Job 42 - An Bibel Kernewek 20234 (Kernewek Kemmyn)

Job

¹ Ena Job a worthybis dhe'n Arloedh:

² ‘My a woer y hyllydh gul pup-tra, ha ny yll towl ahanas bos lestys.

³ “Piw yw hemma, neb a gudh kusul heb godhvos?” Yn sur my a gewsis a daklow na gonvedhis, taklow re vryntin ragov dh'aga godhvos.

⁴ “Klew, my a'th pys, ha my a gews; my a wovynn orthis ha ty a worthyp.”

⁵ My re glewsa ahanas dre glewans an skovarn, mes lemmyn ow dewlagas re'th welas;

⁶ rakhenna my a'm kas ow honan, ha koedha yn edrek yn doust ha lusu.’

Pennlavar

⁷ Wosa an Arloedh dhe leverel an taklow ma dhe Job ev a leveris dhe Elifaz an Temanyas: ‘Ow sorr re dhewis er dha bynn hag erbynn dha dhew goweth, drefenn na gewssowgh ahanav an pyth yw ewn, kepar dell wrug ow gwas Job.

⁸ Rakhenna kemmerewgh lemmyn dhywgh seyth tarow ha seyth hordh ha mos dhe'm gwas Job hag offrynna ragowgh offrynn leskys, ha'm gwas Job a bys ragowgh ha my a dhegemmer y bysadow, ha ny'gas dyghtyav herwydh agas follenep; rag ny gewssowgh ahanav an pyth yw ewn, kepar dell wrug ow gwas Job.’

⁹ Elifaz an Temanyas ha Bildad an Shuhyas ha Sofar an Naamathyas eth ha gul herwydh an pyth a worhemmynnis an Arloedh dhedha; ha'n Arloedh a dhegemmeras pysadow Job.

Rychys Job Asverys

¹⁰ Wosa Job dhe bysi rag y gowetha, an Arloedh a restoryas feus Job hag a ros dhodho diwweyth moy ages dell esa dhodho kyns.

¹¹ Oll y vreder hag oll y hwerydh a dheuth dhodho ha pubonan re'n aswonnsa kyns ha dybri ganso yn y ji. I a'n konfortyas ha keskodhevel ganso a-dro dhe oll an trobel re dhrosa an Arloedh dhodho, ha pubonan a ros dhodho bath a vona ha bysow a owr.

¹² An Arloedh a vennigas an rann dhiwedhes a vewnans Job moy ages an kynsa. Yth esa dhodho peswardhek mil dhavas, hwegh mil gowrvargh, mil yew a oghen, ha mil asen.

¹³ Hag yth esa seyth mab ha teyr myrgh dhodho.

¹⁴ Ev a henwis an kynsa myrgh Yemima, an nessa Kesia ha'n tressa Keren-happuk.

¹⁵ Y'n wlas oll nyns o benynes kevys mar deg avel myrghes Job, ha'ga thas a ros dhedha eretons war-barth gans aga breder keffrys.

¹⁶ Wosa hemma Job a vewa seyth-ugens blydhen; hag ev a welas y vebyon ha mebyon y vebyon bys y'n peswora henedh.

¹⁷ Ha Job a verwis, koth ha leun a dhydhyow.