Jenesis 6 - An Bibel Kernewek 20234 (Kernewek Kemmyn)

Dalleth an Nefilim

¹ Pan dhallathas mab-den kressya war enep an dor, hag y feu myrghes dineythys dhedha,

² mebyon Duw a welas myrghes mab-den ha'ga bos teg, hag i a gemmeras dhedha aga honan gwragedh a vyns anedha a dhewissons.

³ Hag yn-medh an Arloedh, ‘Ny drig ow spyrys vy pup-prys gans mab-den, rag kig yw ev, ha'y dhydhyow a vydh hwegh-ugens blydhen.’

⁴ Yth esa an Nefilim y'n nor y'n dydhyow na, hag a'y wosa keffrys, pan dheuth mebyon Duw dhe vyrghes mab-den; hag i a dhineythis fleghes dhedha. Tus alloesek ens i a dermyn koth, tus a vri.

Gwarnyans a'n Liv

⁵ Ha'n Arloedh a welas bos droktra mab-den bras war an nor ha nag o pub mynnas a dybyansow y golonn marnas drog pub dydh oll.

⁶ Ha'n Arloedh a repentyas ev dhe wul mab-den war an nor, ha grevys veu yn y golonn.

⁷ Hag yn-medh an Arloedh, ‘My a vynn diswul dhiworth enep an dor an den a wrug vy y formya: den ha best ha pryv hag ydhyn an ayr, rag edrek a'm beus y hwrug vy aga gul.’

⁸ Mes Noy a gavas gras yn golok an Arloedh.

⁹ An re ma yw henedhow Noy. Noy o gour gwiryon ha perfydh yn y dermyn hag yth esa Noy ow kerdhes gans Duw.

¹⁰ Ha Noy a dhineythis tri mab, Shem, Ham ha Yafeth.

¹¹ An nor ynwedh o legrys a-rag Duw, ha lenwys o an nor a arowder.

¹² Ha Duw a welas an nor hag awotta, legrys ova, rag pub kig re wrussa legri y fordh war an nor.

¹³ Hag yn-medh Duw dhe Noy, ‘Yma diwedh dhe bub kig devedhys a-ragov, rag lenwys dredha gans garowder yw an nor, hag awotta, my a vynn aga distrui gans an nor.

Gorhel Noy

¹⁴ ‘Gwra dhis gorhel a brenn gofer. Ty a wra roumys y'n gorhel ha'y ura stanch a-ves hag a-ji gans pyg.

¹⁵ Yndella ty a'n gwra. Hys an gorhel a vydh trihans kevelin, ha'y les hanter-kans kevelin, ha'y ughelder deg kevelin warn ugens.

¹⁶ Ty a wra fenester dhe'n gorhel, ha bys yn unn kevelin ty a'n kowlwra a-wartha, ha gorra daras an gorhel y'n tenewen anodho; gans flouryow isella, nessa ha tressa ty a'n gwra.

¹⁷ Hag awotta, yth esov vy ow honan ow tri liv dowrow war an nor dhe dhistrui pub kig hag ynno anall bewnans yn-dann nev. Pup-tra eus war an nor a wra merwel.

¹⁸ Mes genes jy my a wra fastya ow hevambos; ha ty a wra dos a-bervedh y'n gorhel, ty ha'th vebyon ha'th wreg ha gwragedh dha vebyon genes jy.

¹⁹ Hag a bub kreatur bew, a bub kig oll, ty a wra dri dew a bub sort anedha a-bervedh y'n gorhel dh'aga gwitha yn few genes jy. I a vydh gorow ha benow.

²⁰ A'n ydhyn war-lergh aga hinda, hag a'n chatel war-lergh aga hinda, pub pryv a'n dor war-lergh y ginda, dew a bub sort anedha a wra dos dhis dh'aga gwitha yn few.

²¹ Ha kemmer dhis neppyth a bub eghenn a voes a vo dybrys, ha ty a wra y guntell dhis; hag y fydh boes ragos jy ha ragdha i.’

²² Ytho Noy a wrug war-lergh pup-tra a erghis Duw dhodho; yndella y hwrug ev.