Jenesis 4 - An Bibel Kernewek 20234 (Kernewek Kemmyn)

Kayn hag Abel

¹ Hag Adam a aswonnis Eva y wreg ha hi a gonsevyas ha dineythi Kayn ha leverel ‘My re gavas gour gans gweres an Arloedh.’

² Hag arta, hi a dhineythis y vroder, Abel, hag Abel o bugel deves mes Kayn o gonisyas dor.

³ Ha wosa dydhyow pals y hwarva Kayn dhe dhri offrynn dhe'n Arloedh a frut an dor.

⁴ Hag Abel ynwedh a dros rann a'n re gynsa-genys a'y flokk, hag a'ga blonek. Ha'n Arloedh a viras orth Abel ha'y offrynn.

⁵ Mes orth Kayn ha'y offrynn ny viras, ha Kayn a veu pur serrys, ha'y fas a goedhas.

⁶ Ha'n Arloedh a leveris dhe Kayn, ‘Prag yth osta serrys, ha prag yth yw koedhys dha fas?

⁷ Mar kwre'ta yn ta, a ny vydh drehevys? Ha mar ny wredh yn ta, yma pegh ow skolkya orth an daras; ev yw hwansek dhe'th kavoes, mes ty – ty a wra y fetha.’

⁸ Yn-medh Kayn dhe Abel y vroder, ‘Deun ni yn-mes dhe'n gwel.’ Ha pan esens y'n gwel, Kayn a sevis erbynn Abel y vroder ha'y ladha.

⁹ Hag yn-medh an Arloedh dhe Kayn, ‘Ple'ma Abel dha vroder?’ Hag yn-medh ev, ‘Ny wonn. Ov vy gwithyas ow broder?’

¹⁰ Hag ev a leveris, ‘Pandr'a wruss'ta? Yma lev goes dha vroder ow karma warnav dhiworth an dor.

¹¹ Ha lemmyn milliges osta dhiworth an dor re igoras y anow dhe dhegemmeres goes dha vroder dhiworth dha dhorn.

¹² Pan wonedhydh an dor, alemma rag ny vynn ev ri dhis y nerth. Ty a vydh gwandryas diannedh war an nor.’

¹³ Hag yn-medh Kayn dhe'n Arloedh, ‘Brassa yw ow hessydhyans es dell allav y berthi.

¹⁴ Awotta, ty re'm chasyas hedhyw dhiworth enep an nor, ha my a vydh kudhys dhiworth dha fas, ha my a vydh gwandryas diannedh war an nor, ha seul a'm kaffo a wra ow ladha.’

¹⁵ Hag yn-medh an Arloedh dhodho, ‘Ytho piwpynag a lattho Kayn, y fydh dial tylys warnodho seythgweyth.’ Ha'n Arloedh a worras tokyn war Kayn, na wrella denvyth a'n kaffa y weskel.

¹⁶ Ha Kayn eth yn-mes dhiworth golok an Arloedh ha triga yn pow Nod, est dhe Eden.

Henedh Kayn ha Seth

¹⁷ Ha Kayn a aswonnis y wreg ha hi a gonsevyas ha dineythi Enok, hag ev a dhrehevis sita ha henwel an sita war-lergh hanow y vab Enok.

¹⁸ Dhe Enok y feu genys Irad hag Irad a dhineythis Mehuyael ha Mehuyael a dhineythis Methusael ha Methusael a dhineythis Lamek.

¹⁹ Lamek a gemmeras diw wreg, hanow an eyl o Ada ha hanow hy ben, Silla.

²⁰ Ada a dhineythis Yabal; ev o tas an re trigys yn tyldow ha dhedha chatel.

²¹ Hanow y vroder o Yubal. Ev o tas an re a wra devnydh a'n sowtri ha'n salmus.

²² Silla ynwedh a dhineythis Tubal Kayn, govelyer pub sort a doulys a vrons hag a horn; ha hwoer Tubal Kayn o Naama.

²³ Hag yn-medh Lamek dh'y wragedh, ‘Ada ha Silla, klewewgh ow lev, hwi wragedh Lamek, goslowewgh orth ow lavar, rag my re ladhas gour neb a'm brewis ha den yowynk neb a'm golias.

²⁴ Mar pydh Kayn diellys seythgweyth, ena Lamek seytek gweyth ha tri-ugens.’

²⁵ Hag Adam a aswonnis y wreg arta ha hi a dhineythis mab, hag hi a elwis y hanow Seth, rag yn-medh hi, ‘Duw re wrontyas dhymm has arall yn le Abel, rag Kayn a'n ladhas.’

²⁶ Ha dhe Seth, dhodho ev ynwedh y feu dineythys mab hag ev a elwis y hanow Enosh. Y'n termyn na y tallathas tus gelwel war hanow an Arloedh.