Job 40 - An Bibel Kernewek 20234 (Kernewek Kemmyn)

¹ An Arloedh a worthybis dhe Job ow leverel:

² ‘A yll den kavyllek strivya gans an Ollgalloesek? Neb a dhadhel gans Duw, gorthybes ev dhodho.’

Gorthyp Job

³ Ena Job a worthybis dhe'n Arloedh:

⁴ ‘Otta, distyr ov vi; fatell allav gorthybi dhis? My a gudh ow ganow gans ow leuv.

⁵ My re gewsis unnweyth, ha ny worthybav; diwweyth, mes ny lavarav moy.’

Diskwedhyans Nerth Duw

⁶ Ena an Arloedh a gewsis orth Job dhiworth an korwyns:

⁷ ‘Grogys dha dhiwglun kepar ha gour; my a wovynn orthis ha ty a dhiskler dhymm.

⁸ A vynnydh diswul ow breus? A vynnydh ow dampnya rag ty dhe vos ewnhes?

⁹ Eus bregh dhis kepar ha bregh Duw, a yll dha lev tarenna kepar ha'y lev ev?

¹⁰ ‘Omdekha yn glori ha splannder; omwisk yn enor ha meuredh.

¹¹ Dilesh tardhow dha sorr mir orth pub den goethus, ha'y uvelhe.

¹² Mir orth peub yw goethus, ha'y iselhe; ha stankya war an debeles ple'mons ow sevel.

¹³ Kudh i y'n doust war-barth; kolm aga fasow y'n bedh.

¹⁴ Ena my a aswonn dha leuv dhyghow dhe ri dhis budhogoleth.

¹⁵ ‘Mir orth Behemoth, a greatis dell y'th kreatis jy; ev a dheber gwels kepar hag ojyon.

¹⁶ Yma y grevder yn y dhiwglun, ha'y nerth yn begel y dorr.

¹⁷ Diwedhyn kepar ha kederwydh yw y lost; giow y dhiwvordhos yw maylys war-barth yn fast.

¹⁸ Pibennow a vrons yw y eskern, kepar ha gwelynni a horn yw y eseli.

¹⁹ ‘Ev yw an kynsa yn mysk oberow Duw – ny yll marnas y Wrier y ladha.

²⁰ An menydhyow a dhre boes ragdho, le may hwari oll an bestes gwyls.

²¹ Ev a wrowedh yn-dann an alow dowr, kudhys yn mysk an kors y'n wernek.

²² An alow dowr a'n kudh yn aga skeus; helyk an gover a'n kyrghynn.

²³ Pan vo an avon ow liva, nyns eus own dhodho; attes yw ev hwath pan herdh Yordan erbynn y anow.

²⁴ A yllir y sesya der an dhewlagas, po maglenna y droen gans antell?