Job 32 - An Bibel Kernewek 20234 (Kernewek Kemmyn)

Kynsa Areth Elihu

¹ Ytho an tri gour ma a astelas gorthybi, drefenn y vos gwiryon yn y dhewlagas y honan.

² Mes Elihu mab Barakel an Buzyas a deylu Ram eth ha bos pur serrys drefenn Job dhe justifia y honan moy es Duw.

³ Serrys o ynwedh orth an tri howeth drefenn na gavsens gorthyp, mes spit dhe henna i a leveris bos Job kamm.

⁴ Lemmyn Elihu re wortsa kyns kewsel drefenn aga bos kottha agesso.

⁵ Mes pan welas nag esa gorthyp yn aga ganow y sorr a dhewis.

⁶ Elihu mab Barakel an Buzyas a worthybis: ‘Yowynk ov yn blydhynyow, ha koth owgh hwi; rakhenna yth esa own dhymm, ha ny vedhis diskwedhes dhywgh ow brys.

⁷ Yn-medhav, “Dydhyow a dal kewsel, ha niver bras a vlydhynyow a dal dyski furneth.”

⁸ Mes yth yw spyrys yn mab-den, anall an Ollgalloesek, a re dhodho furneth.

⁹ Nyns yw an dus veur hag yw fur, na nyns yw an dus koth hag a gonvedh gwirvreus.

¹⁰ Rakhenna my a lever, “Goslowewgh orthiv; My ynwedh a dhiskler dhywgh ow brys.”

¹¹ ‘Otta, my a wortas agas geryow, my a woslowas orth agas resna, ha hwi ow hwilas geryow.

¹² My a wrug vri ahanowgh, mes nyns esa nagonan a gonkludyas Job, ny worthybis denvyth ahanowgh dh'y eryow.

¹³ Na leverewgh, “Ni re gavas furneth; Duw a'n feth, a-der den.”

¹⁴ Ny gewsis y eryow er ow fynn vy, ha ny worthybav dhodho gans agas arethyow.

¹⁵ ‘Penndegys yns, ha ny worthybons na fella; i a astelas kewsel.

¹⁶ Eus edhomm my dhe wortos, rag ny gewsons, rag i dhe sevel ena, ha ny worthybons na fella.

¹⁷ My ynwedh a worthyp ow rann; my ynwedh a dhiskler dhywgh ow brys.

¹⁸ Rag leun ov a eryow; an spyrys ynnov a'm konstryn.

¹⁹ Kepar ha gwin heb tardhell yw ow thorr; parys dhe dardha kepar ha botellow nowydh.

²⁰ Res yw dhymm kewsel may kyffiv difres; my a iger an dhiwweus ha gorthybi.

²¹ Ny dhiskwedhav favour dhe dhenvyth na ny rov hanow a enor dhe dhenvyth.

²² Ny wonn fatell rov henwyn a enor – poken ow Gwrier a'm kemmersa dhe-ves yn skon.