Lavarow Koth 1 - An Bibel Kernewek 20234 (Kernewek Kemmyn)

¹ Lavarow koth Solomon, mab Davydh, myghtern Ysrael.

Raglavar

² Rag may fo dhe dus godhvos a furneth ha dyskans, dhe dhissernya geryow poellek,

³ degemmeres dyskans yn dyghtyans fur, ewnder, gwirvreus hag ewnhynseth;

⁴ rag may roller felder dhe'n re sempel, godhvos ha doethter dhe'n gour yowynk

⁵ An den fur a woslow hag ynkressya yn dyskans, ha'n den a gonvedhes a gyv kevarwoedhyans;

⁶ rag may konvettho lavar koth ha parabolenn, geryow an re fur ha'ga lavarow tewl.

⁷ Own an Arloedh yw an dalleth a wodhvos; fellyon a skorn furneth ha dyskans.

Kusul dhe Wour Yowynk

⁸ Klew, ow mab, dyskans dha das, ha na skon dyskas dha vamm

⁹ rag garlont teg yns i rag dha benn ha torgh rag dha gonna.

¹⁰ Ow mab, mar kwra peghadoryon dha dhynya, na wra assentya.

¹¹ Mar leverons, ‘Deus genen, gwren kontrewaytya rag kavoes goes; gwren ni skolkya dhe vaglenna an den gwiryon heb ken;

¹² avel ifarn, gwren ni aga daslenki yn few, ha kowal, avel an re hag a dhiyskynn dhe'n pytt;

¹³ ni a gyv oll pythow drudh, ni a lenow agan chiow a breydh;

¹⁴ towl dha brenn genen, ni oll a'gan bydh unn pors’ –

¹⁵ ow mab, na gerdh y'n fordh gansa, tenn dha droes dhiworth aga hynsyow;

¹⁶ rag aga threys a boen dhe dhroktra, hag i a fysk rag skoellya goes.

¹⁷ Rag euver yw an roes a lesir y'n wel a edhen bynag;

¹⁸ mes an re ma a gontrewayt rag aga goes aga honan, i a skolk dhe vaglenna aga bewnans aga honan.

¹⁹ Yndella yw fordhow pubonan hag yw hwansek dhe wayn anewn, henna a denn dhe-ves bewnans an re a'n pew.

Furneth a Elow

²⁰ Furneth a gri yn ughel y'n stret, yn plenys hi a dhrehav hy lev;

²¹ dhe benn an tylleryow trosek hi a gri yn-mes, a-rag yetow an sita hi a gews hy eryow:

²² ‘A hwi sempel, pes termyn y kerowgh hwi sempledh? Pes termyn y fynn skornyoryon lowenhe yn aga skornya ha fellyon kasa godhvos?

²³ Koelewgh orth ow heredh; otta! my a dhinwa ow spyrys dhywgh, my a wra ow geryow dhe vos godhvedhys genowgh.

²⁴ Drefenn my dhe elwel, ha hwi re naghas, my re ystynnas ow leuv ha ny woslowas denvyth,

²⁵ ha hwi re dhispresyas oll ow husul ha ny wrussowgh vri a'm keredh;

²⁶ my ynwedh, my a wra hwerthin orth agas terroes; my a wra ges ahanowgh pan dheu skruth warnowgh,

²⁷ pan dheu skruth warnowgh avel tewedh, ha'gas terroes a dheffo avel korwyns, pan dheffo fienasow hag angoes warnowgh.

²⁸ Ena i a elow warnav, mes ny wrav vy gorthybi, i a wra ow hwilas dihwans, mes ny'm kevons.

²⁹ Drefenn i dhe gasa godhvos, ha ny dhewissons own an Arloedh,

³⁰ ny vynnens degemmeres ow husul, hag i a skonyas oll ow heredh,

³¹ ytho i a dheber froeth a'ga hyns, ha bos lenwys a'ga thowlow aga honan.

³² Rag an re sempel yw ledhys gans aga dislelder, hag omfydhyans an fellyon a's distru;

³³ mes neb a woslow orthiv a wra triga yn sawder, hag a vydh attes, heb euth a dhroktra.’