Job 12 - An Bibel Kernewek 20234 (Kernewek Kemmyn)

Gorthyp Job dhe Sofar

¹ Ena Job a worthybis:

² ‘Hwi yw an bobel, heb mar, ha furneth a verow genowgh.

³ Mes yma konvedhes dhymm keffrys ha dhywgh hwi; nyns ov isella agesowgh. Piw eus na woer traow kepar ha'n re ma?

⁴ Skornys ov gans ow howetha; kyn helwis war Dhuw hag ev a worthybis, den skornys ov, ewn ha divlam.

⁵ Tus yw attes a dhispres anfeus, mes parys yw hi rag tus may hwra aga dewdroes trebuchya.

⁶ Yn kres yw tyldow ladron, hag yn sawder yw an re a brovok Duw, neb a dhre aga duw yn aga leuv.

⁷ ‘Mes govynn orth an bestes, hag i a dhysk dhis; ydhyn an ayr, hag i a lever dhis;

⁸ po kows dhe'n norvys, hag ev a dhysk dhis, ha puskes an mor a dhiskler dhis.

⁹ Piw eus yn mysk oll re ma na woer leuv Duw dhe wul hemma?

¹⁰ Yma yn y leuv bewnans pup-tra a vew hag anall densys oll.

¹¹ A ny wra an skovarn assaya geryow kepar dell wra an stevnik blasa boes?

¹² Yma furneth gans an dus koth, ha konvedhes yn hirder dydhyow.

¹³ ‘Yma furneth ha galloes gans Duw, yma dhodho kusul ha konvedhes.

¹⁴ Mar tewl ev dhe'n dor, ny yll denvyth dastrehevel; mar tege ev gour a-bervedh, ny yllir igeri.

¹⁵ Mar skon ev an dowrow, i a sygh; mar kwra ev aga dyllo, i a fenn an tir.

¹⁶ Ganso yma nerth ha doethter; dhodho yma an den toellys ha'n den a doell.

¹⁷ Ev a led konseloryon dhe-ves dieskis, hag ev a wra dhe vuskogyon bos breusysi.

¹⁸ Ev a lews kargharow myghternedh, ha kelmi kyngel a-dro dh'aga diwglun.

¹⁹ Ev a led oferysi dhe-ves dieskis, ha domhwel an re alloesek.

²⁰ Ev a dhege diwweus an re yw trestys, ha kemmeres dhe-ves skians an henavogyon.

²¹ Ev a dhinwa bismer war bennsevigyon, ha lewsel grogys an re yw krev.

²² Ev a dhiskudh an downderyow yn-mes a dewlder, ha dri tewlder down dhe wolow.

²³ Ev a wra dhe genedhlow bos meur, hag ev a's distru; ev a voghha kenedhlow, ha'ga ledya dhe-ves.

²⁴ Ev a gemmer dhe-ves konvedhes dhiworth rewloryon pobel an tir, ha gul dhedha gwandra yn difeyth heb fordh.

²⁵ I a balval y'n tewlder heb golow; hag ev a wra dhedha trebuchya kepar ha den medhow.