Job 35 - An Bibel Kernewek 20234 (Kernewek Kemmyn)

Tressa Areth Elihu

¹ Ena Elihu a leveris:

² ‘A brederydh bos hemma ewn? Ty a lever, “Ankablus ov a-dherag Duw.”

³ Mar kovynnydh orto, “Py les eus dhymm, ha pandr'a waynyav mar ny beghav?”

⁴ my a worthyp dhis ha dhe'th kowetha usi genes.

⁵ Mir war-vann orth an nevow ha gwel; aspi orth an kommol yw ughella agesos.

⁶ Mar peghsys, pandr'a wredh er y bynn? Mars yw lies dha gammweythresow, pandr'a wra henna dhodho?

⁷ Mars os gwiryon, pandr'a redh dhodho; po pandr'a dhegemmer ev dhiworth dha leuv?

⁸ Ny wra dha sherewynsi tochya marnas gour kepar ha ty, ha ny doch dha ewnder marnas mebyon tus.

⁹ ‘Tus a gri drefenn an lies arwask; i a gri rag gweres drefenn bregh an alloesogyon.

¹⁰ Mes ny lever denvyth, “Ple'ma Duw, ow Gwrier, neb a re kanow y'n nos,

¹¹ neb a dhysk dhyn moy ages bestes an norvys, ha gul dhyn bos furra ages an ydhyn y'n ayr?”

¹² I a gri, mes ny worthyp ev, drefenn goeth drogoberoryon.

¹³ Yn sur ny glew Duw kri gwag, ny wra an Ollgalloesek vri anodho.

¹⁴ Pyseul dhe le, ytho, y hwoslow pan leverydh na yllydh y weles, bos an ken dheragdho ha ty dhe vos orth y wortos.

¹⁵ Ha lemmyn drefenn na wra y sorr kessydhya ha ny wra ev vri a follneth,

¹⁶ Job a iger y anow gans kows gwag ha heb godhvos ev a liesha geryow.’