Levitikus 18 - An Bibel Kernewek 20234 (Kernewek Kemmyn)

Kolmow Reydhel Anlaghel

¹ Ha'n Arloedh a gewsis orth Moyses, ow leverel:

² Kows orth mebyon Ysrael ha leverel dhedha: An Arloedh agas Duw ov vy.

³ Ny wrewgh naneyl war-lergh gwriansow pow Ejyp le mayth esewgh trigys, na war-lergh gwriansow pow Kanan le mayth esov orth agas dri, na gwrewgh hwi kerdhes war-lergh aga ordenansow.

⁴ Hwi a wra ow breusow vy ha synsi ow ordenansow vy dhe gerdhes ynna. An Arloedh agas Duw ov vy.

⁵ Ytho, hwi a syns ow ordenansow vy ha'm breusow vy. Den mar kwra hemma, ev a vew ynna. An Arloedh ov vy.

⁶ Ny wra denvyth ahanowgh dos nes dhe neshevin dhe dhiskudha aga noethedh. An Arloedh ov vy.

⁷ Ny wredh diskudha noethedh dha das na noethedh dha vamm. Dha vamm yw hi. Ny wredh diskudha hy noethedh.

⁸ Ny wredh diskudha noethedh gwreg dha das. Noethedh dha das yw.

⁹ Ny wredh diskudha noethedh dha hwoer, myrgh dha das, po myrgh dha vamm, genys tre po genys tyller arall kyn fe. Ny wredh diskudha aga noethedh.

¹⁰ Ny wredh diskudha noethedh myrgh dha vab na myrgh dha vyrgh. Ny wredh diskudha aga noethedh. Aga noethedh yw dha noethedh dha honan.

¹¹ Ny wredh diskudha noethedh myrgh gwreg dha das, dineythys dhe'th tas. Dha hwoer yw hi. Ny wredh diskudha hy noethedh.

¹² Ny wredh diskudha noethedh hwoer dha das. Kares ogas dha das yw hi.

¹³ Ny wredh diskudha noethedh hwoer dha vamm rag kares ogas dha vamm yw hi.

¹⁴ Ny wredh diskudha noethedh broder dha das – ny wredh nesa dh'y wreg. Dha vodrep yw hi.

¹⁵ Ny wredh diskudha noethedh dha wohydh. Gwreg dha vab yw hi. Ny wredh diskudha hy noethedh.

¹⁶ Ny wredh diskudha noethedh gwreg dha vroder. Noethedh dha vroder yw.

¹⁷ Ny wredh diskudha noethedh benyn ha'y myrgh. Ny wredh kemmeres yn demmedhyans myrgh hy mab na myrgh hy myrgh dhe dhiskudha hy noethedh. Hy neshevin yns i. Tra vethus yw.

¹⁸ Ny gemmerydh yn demmedhyans hwoer dha wreg avel iswreg, dhe dhiskudha hy noethedh, ha hi yn few.

¹⁹ Ny wredh dos nes dhe venyn dhe dhiskudha hy noethedh, ha hi diberthys drefenn hy avlander misyek.

²⁰ Ha ny wredh growedha yn reydhel gans gwreg dha gentrevek, owth omdhefola gensi.

²¹ Ha ny wredh gasa dha has dhe vos sakrifiys dhe Molek, na ny wredh disakra hanow dha Dhuw. An Arloedh ov vy.

²² Ny wredh growedha gans gorreydh kepar ha gans benynreydh. Tra gasadow yw.

²³ Ny wredh growedha gans best vyth dhe omdhefola ganso. Ny wra benyn vyth sevel dherag best dhe rowedha ganso. Podrogeth yw.

²⁴ Na wrewgh omdhefola mann der oll an taklow ma, rag der oll an taklow ma yw defolys an kenedhlow a dowlav yn-mes dheragowgh,

²⁵ ha defolys yw an tir. Ytho my a'n kessydhyas rag y gammweyth, ha'n tir y honan a hwyj yn-mes y drigoryon.

²⁶ Ytho hwi a syns ow ordenansow ha'm breusow ha ny wrewgh nagonan a'n taklow kasadow ma, naneyl an genesik na'n alyon trigys yn agas mysk.

²⁷ Rag gwer an tir a dheuth kyns hwi dhe dhos re wrug oll an taklow kasadow ma, ha defolys yw an tir;

²⁸ ma na wra an tir agas hwyja yn-mes ynwedh pan y'n defolowgh, dell hwyjas yn-mes an kenedhlow esa ena dheragowgh hwi.

²⁹ Peub a wrello taklow kasadow a'n par ma, an re a's gwra a vydh treghys dhe-ves dhiworth aga fobel.

³⁰ Ytho synsewgh ow charj, ma na wryllowgh travyth a'n ordenansow kasadow a'n par ma a veu gwrys kyns hwi dhe dhos, nag omdhefola dredha. An Arloedh agas Duw ov vy.