Kynvannow 3 - An Bibel Kernewek 20234 (Kernewek Kemmyn)

Ny Fyll Tregeredhow Duw

¹ My yw an gour re welas galar yn-dann vagel y sorr;

² Ev re'm hembronkas ha gul dhymm mos yn tewlder a-der golow;

³ Yn hwir, ev a dreyl y leuv er ow fynn arta oll an jydh.

⁴ Ev a wrug dhe'm kig ha'm kneus bos spenys, ev a dorras ow eskern.

⁵ Ev re dhrehevis er ow fynn ha settya a-dro dhymm hwerowder hag anken.

⁶ Ev re wrug dhymm triga yn tylleryow tewl, kepar ha'n dus varow nans yw pell.

⁷ Ev re'm keas ma na allav skapya, ev a'm beghyas gans kargharow poes.

⁸ Ynwedh pan griav ‘Harow!’ ev a dhege yn-mes ow fysadow.

⁹ Ev re geas ow fordhow gans meyn treghys, ha kamma ow hynsyow.

¹⁰ Kepar hag ors ow kontrewaytya yth yw dhymm, kepar ha lew yn kudhvaow.

¹¹ Ev re dreylyas ow fordhow a-denewen hag ow skethenna; hag ow gasa forsakys.

¹² Ev re blegyas y warak, hag ow settya dhe vos kostenn dhe'n seth.

¹³ Ev re wanas ow lonethi gans mebyon goen y sethow.

¹⁴ Re beuv ges dhe oll ow fobel, aga skorngan oll an jydh.

¹⁵ Ev re'm lenwis a erbys hwerow, ha'm medhwi a fuelenn.

¹⁶ Ev re vrewis ow dyns gans growynn, hag ow maga gans lusu.

¹⁷ Ty re bellhas ow enev dhiworth kres, ny berthis kov a sewena.

¹⁸ Yn-medhav, ‘Gyllys dhe goll yw ow splannder, ha'm govenek dhiworth an Arloedh.’

¹⁹ Kovha ow galar, ha'm diannetter, an fuelenn ha'n vystel.

²⁰ Ow enev a berth kov yn ta ha plegya dhe'n dor a-berth ynnov.

²¹ My a dhre hemma dhe'm kolonn – rakhenna yma dhymm govenek.

²² Yn hwir, ny fyll tregeredhow an Arloedh, ha nyns yw y druedhow gorfennys.

²³ Nowydhhes vydhons pub myttin, bras yw dha lelder.

²⁴ ‘Ow rann yw an Arloedh’, yn-medh ow enev, ‘rakhenna govenek a'm beus ynno.’

²⁵ Da yw an Arloedh dhe seul a'n worto, dhe'n enev a'n hwillo.

²⁶ Da yw, pan wortir yn tawesek selwyans an Arloedh.

²⁷ Da yw, gour dhe berthi an yew yn y yowynkses.

²⁸ Bedhes owth esedha y honan, tawesek, rag Duw re'n beghyas warnodho,

²⁹ ha gorres ev y anow bys y'n doust, mar pydh hwath govenek,

³⁰ ha res ev an vogh dhe neb a'n gwasko, ha bedhes lenwys a dhespit.

³¹ Rag ny wra an Arloedh skonya bys vykken.

³² Kyn hwra grev, byttegyns ev a gemmer truedh herwydh braster y dregeredh;

³³ rag ny vynn a'y golonn plagya na grevya mab-den.

³⁴ Pan vydh brewys yn-dann droes oll prisnoryon an tir,

³⁵ pan vydh treylys a-denewen gwirvreus gour a-wel dhe'n Ughella,

³⁶ pan vydh domhwelys neb den yn y gen, ny vydh da gans an Arloedh.

³⁷ Piw a yll gorhemmynn hag y fydh gwrys, mar ny'n ordenas an Arloedh?

³⁸ A nyns yw yn-mes a anow an Ughella y teu drog ha da?

³⁹ Prag y krodhvol den bew, gour, war gessydhyans y beghes?

⁴⁰ Hwithryn ni orth agan fordhow ha'ga studhya, ha dehweles arta dhe'n Arloedh.

⁴¹ Drehevyn ni agan kolonn ha'gan diwleuv dhe Dhuw y'n nevow.

⁴² Ni re gammdremenas ha rebellya; mes ty, ny wrussys gava.

⁴³ Ty re omwiskas gans kudhlenn sorr, ha'gan helghya; ty re ladhas heb piteth.

⁴⁴ Ty re omwiskas gans kommolenn, ma na dremen pysadow vyth.

⁴⁵ Ty re wrussys dhyn bos lastedhes ha skubyon yn mysk an poblow.

⁴⁶ Oll agan eskerens re igoras aga ganow er agan pynn.

⁴⁷ Euth ha'n pytt re beu dhyn, diswrians ha terroes.

⁴⁸ Goverow a dhowr a dhever yn-nans dhiworth ow lagas drefenn terroes myrgh ow fobel.

⁴⁹ Ow lagas a dhiver ha ny hedh, heb powes,

⁵⁰ bys pan wra an Arloedh mires war-woeles, ha gweles dhiworth an nevow.

⁵¹ Ow lagas a re galar dhe'm enev drefenn oll myrghes ow sita.

⁵² Ow helghya yn tynn kepar hag edhen re wrug ow eskerens heb acheson.

⁵³ I a dhegeas ow bewnans yn pytt hag ow labydha.

⁵⁴ Dowr a resas war ow fenn; ‘Gyllys dhe goll ov vy’, yn-medhav.

⁵⁵ My a grias war dha hanow, A Arloedh, dhiworth downder an pytt.

⁵⁶ Klewes ow lev a wrussys, ‘Na dhege dha skovarn dhiworth ow hanasenn, dhiworth ow kri.’

⁵⁷ Ty a dheuth nes y'n jydh mayth elwis warnas, ‘Na borth own’, yn-medhydh.

⁵⁸ Ty re bledyas, A Arloedh, kenyow ow enev, ty re dhasprenas ow bewnans.

⁵⁹ Ty re welas, A Arloedh, an drogvreus er ow fynn; gwra breusi ow hen.

⁶⁰ Ty re welas oll aga venjans, oll aga thebel-dowlow er ow fynn.

⁶¹ Ty re glewas oll aga despit, A Arloedh, oll aga thowlow er ow fynn,

⁶² diwweus ow eskerens, ha'ga krodhvolyow warnav oll an jydh.

⁶³ Mir orta: owth esedh hag ow sevel, yth ov vy aga skorngan.

⁶⁴ Attal dhedha aga gwrians A Arloedh herwydh ober aga diwleuv.

⁶⁵ Diskwedh dhedha divethter dha golonn, re bo dha volleth warnedha.

⁶⁶ Gwra aga helghya ha'ga distrui y'th sorr a-dhann nevow an Arloedh.