Luk 15 - An Bibel Kernewek 20234 (Kernewek Kemmyn)

Parabolenn an Dhavas Kellys

¹ Yth esa oll an dolloryon ha'n beghadoryon ow tos nes dhodho rag goslowes orto.

² Mes an Fariseow ha'n skribys a grodhvola, ow leverel, ‘An den ma a wolkomm peghadoryon hag a dheber gansa.’

³ Ytho ev a gewsis dhedha an barabolenn ma, ow leverel,

⁴ ‘Py den eus ahanowgh, ha dhodho kans davas, ow kelli onan anedha, na as an nownsek ha peswar-ugens y'n gwylvos ha mos war-lergh an dhavas kellys erna's kaffo?

⁵ Ha pan y's kyv, ev a's gorr war y dhiwskoedh gans lowena,

⁶ ha wosa dos tre ev a elow y gowetha ha'y gentrevogyon war-barth ha leverel dhedha, “Bedhewgh lowen genev, rag my re gavas ow davas o kellys.”

⁷ My a lever dhywgh, yndella y fydh lowena yn nev rag unn peghador ha dhodho edrek, moy es dell vydh rag nownsek den gwiryon ha peswar-ugens nag eus dhedha edhomm a edrega.

Parabolenn an Bath Kellys

⁸ ‘Po py benyn eus, ha gensi deg draghma, mar kyll onan anedha, na enow lugarn ha skuba an chi, ha hwilas dour erna'n kaffo?

⁹ Ha pan y'n kyv, hi a elow hy howethesow ha'y hentrevogyon war-barth ow leverel, “Bedhewgh lowen genev, rag my re gavas an draghma a gellis vy.”

¹⁰ Yndella, yn-medhav dhywgh, y fydh lowena a-rag eledh Duw rag unn peghador ha dhodho edrek.’

Parabolenn an Mab Kellys

¹¹ Ena ev a leveris, ‘Yth esa den ha dhodho dew vab,

¹² ha'n yowynka anedha a leveris dh'y das, “Tas, ro dhymm an rann a'n pythow a goedh dhymm.” Hag ev a rannas yntredha an pygans.

¹³ Ha nebes dydhyow a-wosa, an mab yowynka a guntellas pup-tra war-barth ha mos yn hyns bys yn bro bell, hag ena ev a skoellyas y substans, ow pewa lows.

¹⁴ Pan wrussa spena pup-tra, divoetter bras a sevis y'n vro na, hag ev a dhallathas bos yn esow.

¹⁵ Ytho ev eth hag junya y honan rag arveth gans onan a'n vurjysi a'n vrfo na, hag ev a'n dannvonas dh'y welyow dhe beski an mogh,

¹⁶ hag ewl a'n jevo a dhybri y walgh a'n plisk-karob a wre an mogh aga dybri, mes denvyth ny's ros dhodho.

¹⁷ Ow tos arta dh'y skians, ev a leveris, “Py lies goberwas a'm tas a's teves aga gwalgh a vara, mes my a verow omma gans nown!

¹⁸ My a sav yn-bann ha mos dhe'm tas ha leverel dhodho, ‘A das, my re beghas erbynn nev hag a-dheragos;

¹⁹ nyns ov vy gwiw na fella dhe vos gelwys dha vab; gwra ow dyghtya kepar hag onan a'th woberwesyon.’ ”

²⁰ Ytho ev a sevis yn-bann ha mos dh'y das. Hag ev hwath y'n pellder, y das a'n gwelas, ha piteth a'n jeva, hag ev a boenyas hag a goedhas war y gonna hag amma dhodho.

²¹ Y vab a leveris dhodho, “A Das, my re beghas erbynn nev hag a-dheragos; nyns ov wordhi na fella dhe vos gelwys dha vab.”

²² Mes y das a erghis dh'y gethwesyon, “Drewgh uskis an gwella pows ha'y gorra warnodho, ha rewgh bysow war y leuv hag eskisyow war y dreys.

²³ Ha drewgh an leugh peskys ha'y ladha, ha gwren ni dybri ha bos lowen,

²⁴ rag ow mab ma o marow ha re vewas arta; kellys o, ha trovys yw.” Hag i a dhallathas goelya.

²⁵ ‘Mes yth esa y vab kottha y'n gwel, ha pan dhehwelis, ow tos nes dhe'n chi, ev a glewas menestrouthi ha karoli,

²⁶ hag ev a elwis onan a'n wesyon ha govynn pyth o henna.

²⁷ Ha'n gwas a leveris dhodho, “Dha vroder re dheuth, ha'th tas re ladhas an leugh peskys, rag ev dh'y dhegemmeres yagh ha saw.”

²⁸ Mes ev a sorras, ha skonyas a vos a-ji; ytho y das a dheuth yn-mes ha'y bysi.

²⁹ Hag ev a worthybis dh'y das ha leverel, “Mir, py lies blydhen y hwrugavy dha servya, ha ny derris dha arghadow bythkweth; ha bythkweth ny resys dhymm kemmys ha mynnik rag may fen lowen gans ow howetha.

³⁰ Mes pan dheuth dha vab ma, neb re gollonkas dha vewnans gans horys, ty a ladhas ragdho an leugh peskys.”

³¹ Hag ev a leveris dhodho, “Ow mab, yth es'ta genev pub eur oll, hag oll ow fythow yw dhis.

³² Mes lemmyn res yw ni dhe vos lowen ha heudhik; rag dha vroder ma a veu marow ha re vewas arta; kellys o, ha trovys yw.” ’