehwelis, ow kordhya hag ow kormel Duw, a bup-tra a glewsens ha gweles, kepar dell veu leverys dhedha.

²¹ Ha pan esa eth dydh kowlwrys rag y drodreghi, ev a veu henwys Yesu, an hanow res gans an el kyns ev dhe vos konsevys y'n brys.

Yesu Presentys y'n Tempel

²² Ha pan veu kowlwrys dydhyow aga glanheans herwydh lagha Moyses, i a'n dros yn-bann dhe Yerusalem rag y brofya dhe'n Arloedh,

²³ (dell yw skrifys yn lagha an Arloedh, ‘Pub gorow a iger an brys a vydh gelwys sans dhe'n Arloedh’),

²⁴ ha dhe offrynna sakrifis war-lergh an pyth yw leverys yn lagha an Arloedh, ‘Kopel a durennow po diw golommenn yowynk.’

²⁵ Hag otta, yth esa den yn Yerusalem, Simeon y hanow, ha'n den ma o ewnhynsek ha len, ow kortos konfort Ysrael, hag yth esa an Spyrys Sans warnodho.

²⁶ Ha re bia diskwedhys dhodho gans an Spyrys Sans na vedha ow kweles ankow kyns ev dhe weles an Krist a'n Arloedh.

²⁷ Hag ev a dheuth der an Spyrys y'n tempel; ha'n gerens pan dhrosons an flogh Yesu a-ji rag gul ragdho war-lergh usadow an lagha,

²⁸ ev a'n kemmeras yn y dhiwvregh, ha benniga Duw ha leverel,

²⁹ ‘Lemmyn, ty a as dha was dhe omdenna, A Arloedh, herwydh dha er yn kres;

³⁰ rag ow dewlagas re welas dha selwyans,

³¹ a bareussys a-dherag an poblow oll,

³² golow rag diskwedhyans dhe'n Jentilys, ha glori dhe'th pobel Ysrael.’

³³ Ha'y das ha'y vamm a's tevo marth a'n lavarow o kewsys yn y gever.

³⁴ Ha Simeon a's bennigas ha leverel dhe Varia y vamm, ‘Otta, an flogh ma yw settys rag koedha ha sevel lies yn Ysrael, ha rag tokyn a vydh skonys

³⁵ – ha kledha a wan dha enev jy ynwedh – may fo diskwedhys prederow lies kolonn.’

³⁶ Hag yth esa profoeses, Anna, myrgh Fanuel, a loeth Asher. Hi o gyllys pell yn dydhyow pals, ha re vewsa gans gour seyth blydhen a-dhia hy gwyrghsys,

³⁷ ha hi gwedhwes bys peswar bloedh ha peswar-ugens, neb na dhiberthi dhiworth an tempel, ow servya Duw gans penys ha pysadow dydh ha nos.

³⁸ Ha hi a dheuth nes y'n pols na ha grassa dhe Dhuw, ha kewsel anodho dhe beub a worta daspren Yerusalem.

An Dehwelyans dhe Nazareth

³⁹ Ha wosa kowlwul pup-tra herwydh lagha an Arloedh, i a dhehwelis dhe Alile, dh'aga sita aga honan Nazareth.

⁴⁰ Ha'n flogh a devi brassa ha kreffa, lenwys a furneth, hag yth esa gras Duw warnodho.

An Flogh Yesu y'n Tempel

⁴¹ Ha'y gerens e dhe Yerusalem pub blydhen dhe woel an pask.

⁴² Ha pan veu ev dewdhek bloedh, i eth yn-bann war-lergh usadow an goel;

⁴³ ha wosa kowlwul an dydhyow, hag i ow tehweles, an flogh Yesu a wortas yn Yerusalem, ha ny wodhya Yosep na'y vamm.

⁴⁴ Ow tybi y vos y'n kowethyans, wosa mos pellder unn jydh i a'n hwila yn mysk an neskerens ha'n gothmans,

⁴⁵ ha rag na'n kavsons, i a dhehwelis dhe Yerusalem, orth y hwilas.

⁴⁶ Ena wosa tri dydh, i a'n kavas y'n tempel, esedhys yn mysk an dhyskadoryon, ow koslowes orta hag ow kovynn orta;

⁴⁷ hag yth esa marth gans peub a'n klewo, a'y gonvedhes ha'y worthybow.

⁴⁸ Ha pan y'n gwelsons sowdhenys vons i, ha'y vamm a leveris dhodho, ‘Flogh, prag y'gan dyghtsys yndella? Otta, dha das ha my re beu orth dha hwilas yn ahwer.’

⁴⁹ Hag ev a leveris dhedha, ‘Prag y'm hwilewgh? A ny wodhvewgh bos res my dhe vos yn chi ow Thas?’

⁵⁰ Mes ny gonvedhsons an pyth a leveris dhedha.

⁵¹ Hag ev eth yn-nans gansa ha dos dhe Nazareth, hag ev o gostydh dhedha. Ha'y vamm a witha oll an lavarow ma yn hy holonn.

⁵² Ha Yesu a devi yn furneth ha blydhynyow, hag yn gras gans Duw ha tus.