Job 11 - An Bibel Kernewek 20234 (Kernewek Kemmyn)

Kynsa Areth Sofar

¹ Ena Sofar an Naamathyas a worthybis:

² ‘A dal an niver bras ma a eryow bos heb gorthyp, ha gour leun a gows bos justifiys?

³ A dal dha glapp gul tus dhe dewel, ha pan skornydh, a ny wra denvyth dha shamya?

⁴ Rag ty a lever, “Pur yw ow dyskas, ha glan ov yn dewlagas Duw.”

⁵ Mes unnweyth a mynna Duw kewsel, hag igeri y dhiwweus dhis,

⁶ ha diskwedhes dhis an kevrinyow a furneth! Rag liesplek yw y dhoethter! Godhvydh ytho Duw dhe jalenjya ahanas le ages dell dhervynn dha gammweyth.

⁷ ‘A yllydh hwithra an taklow down a Dhuw? A yllydh diskudha finweth an Ollgalloesek?

⁸ Ughella yw ages nev – pandr'a yllydh y wul? Downa ages ifarn – pandr'a yllydh y wodhvos?

⁹ Hirra ages an norvys yw y vusur, ha ledanna ages an mor.

¹⁰ Mar tremen ev, ha prisonya, ha gelwel dhe vreus, piw a yll y lettya?

¹¹ Rag ev a aswonn tus koeg; pan wel ev anwiryonedh, a ny wra ev prederi a-dro dhodho?

¹² Mes gour gokki a gyv konvedhes, pan yw ebel asen gwyls dineythys avel den!

¹³ ‘Mar pareusydh dha golonn, hag ystynn dha leuv trohag ev,

¹⁴ mar korrydh pell dhe-ves an anewnder usi y'th leuv, ha na esydh kammhynseth dhe driga y'th tyldow,

¹⁵ ena ty a dhrehav dha fas heb namm; ty a fydh fyrv, ha ny vydh own dhis.

¹⁶ Ty a ankev dha anken; ty a berth kov anodho kepar ha dowrow re dremenas.

¹⁷ Dha vewnans a vydh dergha ages howl an hanter-dydh; y dewlder a vydh kepar ha'n myttin.

¹⁸ Ty a' fydh diogeledh, rag yma govenek; ty a vydh gwithys, ha ty a bowes yn sawder.

¹⁹ Ty a wrowedh, ha denvyth ny worr own ynnos; lies den a hwila dha favour.

²⁰ Mes dewlagas an debeles a fyll; ha ny vydh fordh dhe dhiank ragdha, ha'ga govenek a vydh anella aga anall dhiwettha.’