Luk 11 - An Bibel Kernewek 20234 (Kernewek Kemmyn)

Dyskas a-dro dhe Bysadow

¹ Hag y hwarva ev dhe vos ow pysi yn neb tyller, ha pan hedhis, onan a'y dhyskyblon a leveris dhodho, ‘Arloedh, dysk dhyn pysi, kepar dell dhyskas Yowann y dhyskyblon ev.’

² Hag ev a leveris dhedha, ‘Pan wrewgh pysi, leverewgh, A Das, sanshes re bo dha hanow; re dheffo dha wlaskor;

³ ro dhyn ni hedhyw agan bara pub-dydhyek;

⁴ ha gav dhyn agan peghosow, rag ni ynwedh a av dhe beub yw kendoner dhyn ni; ha na wra agan dri yn temptasyon.’

⁵ Hag ev a leveris dhedha, ‘Piw ahanowgh a'n jevydh koweth ha mos dhodho yn hanter-nos ha leverel dhodho, “Koweth, prest dhymm teyr thorth-vara;

⁶ rag ow howeth re dheuth dhymm a vyaj ha nyns eus genev travyth dhe settya a-ragdho.”

⁷ Hag ow korthybi a'n tu a-bervedh yn-medh ev, “Na wra ow throbla; an daras yw deges, hag yma ow fleghes genev y'n gweli; ny allav sevel dhe ri dhis.”

⁸ My a lever dhywgh, kyn na vynn sevel ha ri dhodho drefenn y vos y goweth, drefenn y donteth ev a sev ha ri dhodho pup-tra a'n jevydh edhomm anodho.

⁹ ‘Ha my a lever dhywgh, govynnewgh hag y fydh res dhywgh, hwilewgh ha hwi a gyv, knoukyewgh hag y fydh igerys dhywgh;

¹⁰ rag peub hag a wovynn a dhegemmer, ha neb a hwila a gyv, ha dhe neb a gnouk y fydh igerys.

¹¹ Py den ahanowgh, orto mar kovynn y vab pysk, a re dhodho sarf yn le an pysk?

¹² Po mar kovynn oy, a re dhodho skorpyon?

¹³ Hwi ytho, ow pos drog, mar kodhowgh ri rohow da dh'agas fleghes, pygemmys moy y re an Tas a nev an Spyrys Sans dhe seul a wovynn orto!’

Yesu ha Belzebul

¹⁴ Hag yth esa ev ow tewlel yn-mes dyowl neb o avlavar; ha pan dheuth an jowl yn-mes, an den avlavar a gewsis, ha marth a's teva an routhow.

¹⁵ Mes re anedha a leveris, ‘Dre Belzebul pryns an dhywolow y tewl ev an dhywolow mes.’

¹⁶ Re erell a'n previ ha govynn orto tokyn dhiworth nev.

¹⁷ Mes ev, ow kodhvos aga frederow, a leveris dhedha, ‘Pub ruvaneth rynnys er hy fynn hy honan yw difeythys; ha chi a goedh erbynn chi.

¹⁸ Mars yw Satnas ynwedh rynnys er y bynn y honan, fatell yll y ruvaneth sevel? – rag hwi a lever my dhe dewlel dywolow mes dre Belzebul.

¹⁹ Ha mar towlav vy an dhywolow yn-mes dre Belzebul, dre biw y's tewl agas mebyon hwi? Rakhenna i a vydh agas breusysi.

²⁰ Mes mars yw dre vys Duw y towlav dywolow mes, ytho gwlaskor Duw yw devedhys warnowgh.

²¹ Pan with den krev arvek y balys y honan, yma y bythow yn kres;

²² mes pan dheffo warnodho den kreffa agesso, ev a gemmer dhiworto y leun-arvwisk may trestyas ynni, ha ranna y breydh.

²³ Neb na vo genev, er ow fynn yma; ha neb na guntell genev, skoellya a wra.

Dehweles an Spyrys Avlan

²⁴ ‘Pan dheu spyrys avlan yn-mes a dhen, ev a dremen dre dylleryow sygh ow hwilas powesva ha ny's kyv. Ena yn-medh ev, “My a dhehwel dhe'm chi may teuth vy yn-mes anodho.”

²⁵ Ha pan yw devedhys, ev a'n kyv skubys ha tekhes.

²⁶ Ena yth a ha dri seyth spyrys arall gweth agesso y honan, hag i ow mones a-bervedh a drig ena; ha diwedh an den na yw gweth ages y dhalleth.’

Gwir Wynnvys

²⁷ Y hwarva, hag ev ow leverel hemma, unn venyn y'n routh dhe dhrehevel hy lev ha leverel dhodho, ‘Gwynnvys an dorr a'th tug ha'n dhiwvronn a'th vagas!’

²⁸ Mes ev a leveris, ‘Kyns, gwynnvys an re a glew ger Duw ha'y witha.’

Hwilas Tokyn

²⁹ Ha'n routhow owth ynkressya, ev a dhallathas kewsel, ‘An henedh ma yw drog henedh; ev a hwila tokyn, ha ny vydh tokyn res dhodho marnas tokyn Yona.

³⁰ Rag kepar dell veu Yona tokyn dhe dus Nineve, yndella y fydh Mab an den dhe'n henedh ma.

³¹ Myghternes an dhyghowbarth a sev y'n vreus gans gwer an henedh ma ha'ga dampnya; rag hi a dheuth dhiworth pennow an nor dhe glewes furneth Solomon, hag ottomma neppyth moy es Solomon.

³² Gwer Nineve a sev y'n vreus gans an henedh ma ha'y dhampnya; rag i a goedhas yn edrek drefenn pregoth Yona, hag ottomma neppyth moy es Yona.

Golow an Korf

³³ ‘Ny wra denvyth, wosa enowi lugarn, y worra yn tyller kudh po yn-dann vushel, mes war wolowbrenn, may hwrello an dus a dheu a-ji gweles an golow.

³⁴ Dha lagas yw lugarn an korf. Pan vo dha lagas yagh, dha gorf oll ynwedh yw golowys; mes pan vo anyagh, dha gorf ynwedh yw tewlhes.

³⁵ Gwayt ytho na vo an golow usi ynnos devedhys ha bos tewlder.

³⁶ Ytho mars yw oll dha gorf leun a wolow, heb bos rann anodho yn tewlder, y fydh leun a wolow kepar ha pan wra lugarn dha wolowi gans y splannder.’

Kuhudhans an Fariseow ha'n Laghysi

³⁷ Hag ev hwath ow kewsel, unn Farise a'n gelwis dhe dhybri ganso; hag ev eth hag esedha orth an voes.

³⁸ Ha'n Farise pan y'n gwelas, marth a'n jeva na omwolghsa kynsa, kyns dybri.

³⁹ Mes yn-medh an Arloedh dhodho, ‘Lemmyn hwi Fariseow a wolgh an tu a-ves a'n hanaf ha'n skudell, mes war-ji yth owgh leun a ladrans ha droktra.

⁴⁰ Hwi fellyon, a ny wrug gwrier an tu a-ves gul an tu a-ji ynwedh?

⁴¹ Mes rewgh alusen a'n pyth usi war-ji, hag otta pup-tra a vydh glan dhywgh.

⁴² ‘Mes go-hwi Fariseow! Rag hwi a dhegev menta ha ruta ha losow oll, heb gul vri a wirvreus ha kerensa Duw; y tal dhywgh gul an re ma, heb dispresya an re na.

⁴³ Go-hwi Fariseow, rag hwi a gar an penn-esedhow y'n synagys ha salusyansow y'n marghasow.

⁴⁴ Go-hwi, rag yth owgh hwi kepar ha bedhow nag yns merkys, ha'n dus a gerdh warnedha heb godhvos.’

⁴⁵ Onan a'n laghysi a worthybis ha leverel dhodho, ‘Mester, pan leverydh henna ty a'gan keredh ni maga ta.’

⁴⁶ Yn-medh ev, ‘Ha go-hwi ynwedh, hwi laghysi, rag hwi a vegh tus gans beghyow re boes dhe dhoen, ha hwi agas honan ny dochyowgh an beghyow gans onan vyth a'th vysies.

⁴⁷ Go-hwi, rag hwi a dhrehav meyn-kov an brofoesi, mes agas tasow a's ladhas.

⁴⁸ Ytho hwi yw testow, owth assentya dhe wriansow agas tasow; rag i a wrug aga ladha ha hwi a dhrehav aga meyn-kov.

⁴⁹ Rakhenna ynwedh furneth Duw a leveris, “My a dhannvon dhedha profoesi hag abesteli, hag i a ladh ha helghya re anedha”,

⁵⁰ rag may fo govynnys dhiworth an henedh ma goes skoellys oll an brofoesi a-dhia dhalleth an bys,

⁵¹ a-dhia woes Abel bys goes Zakaria neb a veu ledhys ynter an alter ha'n sentri; yn hwir y lavarav dhywgh, govynnys vydh a-dhiworth an henedh ma.

⁵² Go-hwi, laghysi, rag hwi re gemmeras dhe-ves an alhwedh a wodhvos; ny wrussowgh hwi entra, ha'n re a vynna entra hwi re lettyas.’

⁵³ Hag ev ow mos alena, an skribys ha'n Fariseow a dhallathas y arvedh yn fen ha'y apposya a-dro dhe lies tra,

⁵⁴ orth y gontrewaytya, rag kachya neppyth a'y anow.