Job 21 - An Bibel Kernewek 20234 (Kernewek Kemmyn)

Gorthyp Job dhe Sofar

¹ Mes Job a worthybis:

² ‘Goslowewgh gans rach orth ow geryow, ha re bo hemma agas solas a rowgh dhymm.

³ Suffrewgh my dhe gewsel; ha wosa my dhe gewsel hwi a yll ow skornya.

⁴ ‘Ha my, yw ow krodhvol war dhen? Prag na via troblys ow spyrys?

⁵ Mirewgh orthiv ha bedhewgh skruthys, ha gorrewgh agas leuv war agas ganow.

⁶ Pan borthav kov a hemma, euthegys ov, ha kren a ses ow hig.

⁷ ‘Prag y few an dhrogoberoryon, ow mos ha bos koth hag ow kressya aga galloes?

⁸ Fastys yw aga has a-dro dhedha, ha'ga askorr a-rag aga dewlagas.

⁹ Diagha yw aga chiow, ha nyns usi gwelenn Duw warnedha.

¹⁰ Aga tharow a dhineyth heb falladow; gans leughi yw aga bughes, ha ny gammdhegons.

¹¹ I a dhannvon aga meppigow yn-rag kepar ha flokk, ha'ga fleghes a derlemm.

¹² I a gemmer an tabourik ha'n sowtri, ha lowenhe orth son an bib.

¹³ I a spen aga dydhyow yn dader, hag yn unn pols diyskynna dhe ifarn.

¹⁴ I a lever dhe Dhuw, “Diberth dhiworthyn! Nyns eus hwans dhyn a wodhvos a'th fordhow.

¹⁵ Pyth yw an Ollgalloesek may koedh dhyn y servya? ha py budh a vydh dhyn mar pysyn dhodho?”

¹⁶ Mes nyns usi aga dader yn aga leuv aga honan. Yma kusul an dhrogoberoryon pell a-dhiworthiv.

¹⁷ ‘Peskweyth yth yw lugarn an dhrogoberoryon difeudhys? ha peskweyth y teu aga therroes warnedha, an tenkys a lesrann Duw yn y sorr?

¹⁸ Peskweyth yth yns kepar ha kala' a-rag an gwyns, ha kepar ha kulyn degys dhe-ves gans an tewedh?

¹⁹ Yn-medhowgh, “Duw a greun kessydhyans anewnder den rag y vebyon”. Nansi, re bo attylys dhodho y honan, ma'n aswonno.

²⁰ Re wello aga dewlagas aga distruyans, ha re effons sorr an Ollgalloesek.

²¹ Rag py bern eus dhodho a-dro dh'y deylu gesys war y lergh, pan vydh treghys dhe-ves niver y visyow?

²² ‘Eus nebonan a yll dyski skentoleth dhe Dhuw, a-ban vreus ev an ughella tus?

²³ An eyl a verow leun y sewena, attes ha kosel yn tien.

²⁴ Leun a vlonek yw y gorf ha gwlygh yw mer y eskern.

²⁵ Y gila a verow hwerow y enev, heb tastya bythkweth travyth da.

²⁶ I a wrowedh war-barth y'n doust, ha'n kontron a wra aga hudha.

²⁷ ‘Otta, my a woer agas prederow, ha'gas towlow dhe wul kamm er ow fynn.

²⁸ Rag hwi a lever, “Ple'ma chi an pennsevik lemmyn? Ha ple'ma an tyldow mayth esa an dhrogoberoryon trigys?”

²⁹ A ny wovynnsowgh orth tremenysi an fordhow? A ny wrussowgh vri a'ga dustuni

³⁰ bos an drogober gwithys dhiworth dydh an distruyans, ha bos delivrys dhiworth dydh an konnar?

³¹ Piw a guhudh y fara dh'y fas? Piw a'n attal rag an pyth re wrug?

³² Degys dhe'n gorflann yw, ha tus a woel war y logel.

³³ An gweres y'n nans yw hweg dhodho; ha pub den oll a'n siw, ha bush diniver a a-dheragdho.

³⁴ Fatell yllowgh ow honfortya ytho gans geryow koeg? Nyns eus travyth gesys marnas frows yn agas gorthybow.’