Lavarow Koth 12 - An Bibel Kernewek 20234 (Kernewek Kemmyn)

¹ Neb a gar dyskybleth a gar godhvos, mes neb a gas keredh yw talsogh.

² Den da a gyv favour gans an Arloedh, mes gour a dhevisyow ev a dhampen.

³ Ny yll den bos fastys gans droktra, mes gwreydhenn an re wiryon ny vydh nevra removyes.

⁴ Gwreg a vertu yw kurun hy gour, mes neb a dhre mewl yw avel podredhes yn y eskern.

⁵ Towlow an re wiryon yw ewn, mes gidyans an debeles yw fals.

⁶ Geryow an debeles a gontrewayt tus rag goes, mes ganow an re ewnhynsek a's delirv.

⁷ An debeles yw domhwelys ha nyns esons na fella, mes chi an re wiryon a sev.

⁸ Gour yw kommendys herwydh y dhoethter, mes den a vrys treus yw dispresys.

⁹ Gwell yw den a savla uvel, ha dhodho gwas, ages onan hag a omwra den a vri ma nag eus dhodho bara.

¹⁰ Den gwiryon a wra vri a vewnans y vest, mes mersi tebeles yw fell.

¹¹ Neb a wonedh y dir a'n jevydh meur a vara, mes neb a hol gweythresow euver ny'n jeves skians.

¹² Tour krev an debeles a dheu dhe vagor, mes gwreydhenn an den gwiryon a sev fast.

¹³ Tebelwas yw maglennys gans treuspass y dhiwweus, mes an den gwiryon a dhienk a drobel.

¹⁴ A froeth y anow gour a gyv y walgh a dhader, hag ober diwleuv den a vydh attylys dhodho.

¹⁵ Fordh den foll yw ewn yn y dhewlagas y honan, mes den fur a woslow orth kusul.

¹⁶ Sorr den foll yw diskwedhys a-dhistowgh, mes den doeth ny wra vri a dhespit.

¹⁷ Neb a re dustuni onest a gews an gwiryonedh, mes fals dhustunier a gews toell.

¹⁸ Kows dibreder yw avel strokosow a gledha, mes taves tus fur a dhre yeghes.

¹⁹ Gweusyow gwiryon a dhur bys vykken, mes taves gowek a bes unn pols byghan.

²⁰ Yma toell yn kolonn an re hag a dhevis droktra, mes an re a dewl kres a's teves joy.

²¹ Ny hwer droktra vyth dhe'n re wiryon, mes an debeles yw lenwys a drobel.

²² Gweusyow gowek yw tra gasadow dhe'n Arloedh, mes an re a omdheg yn lel yw y dhelit.

²³ Den doeth a gudh y wodhvos, mes brys fellyon a dhyllo aga follneth.

²⁴ Leuv an dus dhiwysyk a reyn, mes den diek a vydh gorrys dhe hwel krev.

²⁵ Prederi yn kolonn gour a boes warnodho, mes ger da a'n lowenha.

²⁶ Den gwiryon yw kevarwoedher dh'y gentrevek, mes fordh an debeles a's hembronk yn sowdhan.

²⁷ Ny wra an den diek rostya y breydh, mes drudh yw pythow an den diwysyk.

²⁸ Y'n hyns a ewnder yma bewnans, mes an fordh a gammwrians a hembronk dhe'n mernans.