Job 14 - An Bibel Kernewek 20234 (Kernewek Kemmyn)

¹ ‘Mab-den, genys a venyn, yw kott y dhydhyow, ha leun a anken.

² Ev a dyv yn-bann kepar ha bleujenn hag a wedher, ev a fi kepar ha skeus, ha ny worta.

³ A igerydh dha dhewlagas war onan a'n par ma, ha'y dhri dhe vos breusys genes?

⁴ Piw a yll dri neppyth glan dhiworth neppyth mostys? Denvyth.

⁵ Y dhydhyow yw ervirys, yma niver y visyow godhvedhys genes, ty re apoyntyas y finwethow na yll ev tremena dresta;

⁶ ytho mir dhe-ves dhiworto ha'y asa yn kres, bys pan worfenno y dhydh avel gwas arvethys.

⁷ ‘Rag yma govenek dhe wydhenn: mars yw treghys dhe'n dor, hi a skyll arta, ha ny fyll hy eginyow.

⁸ Kyn kothha hy gwreydhenn y'n dor, ha'y hyf a verow y'n gweres,

⁹ hwath der an ethenn a dhowr hi a vleujyow ha dyllo eginyow kepar ha plans yowynk.

¹⁰ Mes gour a verow ha difygya; dhe wir, den a anell y dhiwettha anall ha ple'ma ev?

¹¹ Kepar dell fyll dowr dhiworth lynn, po avon a leha ha sygha,

¹² yndella y hwrowedh gour ha ny sev; bys pan nag eus nev na fella, ny dhifunons, na ny dhons yn-mes a'ga hosk.

¹³ Unnweyth a kwrelles ow kudha yn ifarn, ow heles erna vo dha sorr tremenys, apoyntya termyn ragov ha perthi kov ahanav!

¹⁴ Mar merow gour a wra ev bewa arta? Oll an dydhyow a'm servis my a worta bys pan dheffo ow thorn.

¹⁵ Ty a elow ha my a worthyp dhis; y fydh hwans dhis a weyth dha dhiwleuv.

¹⁶ Saw lemmyn ty a niver ow hammow, ow kwitha war ow fegh.

¹⁷ Selys yn sagh yw ow threuspass, ha ty a gudh ow hammweythres.

¹⁸ ‘Mes kepar dell wra menydh koedha, ha'n radell yw skubys dhe-ves, ha dell yw karrek removys yn-mes a'y le;

¹⁹ dell wra dowr esknias an meyn, ha kowasow a skub dhe-ves doust an dor, yndella ty a dhistru govenek den.

²⁰ Ty a warthev warnodho bys vykken, hag ev a dremen; ty a janj y fas ha'y dhannvon dhe-ves.

²¹ Enorys yw y vebyon ha ny'n goer ev; iselhes yns, ha ny'n gwel.

²² Ny'n jeves payn saw rag y gorf y honan, ha ny wra kyni saw rag y enev y honan.’