Job 6 - An Bibel Kernewek 20234 (Kernewek Kemmyn)

Gorthyp Job dhe Elifaz

¹ Ena Job a worthybis:

² ‘Unnweyth a pe poesys ow foenvos, hag oll ow therroes settys y'n mantolyow!

³ Rag ena y fia poessa ages tewes an mor; rakhenna ow geryow re beu diswar.

⁴ Rag yma sethow an Ollgalloesek ynnov; ow spyrys a yv aga gwenon; browaghow Duw yw arayys er ow fynn.

⁵ A veg an asen gwyls pan y'n jeves gwels, po a vedhygel an ojyon a-ugh y voes?

⁶ A yll neppyth anvlasus bos dybrys heb hoelan, po eus blas yn sugen an malow?

⁷ Ow ewl boes a nagh aga thochya; yth yns kepar ha boes yw kasadow dhymm.

⁸ ‘Unnweyth a teffa ow gorholedh dhe geweras, hag unnweyth a rolla Duw dhymm ow gobaith;

⁹ may fe plegadow dhe Dhuw ow skwattya, dhe livra y leuv ha'm treghi dhe-ves!

¹⁰ Ow honfort via hemma, lemmel rag joy a wrussen yn payn dibita; rag ny neghis vy geryow an Sans.

¹¹ Pyth yw ow nerth ma'm bo govenek? Ha pyth yw ow gorfenn, may hylliv pargh?

¹² Yw ow nerth an nerth a veyn, po yw ow hig a vrons?

¹³ Nyns eus galloes ynnov dhe omweres, ha sewena yw herdhys dhiworthiv.

¹⁴ ‘Neb a skon a ri tregeredh dh'y goweth a forsak own a'n Ollgalloesek.

¹⁵ Traytus yw ow breder kepar ha gover, kepar ha goverow a dremen dhe-ves,

¹⁶ hag yw tewl gans rew, ha le mayth omgudh an ergh.

¹⁷ Yn termyn a doemmder desyghys yns; pan yw toemm gyllys yns dhiworth aga le.

¹⁸ An karavanow a dreyl dhiworth aga hyns; yth ons yn-bann dhe'n difeyth, ha mos dhe goll.

¹⁹ An karavanow a Tema a hwila dowr, an dremenysi a Sheba a vir gans govenek.

²⁰ Toellys yns rag aga bos fydhyansek; i a dheu di ha toellys yns.

²¹ Yndella yth owgh hwi dhymm lemmyn; hwi a wel ow therroes hag yma own dhywgh.

²² A leveris vy, “Rewgh dhymm ro”? Po “Dhiworth agas rychys profyewgh falswober ragov”?

²³ Po “Delivrewgh vy dhiworth leuv an eskar”? Po “Dasprenewgh vy dhiworth leuv arwaskoryon”?

²⁴ ‘Dyskewgh dhymm ha tawel vydhav; gwrewgh dhymm konvedhes fatell gammwrug vy.

²⁵ Ass yw geryow onest galloesek! Mes agas keredh – pandr'a geredh?

²⁶ A dybowgh y hyllowgh keredhi ow geryow, ha bos kows den yn desper kepar ha gwyns?

²⁷ Hwi a wrussewgh tewlel prenn war an omdhivas hogen, ha kesvargenya rag agas koweth.

²⁸ ‘Mes lemmyn, bedhes plegadow dhis mires orthiv; ny wrav vy gowleverel sur dh'agas fas.

²⁹ Treylyewgh, my a'gas pys, na vedhes kammhynseth gwrys. Dasprederewgh lemmyn, mater a'm glander yw.

³⁰ Eus kammhynseth war ow thaves? A ny yll ow stevnik dissernya terroes?