Levitikus 9 - An Bibel Kernewek 20234 (Kernewek Kemmyn)

An Ethves Dydh wosa an Urdhyansow

¹ Ha'n ethves dydh, Moyses a elwis Aron ha'y vebyon ha henavogyon Ysrael.

² Hag ev a leveris dhe Aron, ‘Kemmer leugh yowynk rag offrynn pegh ha hordh rag offrynn leskys, heb namm aga dew, ha'ga offrynna dherag an Arloedh.

³ Ha ty a gews orth mebyon Ysrael, ow leverel, “Kemmer bogh rag offrynn pegh, ha leugh hag oen, unn bloedh aga oes ha heb namm, rag offrynn leskys.

⁴ Hag ynwedh ojyon ha hordh rag offrynnow kres dhe sakrifia dherag an Arloedh, hag offrynn greun kemmyskys gans oyl, rag hedhyw an Arloedh a omdhiskwedh dhywgh.” ’

⁵ Hag i a dhros an pyth a erghis Moyses dherag tylda an kuntelles hag oll an kuntelles a dheuth nes ha sevel dherag an Arloedh.

⁶ Hag yn-medh Moyses, ‘Hemm yw an pyth a erghis an Arloedh may hwrellewgh, ha glori an Arloedh a vydh owth omdhiskwedhes dhywgh.’

⁷ Hag yn-medh Moyses dhe Aron, ‘Ke bys y'n alter hag offrynn dha offrynn pegh, ha'th offrynn leskys ha gul dehwelyans a-barth dhis dha honan hag a-barth an bobel, ha gwra offrynn an bobel, ha gul dehwelyans ragdha, dell erghis an Arloedh.’

⁸ Ytho Aron a dheuth nes dhe'n alter ha ladha leugh an offrynn pegh o ragdho ev y honan.

⁹ Ha mebyon Aron a dhros an goes dhodho hag ev a droghyas y vys y'n goes ha'y worra war gern an alter ha dinewi an goes war woeles an alter.

¹⁰ Mes ev a loskas an blonek ha'n dhiwloneth ha stagell avi an offrynn pegh war an alter, dell erghis an Arloedh dhe Moyses.

¹¹ Hag ev a loskas an kig ha'n kneus yn-mes a'n kamp.

¹² Hag ev a ladhas an offrynn leskys; ha mebyon Aron a dhros dhodho an goes, hag ev a'n skoellyas war an alter a-dro.

¹³ Hag i a dhros dhodho an offrynn leskys ha'n temmyn anodho ha'n penn, hag ev a's loskas war an alter.

¹⁴ Hag ev a wolghas an pottys ha'n garrow ha'ga leski war an offrynn leskys war an alter.

¹⁵ Hag ev a dhros offrynn an bobel, ha kemmeres bogh offrynn pegh an bobel ha'y ladha ha'y offrynna rag pegh, kepar ha'n kynsa.

¹⁶ Hag ev a dhros an offrynn leskys ha'y offrynna war-lergh an rewl.

¹⁷ Hag ev a dhros an offrynn greun, ha kemmeres dornas anodho, ha'y leski war an alter, ryb offrynn leskys an myttin.

¹⁸ Hag ev a ladhas ynwedh an ojyon ha'n hordh rag sakrifis offrynnow kres, o a-barth an bobel; ha mebyon Aron a dhros dhodho an goes, hag ev a'n skoellyas war an alter a-dro,

¹⁹ ha blonek an ojyon ha'n hordh, – an lost blonegek, ha'n pyth a worher an pottys, ha'n dhiwloneth ha stagell an avi.

²⁰ I a worras an blonek war an bronnow, hag ev a loskas an blonek war an alter.

²¹ Hag Aron a wevyas an bronnow ha'n vordhos dhyghow rag offrynn gwevys dherag an Arloedh, dell erghis Moyses.

Dyskwedhyans Glori an Arloedh

²² Hag Aron a dhrehevis y leuv troha'n bobel ha'ga benniga, ha diyskynna dhiworth offrynna an offrynn pegh ha'n offrynn leskys ha'n offrynnow kres.

²³ Ha Moyses hag Aron eth a-berth yn tylda an kuntelles ha dos yn-mes ha benniga an bobel, ha glori an Arloedh a omdhiskwedhas dhe oll an bobel.

²⁴ Ha tan a dheuth yn-mes dhiworth an Arloedh ha kowlleski an offrynn leskys ha'n blonek war an alter. Pan y'n gwelas oll an bobel, i a armas yn lowen ha koedha war aga fasow.