Levitikus 14 - An Bibel Kernewek 20234 (Kernewek Kemmyn)

Glanheans wosa Lovryjyon

¹ An Arloedh a gewsis orth Moyses, ow leverel:

² Hemma a vydh lagha an klavorek y'n jydh mayth yw glanhes. Ev a vydh dres dhe'n oferyas;

³ ha'n oferyas a wra mos yn-mes a'n kamp, ha'n oferyas a'n hwither, ha, mars yw an pla a lovryjyon yaghhes y'n klavorek,

⁴ an oferyas a ergh may fo dres rag neb a dal bos glanhes diw edhen vew ha glan, prenn keder, pann kogh ha hyssop.

⁵ Ha'n oferyas a ergh may fo ledhys onan an ydhyn yn lester a bri a-ugh dowr ow resek.

⁶ Hag ev a gemmer an edhen vew ha'n prenn keder ha'n pann kogh ha'n hyssop ha troghya an re ma ha'n edhen vew yn goes an edhen a veu ledhys a-ugh an dowr ow resek.

⁷ Hag ev a'n skoell seythgweyth war neb a dal bos glanhes ha desta y vos glan, ha delivra an edhen vew dhe wari y'n gwel igor.

⁸ Ha neb a dal bos glanhes a wolgh y dhillas ha treghi dhe-ves oll y vlew hag omwolghi yn dowr may fo glan; ha wosa henna ev a dheu a-ji dhe'n kamp, mes ev a worta mes a'y dylda seyth dydh.

⁹ Ha'n seythves dydh ev a dregh oll y vlew; y benn ha'y varv ha'y dhiwabrans, ev a dregh oll y vlew. Ena ev a wolgh y dhillas, ha badhya y gig yn dowr, hag ev a vydh glan.

Sakrifisow Glanheans

¹⁰ Ha'n ethves dydh ev a gemmer dew oen heb namm hag unn oenes heb namm unn bloedh, ha teyr degves rann a efa a vleus fin kemmyskys gans oyl rag offrynn greun, hag unn log a oyl.

¹¹ Ha'n oferyas neb a'n glanha a worr an gour dhe vos glanhes ha'n taklow na dherag an Arloedh orth daras tylda an kuntelles.

¹² Ha'n oferyas a gemmer onan a'n eyn gorow ha'y offrynna rag offrynn kammweyth, ha'n log a oyl, ha'ga gwevya rag offrynn gwevys dherag an Arloedh.

¹³ Hag ev a ladh an oen y'n tyller may ladh an offrynn pegh ha'n offrynn leskys, y'n tyller sans; kepar dell yw an offrynn pegh rag an oferyas, yndellma yw an offrynn kammweyth; an moyha sans yw.

¹⁴ Ha'n oferyas a gemmer rann a woes an offrynn kammweyth, ha'n oferyas a'n gorr war vin skovarn dhyghow neb a dal bos glanhes, ha war veus y leuv dhyghow, ha war veus y droes dyghow.

¹⁵ Ena an oferyas a gemmer rann a'n log a oyl ha'y dhinewi yn palv y leuv gledh y honan,

¹⁶ ha'n oferyas a drogh y vys dyghow y'n oyl usi yn y balv gledh ha skoellya rann a'n oyl gans y vys seythgweyth dherag an Arloedh.

¹⁷ Ha'n oferyas a worr rann a remenant an oyl usi yn y balv war vin skovarn dhyghow neb a dal bos glanhes, ha war veus y leuv dhyghow, ha war veus y droes dyghow, war woes an offrynn kammweyth.

¹⁸ Ha'n oferyas a worr remenant an oyl usi yn y balv war benn neb a dal bos glanhes; ha'n oferyas a wra dehwelyans ragdho dherag an Arloedh.

¹⁹ Ha'n oferyas a offrynn an offrynn pegh ha gul dehwelyans rag neb a dal bos glanhes a'y avlander, ha wosa henna, ev a ladh an offrynn leskys.

²⁰ Ha'n oferyas a offrynn an offrynn leskys ha'n offrynn greun war an alter, ha'n oferyas a wra dehwelyans ragdho, hag ev a vydh glan.

²¹ Mes mars yw boghosek ha nyns eus yn y leuv pygans lowr dhe gavoes kemmys, ev a gemmer unn oen rag offrynn kammweyth dhe vos gwevys, dhe wul dehwelyans ragdho, hag unn degves rann a efa a vleus fin kemmyskys gans oyl rag offrynn greun, ha log oyl;

²² ha diw durenn po diw golomm yowynk, par dell eus yn y leuv pygans lowr, ha'n eyl anedha a vydh offrynn pegh ha'y ben offrynn leskys.

²³ Hag ev a's dre an ethves dydh rag y lanheans dhe'n oferyas, bys yn daras tylda an kuntelles, dherag an Arloedh;

²⁴ ha'n oferyas a gemmer oen an offrynn kammweyth ha'n log a oyl, ha'n oferyas a's gwev rag offrynn gwevys dherag an Arloedh.

²⁵ Hag ev a ladh oen an offrynn kammweyth, ha'n oferyas a gemmer rann a woes an offrynn kammweyth ha'y worra war vin skovarn dhyghow neb a dal bos glanhes, ha war veus y leuv dhyghow, ha war veus y droes dyghow.

²⁶ Ha'n oferyas a dhinwa rann a'n oyl yn palv y leuv gledh y honan;

²⁷ ha'n oferyas a skoell rann a'n oyl usi yn y palv gledh gans bys y leuv dhyghow seythgweyth dherag an Arloedh;

²⁸ ha'n oferyas a worr rann a'n oyl usi yn y balv war vin skovarn dhyghow neb a dal bos glanhes, ha war veus y leuv dhyghow, ha war veus y droes dyghow, y'n tyller may feu gorrys goes an offrynn kammweyth;

²⁹ ha'n oferyas a worr remenant an oyl usi yn y balv war benn neb a dal bos glanhes, dhe wul dehwelyans ragdho dherag an Arloedh.

³⁰ Hag ev a offrynn onan a'n turennow po a'n kelemmi yowynk, par dell eus yn y leuv pygans lowr dh'aga havoes,

³¹ an eyl rag offrynn pegh ha'y ben rag offrynn leskys, gans an offrynn greun, ha'n oferyas a wra dehwelyans rag neb a dal bos glanhes dherag an Arloedh.

³² Hemm yw an lagha rag neb a'n jeves ynno pla lovryjyon, neb nag eus yn y leuv pygans lowr rag y lanheans.

Lovryjyon yn Chiow

³³ An Arloedh a gewsis orth Moyses hag Aron ow leverel,

³⁴ Pan dhyffowgh a-ji dhe bow Kanan, a rov dhywgh rag perghennogeth, ha pan worriv pla lovryjyon yn neb chi yn tir dha berghennogeth,

³⁵ ha perghennek an chi a dheu ha leverel dhe'n oferyas, ‘Yth hevel dhymm bos kepar ha pan ve pla y'n ji’,

³⁶ ena an oferyas a ergh may fo an chi gwakhes kyns es an oferyas dhe entra ynno dhe weles an pla, na vo pup-tra y'n chi deklarys avlan; ha wosa henna, an oferyas a enter ynno dhe hwithra an chi.

³⁷ Hag ev a hwither an pla, ha mars yw an pla yn parosyow an chi gans ribinow kow, glesik po rudhik, a hevel bos downa es enep an paros,

³⁸ an oferyas a yn-mes a'n chi dhe dharas an chi ha degea an chi seyth dydh.

³⁹ Ha'n oferyas a dheu arta an seythves dydh ha hwithra, ha mars yw an pla omlesys yn parosyow an chi,

⁴⁰ an oferyas a ergh may fo an meyn hag ynna an pla kemmerys dhe-ves ha tewlys yn tyller avlan mes a'n sita.

⁴¹ Hag ev a wra dhe'n chi bos krevys a-ji oll a-dro ha'n doust yw krevys dhe-ves a vydh tewlys yn tyller avlan mes a'n sita;

⁴² hag i a gemmer meyn erell ha'ga gorra yn le an meyn na, hag ev a gemmer plaster nowydh ha plastra an chi.

⁴³ Ha mar teu an pla arta hag omdhiskwedhes y'n chi wosa bos an meyn kemmerys dhe-ves, ha wosa bos an chi krevys ha plastrys,

⁴⁴ an oferyas a dheu ha hwithra, ha mars yw an pla omlesys y'n chi, lovryjyon plagus yw ev y'n chi. Avlan yw.

⁴⁵ Hag ev a derr an chi, an meyn ha'n prennyer anodho hag oll an plaster y'n chi, ha'ga doen yn-mes a'n sita dhe dyller avlan.

⁴⁶ Nebonan a dheu a-berth y'n chi hag ev deges a vydh avlan bys y'n gorthugher;

⁴⁷ ha neb a gosk y'n chi po dybri y'n chi a wolgh y dhillas.

⁴⁸ Ha mar teu an oferyas a-bervedh ha'y hwithra ha ny wrug an pla omlesa y'n chi wosa an chi dhe vos plastrys, an oferyas a dhest bos an chi glan, rag yaghhes yw an pla.

⁴⁹ Ha rag glanhe an chi ev a gemmer diw edhen ha prenn keder ha pann kogh ha hyssop.

⁵⁰ Hag ev a ladh onan an ydhyn yn lester a bri a-ugh dowr ow resek.

⁵¹ Hag ev a gemmer an prenn keder ha'n hyssop ha'n pann kogh ha'n edhen vew ha'ga troghya yn goes an edhen ledhys hag y'n dowr ow resek ha skoellya seythgweyth war an chi.

⁵² Hag ev a lanha an chi gans goes an edhen ha'n dowr ow resek ha'n edhen vew ha'n prenn keder ha'n hyssop ha'n pann kogh.

⁵³ Hag ev a dhelirv an edhen vew yn-mes a'n sita y'n gwel igor, ha gul dehwelyans rag an chi, ha glan vydh.

⁵⁴ Hemm yw an lagha rag pla lovryjyon a bub eghenn ha rag troskenn,

⁵⁵ ha rag lovryjyon dillas ha chi,

⁵⁶ ha rag bothenn ha rag krammenn ha rag namm gwynn,

⁵⁷ dhe dhyski pan yw avlan ha pan yw glan. Hemm yw an lagha a lovryjyon.