Levitikus 16 - An Bibel Kernewek 20234 (Kernewek Kemmyn)

Dy'goel an Dehwelyans

¹ An Arloedh a gewsis orth Moyses wosa mernans dew vab Aron, pan wrussons offrynn dherag an Arloedh, ha merwel.

² Hag yn-medh an Arloedh dhe Moyses, Lavar dhe Aron dha vroder na dheffo pub eur oll a-berth y'n tyller sans a-ji dhe'n vayl dherag an dregeredhva usi war an argh, ma na varwo, rag my a vynn omdhiskwedhes y'n gommolenn war an dregeredhva.

³ Mes yndella y teu Aron a-ji dhe'n tyller sans: gans tarow yowynk rag offrynn pegh ha hordh rag offrynn leskys.

⁴ Ev a wisk an bows sans a lien ha'n lavrek a lien war y gorf, ha kelmi grogys a lien a-dro dhodho, ha gwiska tulyfant a lien a-dro dh'y benn; an re ma yw dillas sans. Ev a wolgh y gorf yn dowr hag ena aga gwiska.

⁵ Hag ev a gemmer dew vogh dhiworth kuntelles mebyon Ysrael rag offrynn pegh hag unn hordh rag offrynn leskys.

⁶ Hag Aron a offrynn lodhen an offrynn pegh ragdho ev y honan, ha gul dehwelyans ragdho ev ha rag y ji.

⁷ Hag ev a gemmer an dhew vogh ha'ga settya dherag an Arloedh orth daras tylda an kuntelles.

⁸ Hag Aron a dewl prenn war an dhew vogh, unn prenn a-barth an Arloedh, ha'n prenn arall a-barth an bogh-diank.

⁹ Hag Aron a dhre an bogh may koedhas prenn an Arloedh warnodho ha'y offrynna rag offrynn pegh.

¹⁰ Mes an bogh may koedhas warnodho an prenn dhe vos an bogh-diank a vydh settys bew dherag an Arloedh dhe wul dehwelyans ganso ha dhe vos dannvenys avel bogh-diank y'n difeythtir.

¹¹ Hag Aron a dhre an lodhen rag an offrynn pegh yw ragdho ev, ha gul dehwelyans ragdho ev ha rag y ji ha ladha an lodhen rag an offrynn pegh yw ragdho ev

¹² Hag ev a gemmer ynkyslester lenwys a golennow tan dhiworth an alter dherag an Arloedh, ha dhew dhornas a ynkys hweg, gweskys munys, ha'y dhri a-ji dhe'n vayl.

¹³ Hag ev a worr an ynkys war an tan dherag an Arloedh, may kwrello kommolenn an ynkys kudha an dregeredhva usi war an dustuni, ma na varwo.

¹⁴ Hag ev a gemmer rann goes an lodhen ha'y skoellya gans y vys war an dregeredhva troha'n howldrevel, hag ev a skoell rann an goes gans y vys dherag an dregeredhva seythgweyth.

¹⁵ Ena ev a ladh bogh an offrynn pegh yw rag an bobel, ha dri y woes a-ji dhe'n vayl, ha gul an keth tra gans an goes na dell wrug gans goes an lodhen, ha'y skoellya war an dregeredhva, ha dherag an dregeredhva.

¹⁶ Hag ev a wra dehwelyans rag an tyller sans drefenn avlander mebyon Ysrael ha drefenn aga threuspassow, aga feghosow oll; hag yndella y hwra ev rag tylda an kuntelles a bes yntredha yn mysk aga avlander.

¹⁷ Ha ny vydh denvyth yn tylda an kuntelles pan enter ynno dhe wul dehwelyans y'n tyller sans, erna dheffo yn-mes, wosa gul dehwelyans ragdho ev y honan ha rag y ji ha rag oll kemmynieth Ysrael.

¹⁸ Ena ev a yn-mes dhe'n alter usi dherag an Arloedh ha gul dehwelyans ragdho, ha kemmeres rann goes an lodhen ha rann goes an bogh ha'y worra war gern an alter a-derdro.

¹⁹ Hag ev a skoell rann an goes warnodho seythgweyth gans y vys, ha'y lanhe ha'y sanshe dhiworth avlander mebyon Ysrael.

An Bogh-diank

²⁰ Ha wosa gorfenna gul dehwelyans rag an tyller sans ha tylda an kuntelles ha'n alter, ev a dhre an bogh bew.

²¹ Hag Aron a worr y dhiwleuv war benn an bogh bew ha konfessya warnodho kammweythresow oll mebyon Ysrael hag oll aga threuspassow, oll aga feghosow, orth aga gorra war benn an bogh, hag ev a'n dannvon dhe-ves dre leuv gour yw parys, bys y'n difeythtir.

²² Ha'n bogh a berth warnodho oll aga hammweythresow bys yn tir ynyal, hag ev a dhelirv an bogh dhe wari y'n difeythtir.

²³ Hag Aron a dheu a-berth yn tylda an kuntelles, hag ev a dhiwisk y dhillas a lien a wiskas pan eth a-ji dhe'n tyller sans ha'ga gasa ena.

²⁴ Hag ev a wolgh y gorf gans dowr yn tyller sans ha gwiska y dhillas, ha dos yn-mes hag offrynna y offrynn leskys hag offrynn leskys an bobel ha gul dehwelyans ragdho ev y honan ha rag an bobel.

²⁵ Hag ev a lesk blonek an offrynn pegh war an alter.

²⁶ Hag ev neb a liver an bogh avel bogh-diank a wolgh y dhillas ha badhya y gig yn dowr ha wosa henna ev a dheu a-ji dhe'n kamp.

²⁷ Ha lodhen an offrynn pegh, ha bogh an offrynn pegh may feu aga goes dres a-bervedh dhe wul dehwelyans y'n tyller sans, a vydh degys yn-mes a'n kamp, hag i a gowllesk aga kreghyn gans aga hig ha'ga hawgh.

²⁸ Hag ev neb a's lesk a wolgh y dhillas ha badhya y gig yn dowr, ha wosa henna ev a dheu a-ji dhe'n kamp.

²⁹ Ha hemma a vydh ordenans ragowgh bys vykken: y'n seythves mis, yn degves dydh an mis, hwi a omjasti ha ny wrewgh ober vyth, naneyl genesik nag alyon trigys yn agas mysk,

³⁰ rag y'n jydh ma yma dehwelyans gwrys ragowgh dh'agas glanhe; hwi a vydh glan a'gas peghosow oll dherag an Arloedh.

³¹ Sabot solem a bowes vydh ragowgh, ha hwi a omjasti; yth yw ordenans bys vykken.

³² Ha'n oferyas a wra y untya ha'y urdhya dhe servya avel oferyas yn le y das a wra an dehwelyans, ha gwiska an dillas a lien, an dillas sans.

³³ Hag ev a wra dehwelyans rag an sentri, hag ev a wra dehwelyans rag tylda an kuntelles ha rag an alter, hag ev a wra dehwelyans rag an oferysi ha rag oll pobel an gemmynieth.

³⁴ Ha hemma a vydh ordenans bys vykken ragowgh, dhe wul dehwelyans rag mebyon Ysrael rag oll aga feghosow unnweyth y'n vlydhen. Hag ev a wrug dell erghis an Arloedh dhe Moyses.