Job 9 - An Bibel Kernewek 20234 (Kernewek Kemmyn)

Gorthyp Job dhe Bildad

¹ Ena Job a worthybis:

² ‘Dhe wir y hwonn y vos yndella; mes fatell yll den bos ewn a-dherag Duw?

³ Mar mynnir dadhla ganso, ev a yll govynn mil wovynn, na allsa denvyth gorthybi dhedha.

⁴ Fur yw ev y'n golonn, ha galloesek yn nerth. Piw re settyas y honan er y bynn ha seweni?

⁵ Ev a remov menydhyow, ha ny'n godhons, ha'ga domhwel yn y sorr.

⁶ Ev a shak an norvys yn-mes a'y le, ha'y golovenyow a gren.

⁷ Ev a worhemmynn dhe'n howl, ha ny dhrehav; ha gorra sel war an ster.

⁸ Ev y honan a ystynn an nevow, ha stankya war vordonnow an mor.

⁹ Ev yw Gwrier an Ors hag Orion, an Pleyades, ha chambouryow an Soth.

¹⁰ Ev a wra taklow meur dres hwithra, ha taklow marthys heb niver.

¹¹ Otta, ev a dremen rybov, ha ny'n gwelav; ev a yn-rag, mes ny'n aswonnav.

¹² Awotta, ev a gib dhe-ves; piw a yll y lettya? Piw a yll leverel dhodho, “Pandr'a wredh?”

¹³ ‘Ny wra Duw kildenna y sorr; yn-danno yth ombleg gweresoryon Rahab.

¹⁴ Fatell allav ytho dadhla ganso, ow tewis ow geryow ganso?

¹⁵ Mar pen ankablus, ny allsen y worthybi; res yw dhymm kria rag mersi dhe'm breusyas.

¹⁶ Mara'n galwen, ha mar korthyppa ev dhymm, ny gryssen y vos ow koslowes orth ow lev.

¹⁷ Rag ev a'm skwatt gans tewedh, ha lieshe ow goliow heb acheson.

¹⁸ Ny'm gas dhe gavoes ow anall, mes ev a'm lenow gans hwerowder.

¹⁹ Mars yw mater a grevder, mir ha galloesek yw ev! Mars yw mater a wirvreus, piw a yll settya termyn rag ow goslowva?

²⁰ Mar pen vy ankablus, ow ganow ow honan a'm dampensa; mar pen divlam ev a brovsa ow bos gorth.

²¹ Kynth ov divlam, ny wrav vri a'm honan; my a nagh ow bewnans.

²² Yth yw an keth tra; rakhenna y lavarav, ev dhe dhistrui ha'n den divlam, ha'n tebelwas.

²³ Pan wra an skorja ladha a-dhistowgh, ev a skorn desper an re wiryon.

²⁴ Res yn leuv an debeles yw an norvys; ev a gudh fas y vreusysi. Mar nyns yw ev, piw yw ytho?

²⁵ ‘Uskissa ages poenyer yw ow dydhyow; i a fi dhe-ves, ny welons dader mann.

²⁶ I a dremen kepar ha skathow a gors, kepar hag er ow fistena dhe'n preydh.

²⁷ Mar lavarav, “My a ankev ow krodhvol; my a forsak ow fisment trist, ha bos yn cher da”,

²⁸ my a berth own a'm duwon oll, rag my a woer na wredh ow synsi ankablus.

²⁹ My a vydh dampnys; prag y lavurav yn euver ytho?

³⁰ Mar omwolghav gans dowr erghek, ha glanhe ow diwleuv gans lisiw,

³¹ hwath ty a'm trogh yn pytt loubek, ha'm dillas ow honan a'm kas.

³² Rag nyns yw ev gour, dell ov vy, may hylliv y worthybi, may hyllyn dos war-barth erbynn y gila y'n breuslys.

³³ Unnweyth a pe breusyas yntredhon, neb a alla settya y leuv warnan agan dew!

³⁴ Kemmeres ev y lorgh dhe-ves a-dhiworthiv, ha na as agha anodho ow euthega.

³⁵ Ena my a gowssa heb own anodho. Mes lemmyn nyns yw yndella genev.