Lavarow Koth 6 - An Bibel Kernewek 20234 (Kernewek Kemmyn)

Gwarnyans erbynn Follneth

¹ Ow mab, mar resys gaja rag dha gentrevek, mar shaksys leuv yn goestel rag estren,

² mar peusta maglennys yn kows dha dhiwweus, kechys yn geryow dha anow,

³ ena gwra hemma, ow mab, hag omsaw, rag deuves yn galloes dha gentrevek; ke, bydh uvel, ha pled gans dha gentrevek.

⁴ Na ro kosk dhe'th tewlagas, na hun dhe greghyn dha dhewlagas;

⁵ omwith avel ewik rag an helghor, avel edhen rag dorn an edhnor.

⁶ Ke dhe'n voryonenn, ty dhiek; preder a'y fordhow hi, ha bydh fur.

⁷ Heb ledyer, naneyl soedhek na rewler,

⁸ hi a bareus hy boes yn hav, ha kuntell hy sosten y'n drevas.

⁹ Pes termyn y hwrowedhydh, A dhiek? P'eur hwre'ta sevel a'th hun?

¹⁰ Nebes kosk, nebes hun, nebes plegya a'n dhiwla dhe bowes,

¹¹ ha boghosogneth a dheu warnas avel brybour, hag esow avel gour ervys.

¹² Den koeg, drog wour a a-dro gans kows kamm,

¹³ hag a wynk gans y dhewlagas, a grav gans y dhewdroes, a gevarwoedh gans y vys;

¹⁴ gans kolonn dreus ev a dhevis droktra, pup-prys ow hasa kedrynnow.

¹⁵ Ytho y derroes a dheu warnodho distowgh, a-ji dhe brysweyth ev a vydh brewys dres sawya.

¹⁶ Yma hwegh tra a gas an Arloedh, seyth yw tra gasadow dhodho:

¹⁷ lagasow goethus, taves gowek, diwla hag a skoell goes gwiryon,

¹⁸ kolonn hag a dewl droktowlow, treys hag a fysk ow poenya dhe dhroktra,

¹⁹ fals dhustunier hag a anell gow yn-mes, ha den neb a has diskord yntra breder.

²⁰ Ow mab, gwith gorhemmynn dha das, ha na forsak dyskans dha vamm.

²¹ Kolm i war dha golonn pup-prys; mayl i yn kyrghynn dha gonna.

²² Pan gerdhydh, i a'th led; pan wrowedhydh i a woel warnas; ha pan dhifunydh i a gews genes.

²³ Rag an gorhemmynn yw lugarn ha'n dyskans yw golow, ha'n reprevow a dhyskybleth yw an fordh a vewnans,

²⁴ rag dha witha orth benyn dhrog, orth taves medhel an venyn estren.

²⁵ Na yeun war-lergh hy thekter y'th kolonn, ha na as hi dhe'th synsi gans blewennow hy dewlagas;

²⁶ rag y hyllir gobrena hora a dorth-vara, mes gwreg gour arall a breydh poran an enev drudh.

²⁷ A yll gour doen tan yn y askra, ha'y dhillas bos heb aga leski?

²⁸ Po a yllir kerdhes war regydh ha ny vydh y dhewdroes goleskys?

²⁹ Yndella yth yw neb a a-ji dhe wreg y gentrevek; neb a's toch, ny vydh ev heb kessydhyans.

³⁰ Ny wra tus dispresya lader mar lader rag lenwel y edhomm pan y'n jeves nown;

³¹ mes mars yw dalghennys, ev a dal seythplek; res yw dhodho ri oll gwara y ji.

³² Neb a wra avoutri gans benyn yw diboell; neb a'n gwra a omdhistru.

³³ Ev a'n jevydh goliow ha disenor, ha ny vydh y vewl defendys.

³⁴ Rag avi a wra dhe wour bos konneryek, ha ny vynn sparya pan gemmer dial.

³⁵ Ny vynn ev degemmeres attal vyth; na ny vydh ev pes da, kyn redh rohow pals.