Luk 16 - An Bibel Kernewek 20234 (Kernewek Kemmyn)

Parabolenn an Rennyas Dislel

¹ Hag ev a leveris ynwedh dh'y dhyskyblon, ‘Yth esa dhe dhen rych rennyas, neb a veu kuhudhys orto a skoellya y bythow.

² Hag ev a'n gelwis ha leverel dhodho, “Pyth yw hemma a glewav a-dro dhis? Ro akont a'th charj, rag ny yllydh bos rennyas namoy.”

³ Ena an rennyas a leveris dhodho y honan, “Pandr'a wrav, ha'm mester ow kemmeres dhiworthiv ow soedh avel rennyas? Nyns eus genev an galloes dhe balas, meth a'm beus a veggya.

⁴ My a woer pandr'a wrav pan viv gordhyllys a'm soedh, rag ma'm degemmerrons yn aga chiow.”

⁵ Ytho ev a elwis dhodho kendonoryon y vester onan hag onan, ha leverel dhe'n kynsa, “A bygemmys osta yn kendon dhe'm mester?”

⁶ Yn-medh ev, “Kans musur a olew.” Hag ev a leveris dhodho, “Tann dha reken, esedh dison ha skrif hanter-kans.”

⁷ Ena dhe arall y leveris, “A bygemmys osta yn kendon?” Yn-medh ev, “Kans musur ys.” Yn-medh ev dhodho, “Tann dha reken ha skrif peswar-ugens.”

⁸ Ha'n mester a gommendyas an rennyas dislel, rag ev dhe wul yn fur. Rag mebyon an bys ma yw moy doeth a-dro dh'aga hevoesogyon es dell yw mebyon an golow.

⁹ Ha my a lever dhywgh, gwrewgh kowetha dhywgh agas honan a'n mammon a anwiryonedh, rag may fowgh wolkommys, pan fyll ev, bys yn annedhow heb diwedh.

¹⁰ ‘Neb yw lel yn tra pur vyghan yw lel ynwedh yn tra veur, ha neb yw dislel yn tra pur vyghan yw dislel ynwedh yn tra veur.

¹¹ Ytho mar ny vewgh lel y'n mammon anewn, piw a re gwir rychys yn agas charj?

¹² Ha mar nyns owgh hwi lel yn pythow den arall, piw a vynn ri dhywgh dha bythow dha honan?

¹³ Ny yll servont servya dew vester; rag poken ev a gas an eyl ha kara y gila, po ev a omre dhe'n eyl ha dispresya y gila. Ny yllowgh servya Duw ha mammon.’

An Lagha ha Gwlaskor Duw

¹⁴ Ha'n Fariseow, karoryon mona, a glewo oll an taklow ma ha skornya ganso.

¹⁵ Hag ev a leveris dhedha, ‘Hwi yw an re a justifi aga honan a-wel tus, mes Duw a aswonn agas kolonn; rag an dra eksaltys yn mysk tus yw pyth kasadow a-wel Duw.

¹⁶ ‘Yth esa an lagha ha'n brofoesi bys Yowann: alena rag, gwlaskor Duw yw pregewthys, ha peub a omherdh ynni dre nerth.

¹⁷ Esya yw, nev ha nor dhe dremena dhe-ves, es dell goettho dhe-ves unn banna a'n lagha.

¹⁸ ‘Piwpynag a worro y wreg dhe-ves ha demmedhi arall a wra avoutri, ha neb a dhemmedh benyn gorrys dhe-ves gans hy gour a wra avoutri.

An Den Rych ha Lazarus

¹⁹ ‘Yth esa den rych, neb a omwiska yn purpur ha sendal, ow kevewya yn splann pub dydh oll.

²⁰ Hag yth esa unn den boghosek, Lazarus y hanow, neb re bia gorrys orth y yet, podrek,

²¹ hag ev hwansek dhe dhybri y walgh a'n brewyon a goedha a voes an den rych. Mes yth esa an keun ynwedh ow tos ha lapya y woliow.

²² Ena an den boghosek a verwis hag a veu degys dhe-ves gans an eledh bys yn askra Abraham. An den rych ynwedh a verwis hag a veu ynkleudhys;

²³ hag yn ifarn, hag ev yn tormentys, ev a dhrehevis y dhewlagas, ha gweles Abraham y'n pellder, ha Lazarus yn y askra.

²⁴ Hag ev a elwis ha leverel, “A Das Abraham, kemmer truedh ahanav ha dannvon Lazarus rag may trogghyo bleyn y vys yn dowr ha yeynhe ow thaves, rag tormentys ov y'n flamm ma.”

²⁵ Mes Abraham a leveris, “Flogh, porth kov ty dhe dhegemmeres dha bythow da y'th vewnans, ha Lazarus y'n keth vaner an droktaklow; mes lemmyn konfortys yw ev, mes ty yw tormentys.

²⁶ Ha moy es hemma oll, yma settys islonk meur yntra ni ha hwi, rag na allo tremena a-dreus alemma dhywgh hwi neb a vynno, na treusi alena dhyn ni.”

²⁷ Mes ev a leveris, “Ytho my a'th pys, A das, y dhannvon dhe ji ow thas,

²⁸ rag yma dhymm pymp broder, dh'aga gwarnya, ma na dheffons i ynwedh bys y'n tyller ma a dorment.”

²⁹ Abraham a leveris, “Yma dhedha Moyses ha'n brofoesi; gwrens i goslowes orta i.”

³⁰ Ev a leveris, “Na, A das Abraham, mes mar teu dhedha nebonan dhiworth an re varow, y fydh edrek dhedha.”

³¹ Ev a leveris dhodho, “Mar ny woslowons orth Moyses ha'n brofoesi, namoy ny grysons mar sev nebonan dhiworth an re varow.” ’