Job 30 - An Bibel Kernewek 20234 (Kernewek Kemmyn)

¹ ‘Mes lemmyn i a'm skorn, tus yowynka agesov, may skornsen gorra aga thasow gans keun ow flokk.

² Py gwayn a veu krevder diwla aga thasow dhymm, tus may feu gyllys aga nerth?

³ Gwann der edhomm ha nown i a gni an tir sygh ha difeyth,

⁴ i a guntell malow ryb an prysk, ha gwreydh banadhel yw aga boes.

⁵ Herdhys dhiworth tus yns; tus a arm orta kepar dell yns ladron.

⁶ Res yw dhedha triga yn nansow an keynresyow, yn tell a'n dor ha'n karregi.

⁷ Begi a wrons yn mysk an prysk; hag omguntell yn-dann an linas.

⁸ Mebyon goeg ha vil, i re beu tewlys yn-mes a'n tir.

⁹ ‘Ha lemmyn i a wra ges ahanav gans kanow; ger ges ov dhedha.

¹⁰ I a'm aborr, i a ombellha dhiworthiv; ha ny skonyons trewa orth ow fas.

¹¹ Drefenn Duw dhe lewsel ow hordenn ha'm uvelhe, i a dewl fronn a-denewen ha my ena.

¹² A'n barth dhyghow dhymm an routh a sev; i a'm herdh yn-rag, hag i a grug aga gweythyow-esedhva er ow fynn.

¹³ I a dhiswra ow hyns; i a sewen orth ow distrui heb edhomm a weres.

¹⁴ I a dheu yn-rag kepar ha der aswa ledan; yn mysk an radellow i a rol a-bervedh.

¹⁵ Browaghow yw treylys warnav; ow dynita yw chasyes dhe-ves kepar ha gans an gwyns, ha'm govenek a selwyans a dremen kepar ha kommolenn.

¹⁶ ‘Ha lemmyn ow enev a dhever dhe-ves; dydhyow a alar re'm synsis.

¹⁷ Y'n nos ow eskern yw gwenys a-ji dhymm, ha ny bowes an payn a'm kni.

¹⁸ Ev a ses ow dillas gans freudh; ev a'm kelm er konna ow mantell.

¹⁹ Duw re'm tewlis y'n leys, ha my res eth ha bos kepar ha doust ha lusu.

²⁰ My a gri dhis rag gweres, mes ny worthybydh orthiv; my a sev, ha ny wredh vri ahanav.

²¹ Ty re dreylyas yn fell er ow fynn; gans krevder dha leuv ty a omsett er ow fynn.

²² Ty a'm drehav yn-bann gans an gwyns, ha'm tewlel a-dro y'n tewedh.

²³ My a woer ty dhe'm dri dhe'n mernans, ha dhe'n chi apoyntys rag pub den bew.

²⁴ ‘Yn sur denvyth ny ystynn y leuv erbynn den trogh pan gri rag gweres yn y anken.

²⁵ A ny oelis a-barth an den anfeusik? A ny veu ow enev trist rag an boghosek?

²⁶ Mes pan feu dhymm govenek a dader, drog a dheuth; pan waytis golow, tewlder a dheuth.

²⁷ Bryjyon a wra ow holodhyon heb powes; dydhyow a alar a dheu er ow fynn.

²⁸ Yth av a-dro duhes, a-der gans an howl; my a sev y'n guntellva ha kria rag gweres.

²⁹ Broder ov a owrgeun, ha keskoweth a strusyow.

³⁰ Ow kroghen a dhuha warnav, ha'm eskern a lesk gans fevyr.

³¹ Treylys dhe gyni yw ow sowtri, ha'm pib dhe lev an re a oel.