Lavarow Koth 21 - An Bibel Kernewek 20234 (Kernewek Kemmyn)

¹ Kolonn an myghtern yw gover a dhowr yn leuv an Arloedh; ev a's treyl py le pynag y fynno.

² Pub fordh gour yw ewn yn y dhewlagas y honan, mes an Arloedh a vantol an golonn.

³ Gul ewnder ha gwirvreus yw moy plegadow gans an Arloedh ages sakrifis.

⁴ Lagasow howtyn ha kolonn woethus, lugarn an debeles, yw pegh.

⁵ Towlow an den diwysyk a hembronk yn sur dhe balster, mes pub huni hag yw fysk a dheu dhe voghosogneth.

⁶ Neb a gyv tresoryow gans taves gowek yw anall hwythys a-dro, antell a ankow.

⁷ Freudh an debeles a's skub dhe-ves, drefenn i dhe skonya a wul an pyth yw ewn.

⁸ Fordh an gour kablus yw kamm, mes ober an den pur yw ewn.

⁹ Gwell yw triga yn kornell a'n to ages triga yn chi war-barth gans gwreg gavyllek.

¹⁰ Enev an tebelwas a'n jeves hwans a dhrog; ny gyv y gentrevek mersi yn y dhewlagas.

¹¹ Pan gessydhir an skornyer, an den sempel a dheu ha bos fur; pan dhyskir an den fur, ev a dhegemmer godhvos.

¹² An den gwiryon a wra vri a ji an tebelwas; ev a dhomhwel an debeles dhe derroes.

¹³ Neb a dhege y dhiwskovarn orth kri an boghosek, ev ynwedh a gri heb bos klewys.

¹⁴ Ro yn-dann gel a dreyl sorr dhe-ves, ha gober y'n askra a goselha konnar veur

¹⁵ Joy yw dhe'n den gwiryon pan yw gwirvreus gwrys, mes euth dhe dhrogoberoryon.

¹⁶ Neb a wander dhiworth an fordh a gonvedhes a wra powes yn kuntelles spyrysyon an re varow.

¹⁷ Neb a gar plesour a berth esow; neb a gar gwin hag oyl nevra ny vydh rych.

¹⁸ An tebelwas yw daspren rag an den gwiryon, ha'n den dislel rag tus ewnhynsek.

¹⁹ Gwell yw triga y'n difeythtir ages gans benyn gavyllek ha serrys.

²⁰ Yma tresor drudh hag oyl yn annedh an den fur, mes den foll a'n gollenk.

²¹ Neb a hol ewnder ha tregeredh a gyv bewnans, ewnder hag enor.

²² Unn den fur eth yn-bann erbynn sita a gasoryon, ha dri dhe'n dor nerth hy fydhyans.

²³ Neb a with y anow ha'y daves a with y enev orth troblow.

²⁴ An orgelus goethus, ‘Skornyer’ y hanow, a omdheg gans balghder dres musur.

²⁵ Ewl an diek a'n ladh, rag y dhiwla a skon a lavurya.

²⁶ Oll an jydh ev yw hwansek dhe voy, mes an den gwiryon a re heb lett.

²⁷ Sakrifis an debeles yw tra gasadow; kemmys moy pan y'n dro gans tebel borpos.

²⁸ Fals dhustunier a dhe goll, mes gour hag a woslow yn ta a gews yn sewen.

²⁹ An drog wour yw tont y semlans, mes an den ewnhynsek a breder y fordhow.

³⁰ Nyns eus na furneth, na konvedhes na kusul a yll sevel erbynn an Arloedh.

³¹ An margh yw darbarys rag dydh an gas, mes yma an trygh dhe'n Arloedh.