Kolossianys 2 - An Bibel Kernewek 20234 (Kernewek Kemmyn)

¹ My a vynn hwi dhe wodhvos pygemmys yw an strivyans usi genev ragowgh hwi, ha rag an re usi yn Laodikea, ha peub na welas ow fas vy y'n kig,

² may fons kennerthys yn aga holonn, ow pos junys war-barth yn kerensa hag y'n rychys oll a'n surheans leun a gonvedhes, rag aswonnvos a'n mysteri a Dhuw, a Grist;

³ yn neb yma kudhys pub tresor a furneth ha godhvos.

⁴ Hemma a lavarav, ma na'gas toello denvyth gans fekyl lavarow.

⁵ Rag mar nyns esov vy omma y'n korf, byttegyns y'n spyrys yth esov genowgh, ow lowenhe ha gweles aray da ha krevder agas fydh yn Krist.

Leunder Bewnans Krist

⁶ Rakhenna, dell dhegemmersowgh Krist Yesu an Arloedh, gwrewgh kerdhes ynno,

⁷ gwreydhys ha drehevys ynno, ha kennerthys y'n fydh dell dhys'sowgh, ow palshe yn grasyans.

⁸ Bedhewgh war na wrello denvyth agas kemmeres yn keth dre filosofi ha toell gwag, war-lergh hengov mab-den, war-lergh elvennow an bys, a-der war-lergh Krist;

⁹ rag ynno ev y trig pub leunder a'n Duwsys, yn korfek.

¹⁰ Ha hwi re beu kollenwys ynno neb yw penn pub prynsipata ha potestas.

¹¹ Ynno ev ynwedh y fewgh trodreghys gans trodreghyans na veu gwrys gans leuv, ow ti'ska korf an kig yn trodreghyans Krist.

¹² Ynkleudhys vewgh ganso yn besydhyans may fewgh drehevys ynwedh ganso der oberyans Duw, neb a'n drehevis dhiworth an re varow.

¹³ Ha hwi neb a veu marow yn kammweythresow ha heb trodreghyans a'gas kig, ev a wrug dhywgh bewa war-barth ganso, ow kava dhyn an kammweythresow oll,

¹⁴ ow tefendya an akont-skrif esa er agan pynn, gans y ordenansow, hag ev a'n kemmeras dhe-ves, orth y gentra orth an grows;

¹⁵ ev a dhestryppyas an prynsipatys ha'n potestatys, ha'ga gul ensampel yn apert, orth aga hembronk yn keskerdh trygh dredhi hi.

¹⁶ Ytho, na wres denvyth agas breusi a-dro dhe dhybri nag eva, nag y'n mater a dy'goel na loer nowydh na sabot,

¹⁷ hag yw skeus a daklow a dheu, mes an substans yw a Grist.

¹⁸ Na wres denvyth kemmeres dhiworthowgh agas gober, ow kovynn uvelder ha gordhyans eledh, ow teskrifa an manylyon a daklow na welas, omhwythys yn euver dre vrys y gig,

¹⁹ heb synsi an penn, a neb an korf oll, skoedhys ha junys war-barth der an giow ha'n skennys, a dyv gans tevyans Duw.

An Bewnans Nowydh yn Krist

²⁰ Mar kwrussowgh merwel gans Krist dhiworth elvennow an bys, prag yth owgh hwi gostydh dhe rewlys, kepar ha pan vewgh ow pewa y'n bys?

²¹ ‘Na wra handla, na wra tastya, na wra tochya.’

²² An re ma yw taklow oll a wra pedri pan yns i usys; yth yns i war-lergh gorhemmynnow ha dyskansow mab-den.

²³ An taklow ma dhe wir y's teves semlans furneth, gans gordhyans omgemmerys der an bolonjedh, hag uvelder, ha dyghtyans kales a'n korf, heb talvosogeth mann erbynn hwansow an korf.