Job 4 - An Bibel Kernewek 20234 (Kernewek Kemmyn)

Kynsa Areth Elifaz

¹ Ena Elifaz an Temanyas a worthybis:

² ‘Mar pedhav kewsel orthis, a vydhydh sklandrys? Mes piw a yll omwitha rag kewsel?

³ Otta, ty re dhyskas lies den; ha ty re grevhas an dhiwla ydhil.

⁴ Dha eryow re dhrehevis an den esa ow trebuchya, ha ty re fastyas an dhewlin dhifreth.

⁵ Mes lemmyn ev re dheuth dhis, ha heb perthyans os; ev a'th toch, ha penndegys os.

⁶ A nyns yw dha own a Dhuw dha fydhyans, ha glander dha fordhow dha wovenek?

⁷ ‘Preder lemmyn, piw hag o ankablus a verwis bythkweth? Po ple feu an dus ewnhynsek treghys dhe-ves?

⁸ Dell welis, an re a ar anewnder ha hasa trobel a wra aga mysi.

⁹ Gans anall Duw yth ons dhe goll, ha gans hwyth y sorr yth yns devorys.

¹⁰ Usa an lew, lev an lew goedh, dyns an lewyon yowynk, yw terrys.

¹¹ An lew krev a dhe goll rag fowt a breydh, ha kelyn an lewes yw skattrys.

¹² ‘Lemmyn ger a veu dres dhymm yn-dann gel, ow skovarn a dhegemmeras an hwystrenn anodho.

¹³ Yn mysk prederow anes dhiworth gwelesigethow an nos, pan goedh kosk down war dus,

¹⁴ y teuth agha warnav, ha degrena, hag a wrug dhe'm eskern krena.

¹⁵ Ena spyrys a dremenas a-dherag ow fas; gols ow hig a sevis.

¹⁶ An spyrys a sevis stag, mes ny yllyn dissernya y semlans. Yth esa furv a-dherag ow dewlagas; yth esa taw, ena my a glewas lev:

¹⁷ “A yll mab-den bos moy gwiryon es Duw? A yll gour bos purra es y Wrier?

¹⁸ Hwath yn y servysi ny worr ev fydh mann, ha'y eledh ev a guhudh a follneth;

¹⁹ kemmys moy an re usi trigys yn chiow a bri, hag yma aga sel y'n doust, neb yw skwattys maga uskis avel goedhan.

²⁰ Yntra myttin ha gorthugher distruys yns; i a verow bys vykken heb denvyth ow kul vri.

²¹ A nyns yw kordenn aga thylda tennys yn-bann? I a verow, ha heb furneth.”