Levitikus 19 - An Bibel Kernewek 20234 (Kernewek Kemmyn)

Laghys Divers

¹ An Arloedh a gewsis orth Moyses, ow leverel:

² Kows orth kuntelles kowal mebyon Ysrael, ha leverel dhedha, Bedhewgh sans, rag sans ov vy, an Arloedh agas Duw.

³ Pubonan ahanowgh a wra revrons dh'y das ha'y vamm ha synsi ow sabotys. An Arloedh agas Duw ov vy.

⁴ Na dreylyewgh dhe idolys, na gul imajys teudh. An Arloedh agas Duw ov vy.

⁵ Pan sakrifiowgh sakrifis offrynnow kres dhe'n Arloedh, hwi a'n offrynn may kyffowgh favour.

⁶ Y fydh dybrys an keth jydh ma'n offrynnowgh, po ternos; ha mars eus remenant anodho gesys an tressa dydh, y fydh leskys y'n tan.

⁷ Ha mars yw dybrys an tressa dydh, avlan yw; nyns yw kemmeradow.

⁸ Neb a'n deppro a dheg y gammweyth, rag ev re dhefolas an pyth yw sans dhe'n Arloedh, ha'n den na a vydh treghys dhe-ves dhiworth y bobel.

⁹ Pan vysowgh trevas agas tir, ny vysydh yn tien sornow dha wel, na ny wre'ta kuntell gesigow dha drevas.

¹⁰ Ny wre'ta destryppya dha winlann, na kuntell an grappys yw koedhys. Ty a's gas rag an voghosogyon ha'n alyons. An Arloedh agas Duw ov vy.

¹¹ Ny wrewgh hwi ladra na toella na frowsya an eyl y gila.

¹² Ha ny wrewgh hwi ti yn fals re'm hanow vy, na defola hanow dha Dhuw. An Arloedh ov vy.

¹³ Ny wre'ta arwaska dha gentrevek na'y robbya. Ny wra gober gwas arvethys gortos genes jy oll an nos bys y'n myttin.

¹⁴ Ny wre'ta mollethi an den bodhar na gorra ken a drebuchya dherag an den dall, mes ty a berth own a dha Dhuw. An Arloedh ov vy.

¹⁵ Ny wrewgh kammhynseth y'n vreus. Ny wre'ta favera an boghosek, na gul revrons dhe'n den galloesek, mes ty a vreus dha gentrevek gans ewnder.

¹⁶ Ny wre'ta mos a-dro ow leverel sklander yn mysk dha bobel, na sevel erbynn goes dha gentrevek. An Arloedh ov vy.

¹⁷ Ny berthydh kas y'th kolonn erbynn dha vroder. Ty a rebuk dha gentrevek yn sur, ma na dhykki pegh a'y wovis.

¹⁸ Ny wre'ta diella, na berthi envi erbynn fleghes dha bobel, mes ty a gar dha gentrevek kepar ha ty dha honan. An Arloedh ov vy.

¹⁹ Hwi a syns ow ordenansow. Ny wre'ta gasa dha vestes dhe gopla gans bestes a gen eghenn. Ny wre'ta hasa dha wel gans has a dhiw eghenn; ha ny dheu warnas dillas a bann gwiys a dhiw eghenn a neus.

²⁰ Mar krowedh gour gans benyn yw kethes, hag y fydh dyllans has, ha hi ambosys dhe gen gour, heb bos dasprenys na rydhhes, astiveryans a vydh res. Ny vydhons gorrys dhe'n mernans rag nyns o hi rydh.

²¹ Hag ev a dhre y offrynn kammweyth dhe'n Arloedh, dhe dharas tylda an kuntelles, hordh rag offrynn kammweyth.

²² Ha'n oferyas a wra dehwelyans ragdho gans hordh an offrynn kammweyth dherag an Arloedh rag y begh re wrug, ha'n pegh re wrug a vydh gevys dhodho.

²³ Ha pan dhyffowgh a-ji dhe'n wlas ha plansa gwydh a bub eghenn rag boes, hwi a reken an frut avel antrodreghys. Ev a bes avel antrodreghys teyr blydhen ragowgh. Ny vydh dybrys.

²⁴ Mes y'n peswora blydhen oll an frut anodho a vydh sans dhe wormel an Arloedh.

²⁵ Ha'n pympes blydhen hwi a dheber an frut anodho, may rollo dhywgh an drevas ynkressys anodho. An Arloedh agas Duw ov vy.

²⁶ Ny wrewgh hwi dybri travyth gans goes. Ny wrewgh hwi dewinieth na koela orth koelyek.

²⁷ Ny wrewgh hwi treghi blew tenwennow agas pennow ha ny dreghydh tenwennow dha varv.

²⁸ Ny wrewgh hwi treghi agas kig rag an re varow, na pryntya korfliwyow warnowgh. An Arloedh ov vy.

²⁹ Na wre'ta defola dha vyrgh ow kul dhedhi bos hora, na goettho an wlas yn fornikasyon ha na dheffo ha bos leun a bodrogeth.

³⁰ Hwi a syns ow sabotys, ha diskwedhes revrons dhe'm sentri. An Arloedh ov vy.

³¹ Na dreylyewgh dhe nygromons, ha na hwilewgh koelyogyon, dhe vos defolys gansa. An Arloedh ov vy.

³² Ty a sev dherag an blew loes, hag enora an den koth, ha kavoes own a dha Dhuw. An Arloedh ov vy.

³³ Ha mars eus alyon trigys genes yn agas tir, ny wrewgh y arwaska.

³⁴ An alyon trigys genowgh a vydh dhywgh kepar ha genesik yntredhowgh. Ty a'n kar kepar ha ty dha honan, rag hwi o alyons yn pow Ejyp. An Arloedh agas Duw ov vy.

³⁵ Ny wrewgh hwi kammhynseth y'n vreus, nag yn musuryow hys, nag yn poes, nag yn dalgh.

³⁶ Y fydh dhywgh mantol ewn, poesow ewn, efa ewn ha hin ewn. An Arloedh ov vy, a'gas dros yn-mes a bow Ejyp.

³⁷ Ytho, hwi a syns oll ow ordenansow, hag oll ow breusow, ha'ga gul. An Arloedh ov vy.