Job 7 - An Bibel Kernewek 20234 (Kernewek Kemmyn)

¹ ‘A nyns eus dhe vab-den gonis kales war an norvys, hag a nyns yw aga dhydhyow kepar ha'n dydhyow a arvethesik?

² Kepar ha kethwas neb a'n jeves hwans a skeus, ha kepar hag arvethesik a hwila y wober,

³ yndella yth yw res dhymm misyow a euveredh, ha nosow a anken yw kevrennys dhymm.

⁴ Pan wrowedhav my a lever, “P'eur hwrav vy sevel?” Mes hir yw an nos, ha leun a dreylyans dibowes bys an bora.

⁵ Gwiskys yw ow hig gans kontron ha kresten a dhoust; ow kroghen a galesha, ena pedri.

⁶ Skaffa ages gwennel gwiader yw ow dydhyow, hag i a worfenn heb govenek.

⁷ ‘Porth kov ow bewnans dhe vos anall; ny wra ow dewlagas gweles arta yn ta.

⁸ Ny wra lagas Duw neb a'm aspi ow gweles arta; dha dhewlagas a vydh warnav, mes gyllys vydhav.

⁹ Kepar dell dhifyk an gommolenn ha mos dhe-ves, yndella ny dheu neb a dhiyskynn dhe ifarn war-vann arta;

¹⁰ ny dhehwel ev arta dh'y ji, na ny'n aswonn y dyller namoy.

¹¹ ‘Rakhenna ny fronnav ow ganow; my a gews yn angoes ow spyrys; my a grodhvol yn hwerowder ow enev.

¹² Ov vy an mor, po euthvil a'n mor, may settydh goelyador warnav?

¹³ Pan lavarav, “Ow gweli a wra ow honfortya, ow growedhva a skavha ow krodhvol”,

¹⁴ ena ty a worr own ynnov gans hunrosow ha ty a'm euthyk gans gwelesigethow,

¹⁵ may tewis ow enev tag ha mernans kyns es ow horf askornek.

¹⁶ Kasadow dhymm yw ow bewnans; ny vynnav bewa bys vykken. Gas vy ow honan, rag bos ow dydhyow anall.

¹⁷ Pyth yw mab-den, ma'n moghhydh, ha may settydh dha golonn warnodho,

¹⁸ may teudh dh'y weles pub myttin, ha ma'n prevydh pub pols?

¹⁹ A ny hedhydh nevra mires orthiv, ha ny'm gesydh ow honan bys may lenkiv ow threw?

²⁰ Mar peghav, pandr'a wrav dhis, ty goelyador mab-den? Prag y'm settsys avel dha gostenn? Prag yth ov vy begh ragos?

²¹ Prag na evydh ow threuspass ha kemmeres dhe-ves ow hammweyth? Rag lemmyn my a wrowedh y'n doust; ty a'm hwila mes ny vydhav ena.’