Levitikus 21 - An Bibel Kernewek 20234 (Kernewek Kemmyn)

Rewlys rag Oferysi

¹ Hag yn-medh an Arloedh dhe Moyses, Kows orth an oferysi, mebyon Aron, ha leverel dhedha: Na vedhes denvyth defolys rag den marow yn mysk y bobel,

² marnas rag y gerens yw ogas dhodho, y vamm, ha'y das, ha'y vab, ha'y vyrgh, ha'y vroder;

³ ha rag y hwoer yw gwyrghes hag ogas dhodho, na's teves gour; ev a yll bos defolys rygdhi hi.

⁴ Mes, avel gorti yn mysk y bobel, ny omdhefol, owth omdhisakra.

⁵ Ny wrons blogh aga fennow, na treghi tenwennow aga barvow, na treghi aga hig.

⁶ I a vydh sans dh'aga Duw, ha ny dhisakrons hanow aga Duw, rag i a offrynn offrynnow dre dan dhe'n Arloedh, bara aga Duw. Ytho, sans vydhons.

⁷ Ny gemmerons yn demmedhyans gwreg a vo hora na defolys, ha ny gemmerons benyn didhemmedhys a'y gour, rag sans yw ev dh'y Dhuw.

⁸ Ytho, ty a'n sansha, rag ev a offrynn bara dha Dhuw. Sans vydh dhiso, rag sans ov vy, an Arloedh neb a'gas sansha.

⁹ Ha mar omdhisaker myrgh neb unn oferyas, ow farya avel hora, hi a dhisaker hy thas. Hi a vydh leskys dre dan.

¹⁰ Ha neb yw an arghoferyas yn mysk y vreder, may feu dinewys war y benn oyl an untyans, hag yw sakrys dhe wiska an dillas, ny wra ev diskudha y benn na skwardya y dhillas.

¹¹ Ny wra ev dos nes dhe gorf marow vyth, nag omdhefola a-barth y das nag a-barth y vamm.

¹² Ny wra ev mos yn-mes a'n sentri na disakra sentri y Dhuw, rag yma sakrans oyl untyans y Dhuw warnodho. An Arloedh ov vy.

¹³ Hag ev a gemmer gwreg ha hi gwyrghes.

¹⁴ Ny wra kemmeres gwedhwes, na benyn dhidhemmedhys, na defolys, na hora, mes gwyrghes a'y bobel y honan, ev a's kemmer hi yn gwreg,

¹⁵ ma na vo y has defolys yn mysk y bobel, rag my yw an Arloedh, neb a wra y sakra.

¹⁶ An Arloedh a gewsis orth Moyses, ow leverel:

¹⁷ Kows orth Aron, ow leverel: Denvyth a'th has, der oll aga henedhow, neb a'n jeves namm, ny yll dos nes dhe offrynna bara y Dhuw.

¹⁸ Rag py gour pynag neb a'n jeffo namm, ny wra dos nes: gour dall po evredhek, po gans troen folsys, po gans esel drogformys,

¹⁹ po gour shyndys y droes po shyndys y leuv,

²⁰ po bothek, po korr, po gans gwynnenn yn y lagas, po gans bryghi podredhek, po gans troskennow, po brewys y dhiwgell.

²¹ Denvyth a has Aron an oferyas a'n jeves namm ny dheu nes dhe offrynna offrynnow an Arloedh gwrys dre dan. Yma namm dhodho; ytho ny dheu nes dhe offrynna bara y Dhuw;

²² mes ev a yll dybri bara y Dhuw, an taklow moyha sans, ha'n taklow sans.

²³ Mes nyns a a-ji dhe'n vayl, na dos nes dhe'n alter, rag yma namm dhodho, ma na dhefollo ow sentris; rag an Arloedh ov vy, neb a wra aga sanshe.

²⁴ Ytho Moyses a leveris hemma dhe Aron, ha dh'y vebyon, ha dhe vebyon Ysrael oll.