Job 41 - An Bibel Kernewek 20234 (Kernewek Kemmyn)

¹ ‘A yllydh tenna Lawethan yn-mes gans higenn-bysk, po kelmi y daves yn-nans gans lovan?

² A yllydh gorra lovan der y droen, po gwana y awen gans korsenn?

³ A wra ev lies aspysadow dhis? A gews ev orthis gans geryow medhel?

⁴ A wra ev kevambos genes ma'n kemmerydh avel gwas bys vykken?

⁵ A wredh gwari ganso kepar ha gans edhen, po y leshya rag dha vaghtethyon?

⁶ A wra gwikoryon bargenya ragdho? A wrons y ranna ynter an varchons?

⁷ A yllydh lenwel y groghen a vorwuwow, po y benn a wuwow pyskessa?

⁸ Mar settydh dalghenn ynno preder orth an gas; ny'n gwredh nevra arta!

⁹ ‘Neb a'n jeves govenek a'y gachya yw toellys; yth yw tewlys dhe'n dor orth an gwel anodho hogen.

¹⁰ Nyns yw denvyth fell lowr rag y dhifuna. Ytho piw a yll sevel a-dheragov?

¹¹ Piw a yll omsettya orthiv ma'th attylliv dhodho? Denvyth yn-dann an nev oll.

¹² ‘Ny dawav a-dro dh'y eseli, na'y grevder meur na'y furv gader.

¹³ Piw a yll pilya y dhillas a-ves? Piw a yll dewana y gaspows dhewblek?

¹⁴ Piw a yll igeri darasow y fas? Euthyk yw y dhyns oll a-dro.

¹⁵ Rewyow a skoesow yw y geyn, deges klos war-barth kepar ha gans sel.

¹⁶ Yma an eyl mar ogas dh'y gila ma na yll ayr tremena yntredha.

¹⁷ Junys yns an eyl dh'y gila; i a gesklen ma na yllir aga ranna.

¹⁸ Y striwyow a skatter golow. Kepar ha kreghyn lagas an bora yw y dhewlagas.

¹⁹ Faglennow ow leski a fros dhiworth y anow; ha gwrygh a dan a lamm yn-mes.

²⁰ Mog a dheu dhiworth y dhewfrik, kepar ha dhiworth chek war gors ow leski.

²¹ Y anall a enow glowennow, ha flammow a deu yn-mes dhiworth y anow.

²² Yma krevder trigys yn y gonna, ha donsya a wra desper a-dheragdho.

²³ Junys war-barth yn tynn yw krisyow y gig; fast yns hag anwayadow.

²⁴ ‘Mar gales avel men yw y golonn, mar gales avel men-melin a-is.

²⁵ Pan sev ev, ownek yw an duwow; i a gildenn rag own.

²⁶ Ny amont an kledha a dhrehedh dhodho, na'n guw, na'n sethik, na'n pil.

²⁷ Ev a dhyght horn kepar ha kala', ha brons kepar ha prenn poder.

²⁸ Ny wra sethow dhodho fia; kepar ha kulyn yw meyn-dowlbrenn.

²⁹ Fustow yw reknys avel kulyn ragdho; ev a hwerth orth an lons ow kryghylli.

³⁰ ‘Kepar ha darn a briweyth yw y rannow a-is, ow kasa ol y'n leys kepar ha draylell-dhrushya.

³¹ Ev a wra dhe'n downder bryjyon kepar ha pott; ha'n mor kepar ha pott a eli.

³² War y lergh ev a as ol a wolow; y hyllir krysi bos blew loes dhe'n downder.

³³ Travyth war an dor yw y bar, kreatur heb own.

³⁴ Ev a vir yn-nans war bup-tra yw howtyn; myghtern oll an bestes goethus yw.’