Jenesis 9 - An Bibel Kernewek 20234 (Kernewek Kemmyn)

An Kevambos gans Noy

¹ Ha Duw a vennigas Noy ha'y vebyon ha leverel dhedha, ‘Degewgh frut ha kressyewgh ha lenwel an nor.

² Hag own ahanowgh hag euth ahanowgh a vydh war bub best a'n nor ha war bub edhen a'n ayr, war beub ow kwaya war an tir, war oll puskes an mor. I a vydh res yn agas dorn.

³ Pup-tra ow kwaya hag a vew a vydh boes ragowgh. Kepar ha'n losow glas, my re ros dhywgh pup-tra.

⁴ Mes kig hag ynno y vewnans, henn yw y woes, ny wrewgh y dhybri.

⁵ Hag yn sur, rag goes agas bewnans hwi my a vynn kavoes reknans; my a vynn y gavoes orth pub best; hag orth mab-den, orth den ha'y broder, my a vynn kavoes reknans a vewnans den.

⁶ Piwpynag a skoellyo goes den, gans den y fydh y woes ev skoellyes. Rag yn imaj Duw ev a wrug mab-den.

⁷ Ha hwi, degewgh frut ha kressyewgh. Omlesewgh war an nor ha kressyewgh warnodho.’

⁸ Ena Duw a gewsis orth Noy hag orth y vebyon ganso, ow leverel,

⁹ ‘Awotta, yth esov ow fastya ow hevambos genowgh ha gans agas has war agas lergh,

¹⁰ ha gans pub tra vew usi genowgh hwi, ydhyn, chatel, ha pub best a'n nor genowgh hwi, a beub usi ow mos yn-mes a'n gorhel – pup-tra vew a'n nor.

¹¹ Ha my a wra fastya ow hevambos genowgh. Ny vydh kig oll diswrys arta gans dowrow liv, na ny vydh arta liv dhe dhiswul an nor.’

¹² Hag yn-medh Duw, ‘Hemm yw tokyn a'n kevambos esov ow kul yntra my ha hwi ha pub kreatur bew usi genowgh, bys vykken ha bynnari.

¹³ My a worr ow gwarak y'n kommol, ha hi a vydh tokyn a gevambos yntra my ha'n norvys.

¹⁴ Hag y hwer, pan dhrov kommol war an nor, y fydh an warak gwelys y'n kommol,

¹⁵ ha my a berth kov a'm kevambos usi yntra my ha hwi ha pub kreatur bew a gig oll, ha nevra namoy ny wra an dowrow dos ha bos liv dhe dhiswul pub kig oll.

¹⁶ Ha'n warak a vydh y'n kommol ha my a vir orti may perthiv kov a'n kevambos bys vykken yntra Duw ha pub kreatur bew a bub kig usi war an nor.’

¹⁷ Hag yn-medh Duw dhe Noy, ‘Hemm yw tokyn a'n kevambos re wrugavy y fastya yntra my ha pub kig usi war an nor.’

Noy ha'y Vebyon

¹⁸ Ha mebyon Noy neb eth yn-mes a'n gorhel o Shem ha Ham ha Yafeth; ha Ham o tas Kanan.

¹⁹ An re ma aga thri o mebyon Noy; ha dhiworth an re ma tus a veu lesys war oll an bys.

²⁰ Ha Noy a dhallathas bos tiek, hag ev a blansas gwinlann.

²¹ Pan evas rann a'n gwin, ev a veu medhow ha heb kudhlenn a-ji dh'y dylda.

²² Ha Ham, tas Kanan, a welas noethedh y das ha'y dherivas dh'y dhew vroder esa yn-mes.

²³ Ha Shem ha Yafeth a gemmeras mantell ha'y gorra war aga diwskoedh ha mos war-dhelergh ha kudha noethedh aga thas. Aga fasow o treylys war-dhelergh ha ny welsons noethedh aga thas.

²⁴ Ena Noy a dhifunas a'y win, hag ev a wodhva pandr'a wrussa y vab yowynka gul dhodho.

²⁵ Hag ev a leveris, ‘Milliges re bo Kanan. Kethwas kethwesyon a vydh ev dh'y vreder.’

²⁶ Hag ev a leveris, ‘Benniges re bo an Arloedh, Duw Shem, ha re bo Kanan kethwas dhodho.

²⁷ Re ynkressyo Duw Yafeth, ha re bo trigys a-berth yn tyldow Shem; re bo Kanan kethwas dhodho.’

²⁸ Ha wosa an liv, Noy a vewas trihans blydhen ha hanter-kans.

²⁹ Ha dydhyow oll Noy a veu naw kans bloedh ha hanter-kans; hag ev a verwis.