Job 1 - An Bibel Kernewek 20234 (Kernewek Kemmyn)

Raglavar

¹ Yth esa gour yn bro Us, Job y hanow, ha perfydh hag ewnhynsek o an gour na, hag yth esa dhodho own a Dhuw hag ev a dreylyas dhiworth drog.

² Y feu genys dhodho seyth mab ha teyr myrgh.

³ Ev a'n jevo seyth mil dhavas, tri mil gowrvargh, pymp kans kopel a oghen, ha pymp kans asen benow ha palster a servysi, mayth o an gour ma an brassa yn mysk oll tus an Est.

⁴ Y vebyon e ha synsi kevewi yn chi pub huni anedha yn y jydh, hag i a dhannvona ha gelwel aga theyr hwoer dhe dhybri ha dhe eva gansa.

⁵ Ha pan dho kylgh an kevewi dhe benn, Job a dhannvona ha'ga sakra, hag ev a sevi myttin a-varr hag offra offrynnow leskys herwydh an niver anedha oll, rag Job a leveri, ‘Martesen ow mebyon re beghas ha milliga Duw yn aga holonn.’ Yndella y hwre Job prest.

Kynsa Prevyans Job

⁶ Yth esa dydh pan dheuth mebyon Duw dhe sevel a-dherag an Arloedh, ha Satnas a dheuth yn aga mysk ynwedh.

⁷ An Arloedh a leveris dhe Satnas, ‘A-ble osta devedhys?’ Satnas a worthybis dhe'n Arloedh, ‘A-dhiworth gwandra omma hag ena war an norvys, hag a-dhiworth kerdhes a-dro warnodho.’

⁸ An Arloedh a leveris dhe Satnas, ‘A bredersys a-dro dhe'm gwas Job? Nyns eus denvyth kepar hag ev war an norvys, gour divlam hag ewnhynsek, ow perthi own a Dhuw hag ow treylya dhiworth drog?’

⁹ Ena Satnas a worthybis dhe'n Arloedh, ‘Eus dhe Job own a Dhuw rag travyth?

¹⁰ A ny worrsys ke a-dro dhodho ha dh'y ji ha dhe bup-tra a'n jeves, orth pub tu? Ty re vennigas ober y dhiwleuv, ha'y jatel re gressyas y'n pow.

¹¹ Mes ystynn dha leuv lemmyn, ha tochya pup-tra oll a'n jeves, hag ev a wra dha villiga y'th fas.’

¹² Yn-medh an Arloedh dhe Satnas, ‘Otta, yma pup-tra oll a'n jeves y'th halloes, saw warnodho y honan na ystynn dha leuv.’ Ytho Satnas eth yn-rag mes a wel a'n Arloedh.

¹³ Yth esa dydh pan esa y vebyon ha'y vyrghes ow tybri hag eva gwin yn chi aga broder kottha,

¹⁴ hag y teuth kannas dhe Job, ha leverel, ‘Yth esa an oghen owth aras ha'n asenes ow peuri rybdha,

¹⁵ ha'n Sabeanys a settyas orta ha'ga hemmeres, ha ladha an servysi gans min an kledha, ha my ow honan re dhienkas rag leverel dhis.’

¹⁶ Pan esa ev hwath ow kewsel, y teuth onan moy ha leverel, ‘Tan Duw a goedhas dhiworth an nev hag a loskas an deves ha'n servysi, ha'ga howlleski, ha my ow honan re dhienkas rag leverel dhis.’

¹⁷ Hag ev hwath ow kewsel, y teuth onan moy ha leverel, ‘An Kaldeanys a formyas tri bagas a ladron, hag a wrug omsettyans orth an kowrvergh ha'ga hemmeres, ha ladha an servysi gans min an kledha, ha my ow honan re dhienkas rag leverel dhis.’

¹⁸ Hag ev hwath ow kewsel y teuth onan moy ha leverel, ‘Yth esa dha vebyon ha'th vyrghes ow tybri hag eva gwin yn chi aga broder kottha,

¹⁹ hag otta, gwyns meur a dheuth dhiworth an difeythtir, ha gweskel peswar korn an chi, hag ev a goedhas war an dus yowynk, ha marow yns, ha my ow honan re dhienkas rag leverel dhis.’

²⁰ Ena Job a sevis ha skwardya y bows, ha treghi gols y benn ha koedha war an dor ha gordhya.

²¹ Hag ev a leveris, ‘Noeth y teuth vy dhiworth torr ow mamm, ha noeth y tehwelav ena; an Arloedh a ros, ha'n Arloedh re gemmeras dhe-ves; benniges re bo hanow an Arloedh.’

²² Der oll hemma ny beghas Job na kuhudha Duw a gammweythres.