Job 16 - An Bibel Kernewek 20234 (Kernewek Kemmyn)

Gorthyp Job dhe Elifaz

¹ Ena Job a worthybis:

² ‘My re glewas lies tra a'n par na; konforters ow ri dhymm ahwer owgh hwi oll:

³ “A vydh diwedh dhe'th eryow gwynsek?” po “Pyth a wra dhis mar hardh ow tadhla?”

⁴ My ynwedh a allsa kewsel kepar dell wrewgh, mar pewgh y'm tyller vy. My a allsa junya geryow war-barth er agas pynn, ha shakya ow fenn orthowgh.

⁵ Mes na, my a wrussa agas kennertha gans ow ganow, ha gwayans ow diwweus a wrussa siwajya agas duwon.

⁶ ‘Mar kowsav, nyns yw ow duwon siwajys: ha mar tawav, a gavav difres?

⁷ Mes lemmyn Duw re wrug dhymm bos skwith; ev re dhistruis oll ow mayni.

⁸ Ev re wrug dhymm gwedhra, ha henna yw dustuni er ow fynn; ow gwannegredh a sev yn-bann er ow fynn ha henna a re dustuni dhe'm fas.

⁹ Ev re'm skwardyas yn y sorr ha'm kasa; ev a dheskern y dhyns er ow fynn; ow eskar a lymm y dhewlagas warnav.

¹⁰ Tus re lagattas orthiv, igerys aga ganow; i re'm gweskis orth ow bogh yn unn skornya; i re omguntellas war-barth er ow fynn.

¹¹ Duw re'm delivras dhe'n den didhuw, ha'm ri yn diwla an debeles.

¹² Attes en vy, mes ev a'm brewis; ev a'm sesyas er kil ow honna, ha'm shakya dhe demmigow. Ev a'm settyas yn-bann avel y gostenn,

¹³ ha'y sethoryon a'm kyrghynn. Ev a wan ow diwloneth yn tibita, ha diveri ow bystel war an dor.

¹⁴ Ev a wrug aswa wosa aswa ynnov; ev a boen er ow fynn kepar ha kasor.

¹⁵ ‘My re wias yskar war ow kroghen, ha gorra ow horn y'n doust.

¹⁶ Rudhys yw ow fas drefenn oela, hag yma tewlder down war groghen ow dewlagas,

¹⁷ nyns eus freudh yn ow diwleuv, ha pur yw ow fysadow.

¹⁸ ‘A dhor, na gorher ow goes; ha na geves ow kri powesva.

¹⁹ Ha lemmyn, otta, yma ow dustunier y'n nev, hag yma ow thest y'n ughelder.

²⁰ Ow howetha a'm skorn; ow lagas a dhinew dagrow dhe Dhuw.

²¹ Unnweyth a pe neb a blettya rag gour gans Duw, kepar dell bled mab-den rag y gentrevek!

²² Rag wosa nebes blydhynyow dhe dhos, yth av war an hyns ma na dhehwelav dhiworto.