Kolossianys 4 - An Bibel Kernewek 20234 (Kernewek Kemmyn)

Pella Dyskans

¹ A vestrysi, rewgh dh'agas kethwesyon an dyghtyans yw ewn hag ekwal, rag hwi a woer bos Mester genowgh hwi ynwedh yn nev.

² Gwrewgh pesya yn pysadow, ow koelyas ynno gans grasyans;

³ pysewgh y'n keth termyn ragon ni ynwedh, mayth igorro Duw dhyn daras rag an ger dhe gewsel mysteri Krist, mayth esov yn kolmow ragdho,

⁴ ma'n diskwetthiv, dell goedh dhymm kewsel.

⁵ Yn furneth kerdhewgh troha'n re usi a-ves, ow kul devnydh a'n termyn.

⁶ Bedhes agas lavar pup-prys grassyes, sawrys gans hoelan, dhe wodhvos fatell goedh dhywgh gorthybi dhe bubonan.

Dynnarghow Diwettha

⁷ Y hwra Tyghikus, an broder karadow ha menyster lel ha keswas y'n Arloedh, derivas dhywgh a-dro dhymm,

⁸ neb re dhannvenis dhywgh rag an keth tra ma, may hwodhvowgh a-dro dhyn, ha may kennertho agas kolonn,

⁹ gans Onesimus an broder lel ha karadow yw onan ahanowgh. I a wra derivas dhywgh a bup-tra omma.

¹⁰ Aristarghus, ow hesprisner a'gas dynnergh, ha Mark, kenderow Barnabas: hwi re dhegemmeras arghadowyow a-dro dhodho; mar teu ev dhywgh, salusewgh ev;

¹¹ ha Yesu, henwys Yustus; nyns eus marnas an re ma a'n trodreghyans yw ow hesoberoryon rag gwlaskor Duw, hag i re beu konfort dhymmo.

¹² Epafras a'gas dynnergh, onan ahanowgh, kethwas Krist Yesu, ow strivya pup-prys ragowgh yn y bysadow, may seffowgh perfydh ha surhes yn tien y'n bolonjedh oll a Dhuw.

¹³ Rag my a dheg dustuni anodho, bos meur a lavur dhodho ragowgh ha'n re usi yn Laodikea ha'n re yn Hierapolis.

¹⁴ Luk, an medhek karadow ha Demas a'gas dynnergh.

¹⁵ Salusewgh an vreder yn Laodikea, ha Nymfas ha'n eglos yn y ji.

¹⁶ Ha pan vo redys an lyther ma a-dheragowgh, gwrewgh may fo redys ynwedh yn eglos tus Laodikea, ha hwi ynwedh redyewgh an lyther dhiworth Laodikea.

¹⁷ Ha leverewgh dhe Arghippus, ‘Mir dhe'th oberenn a dhegemmersys y'n Arloedh, ma's kollenwi hi.’

¹⁸ An dynnargh dre'm dorn ow honan, Powl. Perthewgh kov a'm kolmow. Gras genowgh hwi.