Jenesis 45 - An Bibel Kernewek 20234 (Kernewek Kemmyn)

An Gwir yw Diskudhys

¹ Ny ylli Yosep omgontrolya dherag oll an re ow sevel rybdho, hag ev a armas. ‘Bedhes pub den oll gorrys yn-mes dhiworthiv vy.’ Ha nyns esa denvyth ow sevel ganso pan omdhiskudhas Yosep dh'y vreder.

² Hag ev a oelas, ughel y lev, ha'n Ejyptianys a glewas, ha chi Faro a glewas ynwedh.

³ Hag yn-medh Yosep dh'y vreder, ‘My yw Yosep. Yw ow thas hwath yn few?’ Ha ny ylli y vreder gorthybi rag dyegrys ens a-dheragdho.

⁴ Ytho yn-medh Yosep dh'y vreder, ‘Dewgh nes dhymm, my a'gas pys.’ Hag i a dheuth nes. Hag yn-medh ev, ‘My yw Yosep agas broder a werthsowgh bys yn Ejyp,

⁵ Ha lemmyn, na vedhewgh yn ahwer, na vedhes sorr yn agas lagasow hwi dhe'm gwertha omma; rag Duw re'm dannvonas dheragowgh dhe witha bewnans.

⁶ Rag nans yw diw vlydhen divoetter re beu y'n pow; hag y fydh hwath pymp blydhen ma na vydh nag aras na trevas.

⁷ Ha Duw a'm dannvonas a-dheragowgh dhe fastya ragowgh remenant y'n pow ha dhe witha bewnans ragowgh dre dhelivrans bras.

⁸ Ha lemmyn nyns yw hwi a'm dannvonas omma mes Duw, hag ev re'm settyas kepar ha tas dhe Faro, hag arloedh war oll y ji, ha rewler war oll pow Ejyp.

⁹ Fistenewgh ha mos yn-bann dhe'm tas ha leverel dhodho, “Yndellma y lever Yosep, dha vab. Duw re'm settyas dhe vos arloedh war oll Ejyp. Deus yn-nans dhymmo, na wra gortos.

¹⁰ Ha ty a drig yn pow Goshen, ha ty a vydh ogas dhymmo, ty ha'th vebyon, ha mebyon dha vebyon, ha'th flokkys ha'th chatel, ha pup-tra eus dhis.

¹¹ Ha my a wra dha sostena ena, rag y fydh pymp blydhen moy a dhivoetter, na dhyffi ha bos boghosek, ty ha'th vayni ha myns eus dhis.”

¹² Hag otta, yma agas dewlagas hwi ow kweles, ha dewlagas ow broder Benyamin ynwedh, y vos ow ganow vy usi ow kewsel orthowgh.

¹³ Ha derivewgh dhe'm tas oll an enor usi dhymm yn Ejyp ha pup-tra re wrussowgh hwi gweles. Fistenewgh ha dri ow thas yn-nans omma.’

¹⁴ Ena ev a goedhas war gonna Benyamin y vroder hag oela ha Benyamin a oelas war y gonna ev.

¹⁵ Hag ev a ammas dhe oll y vreder hag oela warnedha, ha wosa henna yth esa y vreder ow kewsel ganso.

¹⁶ Ha'n nowodhow a veu klewys yn chi Faro, ow leverel, ‘Breder Yosep re dheuth.’ Ha da o hemma yn dewlagas Faro hag yn dewlagas oll y wesyon.

¹⁷ Hag yn-medh Faro dhe Yosep, ‘Lavar dhe'th vreder, “Gwrewgh hwi hemma. Gorrewgh agas seghyer war agas bestes ha kewgh, dewgh dhe bow Kanan;

¹⁸ ha kemmerewgh agas tas ha'gas teyluyow ha dewgh dhymmo vy; ha my a re dhywgh an dader a bow Ejyp, ha hwi a wra dybri blonek an tir.”

¹⁹ Ha ty, gwra erghi, “Gwrewgh yndella: kemmerewgh kertys mes a bow Ejyp rag agas fleghes ha'gas gwragedh, ha drewgh agas tas; ha dewgh.

²⁰ Na brederewgh a'gas daffar, rag pup-tra 'vas yn oll pow Ejyp a vydh ragowgh hwi.” ’

²¹ Ytho mebyon Ysrael a wrug yndella ha Yosep a ros dhedha kertys war-lergh gorhemmynna Faro, hag ev a ros dhedha boes rag an vyaj.

²² Ev a ros chanjyow a dhillas dhe bub huni; mes dhe Benyamin ev a ros trihans bath arghans ha pymp chanj a dhillas.

²³ Dh'y das ev a dhannvonas yndellma: deg asen ow toen re a'n taklow da a Ejyp ha deg kasek-asen ow toen ys ha bara, ha sosten rag y das war an fordh.

²⁴ Hag ev a dhannvonas y vreder, hag yth ethons yn-kerdh. Yn-medh ev dhedha, ‘Na vedhewgh ownek war an fordh.’

²⁵ Ytho i eth yn-bann mes a Ejyp ha dos dhe bow Kanan, dhe Yakob aga thas.

²⁶ I a dherivas dhodho ow leverel, ‘Yn few hwath yw Yosep, hag ev yw rewler war oll pow Ejyp.’ Ha kolonn Yakob a dheuth ha bos yeyn, rag ny wrug krysi dhedha.

²⁷ Hag i a leveris dhodho oll an geryow a wrug Yosep leverel dhedha; mes pan welas an kertys a wrug Yosep aga dannvon rag y dhoen, spyrys Yakob aga thas a vewas arta.

²⁸ Hag yn-medh Ysrael, ‘Lowr yw! Ow mab Yosep yw hwath yn few. My a vynn mos dh'y weles kyns merwel.’