Lavarow Koth 27 - An Bibel Kernewek 20234 (Kernewek Kemmyn)

¹ Na vost a-dro dhe a-vorow, rag ny wodhes pandr'a dhre unn jydh.

² Gas dhe dhen arall dha wormel, a-der dha anow dha honan; estren, a-der dha dhiwweus dha honan.

³ Men yw poes ha tewes a'n jeves poesedh, mes an negh gwrys gans foll yw poessa ages aga dew.

⁴ Konnar yw fell ha sorr a feth, mes piw a yll sevel orth avi.

⁵ Keredh igor yw gwell ages kerensa yn-dann gel.

⁶ Lel yw goliow kar, mes pals yw ammow eskar.

⁷ Kas yw mel dhiworth an gribenn dhe neb yw leun, mes dhe neb a'n jeves nown, pup-tra hwerow yw hweg.

⁸ Avel edhen a wander a'y neyth yw gour a wander a'y dyller.

⁹ Melyseth ha frankynkys a wra an golonn lowen, mes an enev yw terrys dhe demmyn gans govisyon.

¹⁰ Na forsak dha goweth na koweth dha das; ha na enter dhe ji dha vroder yn dydh dha derroes. Gwell yw kentrevek eus yn ogas ages broder eus pell.

¹¹ Bydh fur ow mab ha lowenha ow holonn, rag may hylliv gorthybi dhe'n re a'm arvreus.

¹² An den doeth a wel peryll hag a omgudh, mes an re sempel a yn-rag hag a be an pris.

¹³ Kemmer dillasenn an den a's ros avel goestel rag estren; syns hi avel gaja mar peu gwrys rag alyon.

¹⁴ Neb a vennik y gentrevek gans lev ughel, ow sevel myttin a-varr, synsys vydh avel molleth.

¹⁵ Deverans heb hedhi yn dydh glawek, ha gwreg gavyllek yw kehaval.

¹⁶ Hy fronna yw kepar ha fronna an gwyns, po synsi olew y'n dhorn dhyghow.

¹⁷ Horn a lymm horn, yndella den a lymm skians den arall.

¹⁸ Neb a with figbrenn a dheber y froeth, ha neb a with y vester a vydh enorys.

¹⁹ Dell dhastewynn dowr an fas, yndella y hwra kolonn den dhe dhen arall.

²⁰ Ifarn hag Abaddon, nevra ny's teves lowr; ha ny'n jeves dewlagas mab-den lowr.

²¹ An teudhlester yw rag arghans, ha'n forn yw rag owr, yndella yw gour prevys dre vos gormelys.

²² Mar prewydh den foll yn morter war-barth gans greun barlys gans hordh brewi, nyns a y follneth dhiworto.

²³ Godhvydh yn ta studh dha flokkys; sett dha golonn war an gever a'th eus.

²⁴ Rag ny bes tresor bys vykken, na ny bes kurun a henedh dhe henedh.

²⁵ Pan yw gyllys an foen, ha'n aswels a dheu, ha'n losow war an menydhyow re beu kuntellys,

²⁶ an eyn a brovi dha dhillas, ha'n gever a brovi pris park.

²⁷ Y fydh leth lowr a'n gever rag dha voes, ha rag boes dha deylu ha sosten rag dha vaghtethyon.