Luk 19 - An Bibel Kernewek 20234 (Kernewek Kemmyn)

Yesu ha Zakkeus

¹ Hag ev a entras dhe Yeriko, ow tremena dredhi.

² Hag awotta gour, Zaggheus y hanow, neb o penn-toller, ha den rych;

³ yth esa ow hwilas gweles piw o Yesu, mes ny ylli drefenn an routh, rag den byghan o ev.

⁴ Ytho ev a boenyas yn-rag hag yskynna yn sykomorwydhenn rag y weles, rag ev dhe dremena an fordh na kyns nep-pell.

⁵ Pan dheuth dhe'n tyller, Yesu a viras war-vann Zakkar ha leverel dhodho, ‘Zakkeus, deus yn-nans uskis, rag hedhyw y tal dhymm godriga y'th chi.’

⁶ Ev a fistenas ha dos yn-nans, ha'y wolkomma gans lowena.

⁷ An dus oll, pan welsons hemma, a grodhvola ow leverel, ‘Ev res eth dhe godriga gans gour yw peghador.’

⁸ Mes Zakkeus a sevis ha leverel dhe'n Arloedh, ‘Otta, hanter ow fythow, Arloedh, my a re dhe'n voghosogyon, ha mar kwrugavy kemmeres neppyth a nebonan dre frows, my a'n daskorr pedergweyth.’

⁹ Hag yn-medh Yesu dhodho, ‘Hedhyw selwyans re dheuva dhe'n chi ma, rag an den ma ynwedh yw mab dhe Abraham.

¹⁰ Rag Mab an den a dheuth dhe hwilas ha dhe selwel an dra yw kellys.’

Parabolenn an Deg Peuns

¹¹ Hag i ow koslowes hemma, ev a dherivas parabolenn moy, rag ev dhe vos ogas dhe Yerusalem hag i a dybi gwlaskor Duw dhe omdhiskwedhes ena a-dhistowgh.

¹² Ytho yn-medh ev, ‘Unn ughelor eth dhe wlas bell, rag may tegemmerro an myghternsys dhodho y honan, hag ena dehweles.

¹³ Ev a elwis deg a'y gethwesyon ha ri dhedha deg mina ha leverel dhedha, “Kenwerthewgh gansa bys pan dhov.”

¹⁴ Mes y sojets a wre y gasa hag i a dhannvonas kannasow war y lergh ow leverel, “Ny vynnyn an den ma dhe vos myghtern warnan.”

¹⁵ Mes pan dhehwelis wosa degemmeres an myghternsys ev a erghis an gethwesyon na may rosa ev an mona dhedha, dhe vos gelwys dhodho, dhe dhyski pandr'a veu prow aga henwerth.

¹⁶ An kynsa a dheuth yn-rag ha leverel, “Arloedh, dha vina re wrug prow a dheg mina.”

¹⁷ Yn-medh ev dhodho, “Yn ta re wruss'ta, ow hethwas da! Rag ty dhe vos lel y'n mater pur vyghan ma, kemmer awtorita a-ugh deg trev.”

¹⁸ Ena an nessa a dheuth ha leverel, “Dha vina, Arloedh, re wrug pymp mina.”

¹⁹ Yn-medh ev dhodho ynwedh, “Ha ty, bydh a-ugh pymp trev.”

²⁰ Ena an arall a dheuth ha leverel, “Arloedh, otta dha vina; my a'n gwitha saw maylys yn lien,

²¹ rag own a'm bo ahanas, ty dhe vos den kales, ow kemmeres yn-bann an pyth na wrussys y worra yn-nans, hag ow mysi an pyth na wrussys y hasa.”

²² Yn-medh ev dhodho, “Dhiworth dha anow dha honan my a'th vreus, ty gethwas drog! Ty a wodhves ow bos den kales, ow kemmeres yn-bann an pyth na wrugavy y worra yn-nans, hag ow mysi an pyth na wrugavy y hasa.

²³ Prag na worrsys ow mona y'n arghantti? Ena, ha my devedhys, my a'n kavsa gans prow.”

²⁴ Ha dhe'n dus ow sevel ena yn-medh ev, “Kemmer dhiworto an mina ha'y ri dhe neb a'n jeves deg.”

²⁵ Mes yn-medhons dhodho, “Arloedh, yma dhodho deg mina seulabrys!”

²⁶ “My a lever dhywgh, dhe beub a bewvo, y fydh res, mes dhiworto ev neb na bewvo mann y fydh kemmerys ynwedh an pyth a bew.

²⁷ Mes ow eskerens na, neb na vynnsons my dhe vos myghtern warnedha: gwrewgh aga dri omma ha'ga ladha a-dheragov.” ’

Devedhyans Yesu dhe Yerusalem yn Trygh

²⁸ Wosa leverel hemma, ev eth yn-rag, ow mos yn-bann dhe Yerusalem.

²⁹ Ha pan dheuth nes dhe Bethfage ha Bethani, dhe'n vre henwys an menydh Oliv, ev a dhannvonas dew a'y dhyskyblon

³⁰ ow leverel, ‘Kewgh dhe'n dre a-dal dhywgh, hag ow mos ynni hwi a gyv ebel asen stegys, ma na wrug denvyth bythkweth esedha warnodho. Gwrewgh y dhigelmi ha'y dhri omma.

³¹ Ha mar kovynn nebonan orthowgh “Prag y'n digelmowgh?” gorthybewgh yndella, “Yma dhe'n Arloedh edhomm anodho.” ’

³² An re a veu dannvenys eth yn-kerdh, ha'y havoes poran dell lavarsa dhedha.

³³ Hag i ow tigelmi an ebel, y berghennogyon a leveris dhedha, ‘Prag y tigelmowgh an ebel?’

³⁴ I a worthybis, ‘Yma dhe'n Arloedh edhomm anodho.’

³⁵ Ytho i a'n dros dhe Yesu, ow tewlel aga mantelli war an ebel, ha gorra Yesu warnodho.

³⁶ Hag ev ow mos yn-rag, yth esens ow lesa aga mantelli war an fordh;

³⁷ ha pan dheuth nes dhe'n fordh war-nans a'n menydh Oliv, oll routh y dhyskyblon a dhallathas gormel Duw yn lowen gans lev ughel, rag oll an oberow galloesek a welsens,

³⁸ ow leverel, ‘Benniges yw an Myghtern a dheu yn hanow an Arloedh. Kres yn nev ha gordhyans y'n ughelder.’

³⁹ Ha re a'n Fariseow y'n routh a leveris dhodho, ‘Mester, keredh dha dhyskyblon.’

⁴⁰ Ev a worthybis, ow leverel, ‘My a lever dhywgh, mar tewons an re ma, an meyn a wra leva!’

⁴¹ Ha pan dheuth nes, ow kweles an sita, ev a oelas warnedhi,

⁴² ow leverel, ‘Mar kodhves, ty ynwedh, y'n jydh ma an taklow a led dhe gres! – mes lemmyn kudhys yns a'th tewlagas.

⁴³ Rag an dydhyow a dheu warnas, pan dhrehav dha eskerens tommenn er dha bynn hag i a omsett a-dro dhis ha'th stroetha a bub tu;

⁴⁴ i a'th terr dhe'n dor, ha'th fleghes ynnos, ha ny asons men war ven ynnos, rag ny aswonnsys termyn dha visitasyon.’

Glanhe an Tempel

⁴⁵ Hag ow mos y'n tempel, ev a dhallathas tewlel yn-mes an re esa ow kwertha;

⁴⁶ ow leverel dhedha, ‘Skrifys yw, “Ow chi a vydh chi a bysadow”, mes hwi re'n gwrug fow a ladron.’

⁴⁷ Ha pub dydh yth esa ow tyski y'n tempel. Mes an bennoferysi ha'n skribys ha pennow an bobel a hwila y dhistrui,

⁴⁸ mes ny gavsons fordh dhe wul travyth, rag pub den oll a gregi war y eryow, ow koslowes.