Levitikus 3 - An Bibel Kernewek 20234 (Kernewek Kemmyn)

An Offrynn Kres

¹ Ha mars yw y offrynn sakrifis a'n offrynn kres, mara'n dre a'n chatel, mars yw gorow po benow, ev a dhre best heb namm dherag an Arloedh.

² Hag ev a worr y leuv war benn y offrynn ha'y ladha orth daras tylda an kuntelles, ha mebyon Aron, an oferysi, a wra skoellya an goes war an alter a-derdro.

³ Hag yn-mes a sakrifis an offrynn kres ev a dhre offrynn dre dan dhe'n Arloedh; an blonek a worher an pottys hag oll an blonek usi war an pottys.

⁴ Ha'n dhiwloneth ha'n blonek usi warnedha ogas dhe'n dhiwglun, ha stagell an avi gans an dhiwloneth, ev a's kemmer dhe-ves.

⁵ Ha mebyon Aron a's lesk war an alter war an sakrifis leskys usi war an prenn usi war an tan. Offrynn dre dan yw, sawer plegadow dhe'n Arloedh.

⁶ Ha'y offrynn rag sakrifis offrynn kres dhe'n Arloedh, mars yw yn-mes a'n flokk, gorow po benow, ev a dhre best heb namm.

⁷ Mar tre oen rag y offrynn, ena ev a'n dre dherag an Arloedh,

⁸ hag ev a worr y leuv war benn y offrynn ha'y ladha dherag daras tylda an kuntelles, ha mebyon Aron a wra skoellya y woes war an alter a-derdro.

⁹ Hag yn-mes a sakrifis an offrynn kres ev a dhre offrynn gwrys dre dan dhe'n Arloedh; y vlonek, an lost blonegek kowal kemmerys dhe-ves ogas dhe askorn an keyn, ha'n blonek a worher an pottys hag oll an blonek usi war an pottys.

¹⁰ Ha'n dhiwloneth ha'n blonek usi warnedha ogas dhe'n dhiwglun, ha stagell an avi gans an dhiwloneth, ev a's kemmer dhe-ves.

¹¹ Ha'n oferyas a's lesk war an alter avel boes, offrynn dre dan dhe'n Arloedh.

¹² Ha mars yw y offrynn gaver, ev a's dre dherag an Arloedh,

¹³ hag ev a worr y leuv war hy fenn ha'y ladha dherag tylda an kuntelles, ha mebyon Aron a skoell an goes war an alter a-derdro.

¹⁴ Hag yn-mes a'n offrynn ma ev a dhre offrynn gwrys dre dan dhe'n Arloedh, an blonek a worher an pottys hag oll an blonek usi war an pottys.

¹⁵ Ha'n dhiwloneth ha'n blonek usi warnedha ogas dhe'n dhiwglun, ha stagell an avi gans an dhiwloneth, ev a's kemmer dhe-ves.

¹⁶ Ha'n oferyas a's lesk war an alter avel boes, offrynn dre dan avel sawer plegadow. Oll an blonek a vydh rag an Arloedh.

¹⁷ Y fydh ordenans bys vykken der agas henedhow, der oll agas trigvaow, ma na dhypprowgh naneyl blonek vytholl na goes vytholl.