Levitikus 1 - An Bibel Kernewek 20234 (Kernewek Kemmyn)

An Offrynn Leskys

¹ Ha'n Arloedh a elwis Moyses ha kewsel orto dhiworth tylda an kuntelles, ow leverel,

² Kows orth mebyon Ysrael ha leverel dhedha: Mars eus nebonan ahanowgh a dhrollo offrynn dhe'n Arloedh, drewgh agas offrynn a vestes mes a'n chatel ha mes a'n flokk.

³ Mars yw y offrynn offrynn leskys a'n gwarthek, offrynnes ev best gorow heb namm: gwres ev y offrynna orth daras tylda an kuntelles, may kaffo favour dherag an Arloedh.

⁴ Ev a worr y leuv war benn an sakrifis leskys, ha kemmeradow vydh ragdho, dhe wul dehwelyans ragdho.

⁵ Ena ev a ladh an lodhen dherag an Arloedh, ha mebyon Aron, an oferysi, a dhre an goes ha skoellya an goes a-dro war an alter usi ryb daras tylda an kuntelles.

⁶ Hag ev a bil an offrynn leskys ha'y dreghi yn rannow.

⁷ Ha mebyon Aron an oferyas a worr tan war an alter hag araya prenn war an tan.

⁸ Ha mebyon Aron, an oferysi, a aray an rannow, an penn, ha'n blonek war an prenn usi war an tan usi war an alter.

⁹ Mes y bottys ha'y arrow ev a's golgh yn dowr; ha'n oferyas a lesk pup-tra oll war an alter avel offrynn leskys, offrynn dre dan, sawer plegadow dhe'n Arloedh.

¹⁰ Ha mars yw y offrynn a'n flokk, deves po gever, rag sakrifis leskys, ev a dhre best gorow heb namm.

¹¹ Hag ev a'n ladh orth tenewen kledh an alter dherag an Arloedh; ha mebyon Aron, an oferysi, a skoell y woes a-dro war an alter.

¹² Hag ev a'n tregh yn y rannow, gans y benn ha'y vlonek, ha'n oferyas a's aray war an prenn usi war an tan usi war an alter.

¹³ Mes ev a wolgh an pottys ha'n garrow gans dowr; ha'n oferyas a dhre oll anodho ha'y leski war an alter. Sakrifis leskys yw, offrynn dre dan, sawer plegadow dhe'n Arloedh.

¹⁴ Ha mars yw y offrynn dhe'n Arloedh sakrifis leskys a ydhyn, ena ev a dhre avel offrynn turennow po kelemmi yowynk.

¹⁵ Ha'n oferyas a'n dre dhe'n alter ha wrestya dhe-ves y benn ha'y leski war an alter; ha'y woes a vydh gweskys yn-mes orth tenewen an alter.

¹⁶ Hag ev a gemmer dhe-ves y groth gans y bluvennow ha'y dewlel ryb an alter troha'n howldrevel ryb tyller an lusu.

¹⁷ Ev a'n skward der an eskelli mes ny wra y ranna yn tien, ha'n oferyas a'n lesk war an alter, war an prenn usi war an tan. Sakrifis leskys yw, offrynn dre dan, sawer plegadow dhe'n Arloedh.