Jenesis 7 - An Bibel Kernewek 20234 (Kernewek Kemmyn)

¹ Ena yn-medh an Arloedh dhe Noy, ‘Ty hag oll mayni dha ji, dewgh a-bervedh y'n gorhel, rag my re welas dha vos gwiryon dheragov y'n henedh ma.

² A bub best glan, kemmer genes kopel anedha, yn bagasow a seyth, gorow ha benow, hag a'n bestes nag yw glan, unn kopel anedha, gorow ha benow,

³ hag a ydhyn an ayr, yn bagasow a seyth, gorow ha benow dhe witha has yn few war enep oll an nor.

⁴ Rag wosa seyth dydh my a wra glaw dhe goedha war an nor dew-ugens dydh ha dew-ugens nos ha pup-tra yn few re wrug vy gwruthyl, y fynnav y dhefendya dhe-ves dhiworth enep an nor.’

⁵ Ha Noy a wrug war-lergh pup-tra a wrug an Arloedh erghi dhodho.

An Liv Bras

⁶ Noy o hwegh kans bloedh pan dheuth an liv a dhowr war an nor.

⁷ Ha Noy eth a-bervedh, y vebyon, ha'y wreg, ha gwragedh y vebyon ganso a-bervedh y'n gorhel, drefenn dowr an liv.

⁸ Bestes glan, ha bestes nag yw glan, hag ydhyn ha pup-tra a gram war an dor,

⁹ dew ha dew anedha, gorow ha benow, eth dhe Noy a-ji dhe'n gorhel dell wrussa Duw erghi dhe Noy.

¹⁰ Ha wosa seyth dydh yth esa dowr an liv war an nor.

¹¹ Yn hwegh kansves blydhen bewnans Noy, y'n nessa mis, yn seytegves dydh an mis, an keth jydh na y feu oll fentynyow an downder meur terrys igor, ha fenestri nev a veu igerys.

¹² Hag yth esa an glaw war an nor dew-ugens dydh ha dew-ugens nos.

¹³ Y'n keth jydh na y teuth Noy ha Shem ha Ham ha Yafeth, mebyon Noy, ha gwreg Noy ha gansa teyr gwreg y vebyon a-ji dhe'n gorhel.

¹⁴ An re ma ha pub tra vew war-lergh y ginda ha pub best war-lergh aga hinda ha pub pryv a gram war an dor war-lergh y ginda ha pub edhen war-lergh y ginda: pub edhen, ha pup-tra askellek.

¹⁵ I eth dhe Noy a-bervedh y'n gorhel, dew ha dew a bub kig hag ynno anall bewnans.

¹⁶ An re ow mos a-ji, gorow ha benow a bub kig, a dheuth kepar dell wrussa Duw y erghi; ha'n Arloedh a'n degeas a-ji.

¹⁷ Yth esa an liv dew-ugens dydh war an nor, ha'n dowrow a veu moghhes, hag i a dhrehevis an gorhel, hag y sevis a-dhiwar an tir.

¹⁸ Ha'n dowrow a gressyas hag a veu moghhes yn fras war an nor ha'n gorhel esa ow mos war enep an dowrow

¹⁹ Ha'n dowrow a gressyas yn feur war an nor hag oll an menydhyow ughel yn-dann oll an nev a veu kudhys.

²⁰ An dowrow a gressyas pymthek kevelin war-vann, ha'n menydhyow a veu kudhys.

²¹ Hag y ferwis pub kig ow kwaya war an nor, ydhyn, chatel, best, pub kreatur owth hesya war an dor, ha pub den;

²² oll an re esa war dir sygh hag anall bewnans yn aga dewfrik a verwis.

²³ Ha pub tra vew war enep an dor a veu defendys dhe-ves, mab-den, bestes, pryves hag ydhyn nev, ha defendys vons dhe-ves dhiworth an nor, ha ny veu gesys yn few marnas Noy ha'n re esa ganso y'n gorhel.

²⁴ Ha'n dowrow a gressyas war an nor kans dydh ha hanter-kans.