Lavarow Koth 25 - An Bibel Kernewek 20234 (Kernewek Kemmyn)

Moy Lavarow Koth a Solomon

¹ An re ma ynwedh yw lavarow koth a Solomon hag a veu dasskrifys gans gwer Hezekia myghtern Yuda.

² Glori Duw yw gwitha taklow kudhys, mes glori myghternedh yw aga diskudha.

³ Avel an ebron yn ughelder, avel an nor yn downder, yndella dres hwithra yw kolonn myghternedh.

⁴ Kemmer an plosedhes dhiworth an arghans, hag yma dhe'n ser devnydh rag lester.

⁵ Yndella kemmer an debeles dhiworth lok an myghtern, ha'y dron a vydh fondys yn ewnhynseth.

⁶ Na wra bostya a-rag myghtern, ha na sav yn tyller ugheloryon.

⁷ Gwell yw y fo leverys dhis, ‘Deus yn-bann omma’, ages ty dhe vos gorrys isella. An taklow a wrug dha dhewlagas aga gweles –

⁸ na's dro yn fysk dhe'n vreuslys, rag pandr'a wredh y'n diwedh pan y'th sham dha gentrevek?

⁹ Dadhel dha gen gans dha gentrevek y honan, ha na dhiskudh kevrin den arall,

¹⁰ poken nebonan neb a'th klew a dhre meth warnas, ha ny vydh diwedh dhe'th trokhanow.

¹¹ Ger kewsys a-dermyn yw haval dhe avalow a owr settys yn arghans.

¹² Avel skinenn a owr po tegenn a owr fin yw keredh den fur dhe skovarn ow koslowes.

¹³ Avel yeynder ergh yn dydh an drevas yw kannas lel dhe'n re a'n dannvon; ev a dhisygh spyrys y vestrysi.

¹⁴ Avel kommol ha gwyns heb glaw yw gour a vost a ro, heb y ri.

¹⁵ Gans perthyans y hyllir dynya rewler, ha taves medhel a yll terri eskern.

¹⁶ Mar kevydh mel, deber kemmys a vydh lowr ragos, poken, ow pos lenwys ganso, ty a'n hwyj.

¹⁷ Gwayt may fo dha droes boghes venowgh yn chi dha gentrevek, poken gyllys skwith genes ev a vydh, hag ev a'th kas.

¹⁸ Fust, kledha po seth lymm yw neb a dheg fals dhustuni erbynn kentrevek.

¹⁹ Avel dans brew po troes klof yw fydhyans yn den dislel y'n termyn a dhregynn.

²⁰ Avel onan a dhiwisk kweth yn dydh yeyn, hag avel aysel dinewys war woli, yw kaner a ganow dhe golonn drist.

²¹ Mara'n jeves dha eskar nown, ro dhodho bara dhe dhybri, ha mara'n jeves syghes, ro dhodho dowr dhe eva.

²² Rag ty a raghell kolennow bew war y benn, ha'n Arloedh a'th wober.

²³ Gwyns an gledhbarth a dhre glaw, ha taves spitus a dhre semlans serrys.

²⁴ Gwell yw triga yn kornell a'n to ages triga yn chi war-barth gans gwreg gavyllek.

²⁵ Avel dowrow yeyn dhe neb a'n jeves syghes, yndella yw nowodhow da a vro bell.

²⁶ Avel fenten leysek po puth stronk yw den gwiryon a ombleg dhe debelwas.

²⁷ Nyns yw da dybri meur a vel, ha nyns yw glori tus dhe hwilas aga glori aga honan.

²⁸ Avel sita folsys hy fosow yw den na'n jeves omvaystri.