Jenesis 35 - An Bibel Kernewek 20234 (Kernewek Kemmyn)

Yakob a Dhehwel dhe Bethel

¹ Duw a leveris dhe Yakob, ‘Sav, ke yn-bann dhe Bethel ha trig ena; ha gwra alter ena dhe'n Duw a omdhiskwedhas dhis pan eses ow fia dhiworth fas dha vroder Esaw.’

² Ena Yakob a leveris dh'y vayni ha dhe oll an re esa ganso. ‘Kemmerewgh dhe-ves an duwow estren usi yn agas mysk; omlanhewgh, ha chanjyewgh agas dillas;

³ ha gesewgh ni dhe sevel ha mos yn-bann dhe Bethel, ha gul alter ena dhe'n Duw a'm gorthybis yn dydh ow foenvotter, hag esa genev y'n fordh may kerdhis.’

⁴ Hag i a ros dhe Yakob oll an duwow estren esa dhedha, ha'n bysowyer yn aga skovornow, ha Yakob a's kelas yn-dann an derebinthenn ogas dhe Shekem.

⁵ Ena i eth yn-kerdh. Yth esa own Duw war an sitys a-dro dhedha, ha ny wrussons siwya mebyon Yakob.

⁶ Ytho Yakob a dheuth a-ji dhe Luz, usi yn pow Kanan, henn yw Bethel, ev hag oll an bobel esa ganso.

⁷ Hag ev a dhrehevis alter ena ha gelwel an tyller El-bethel, rag Duw a omdhiskwedhas dhodho ena pan esa ow fia dhiworth fas y vroder.

⁸ Ha Debora, mammeth Rebeka, a verwis hag a veu ynkleudhys a'n barth a-woeles dhe Bethel yn-dann an dherwenn; ytho y hanow a veu gelwys Allon-bakuth.

⁹ Duw a omdhiskwedhas arta dhe Yakob hag ev ow tos dhiworth Padan-aram, ha'y venniga.

¹⁰ Hag yn-medh Duw dhodho, ‘Yakob yw dha hanow, mes ny vydh dha hanow gelwys Yakob na fella, mes Ysrael a vydh dha hanow’; ytho ev a elwis y hanow Ysrael.

¹¹ Hag yn-medh Duw dhodho, ‘My yw Duw Ollgalloesek; degewgh frut ha kressewgh; kenedhel ha kemmynieth a genedhlow a dheu dhiworthis, ha myghternedh a dheu yn-mes a'th tiwglun.

¹² An pow a res vy dhe Abraham ha dhe Ysak, my a'n re dhiso jy; ha dhe'th has jy war dha lergh y rov an pow.’

¹³ Ha Duw eth yn-bann dhiworto y'n tyller may hwrussa kewsel ganso.

¹⁴ Ha Yakob a dhrehevis peulven y'n tyller may hwrussa kewsel ganso, peulven a ven; hag ev a dhinewis offrynn diwes warnodho, ha dinewi oyl warnodho.

¹⁵ Ha Yakob a elwis hanow an tyller may kewsis Duw ganso, Bethel.

Fleghes Yakob

¹⁶ Hag i a vyajyas dhiworth Bethel; yth esa hwath unn pols byghan kyns dos dhe Efrath, ha Raghel a dhallathas dineythi, ha kales veu rygdhi yn hy lavur.

¹⁷ Pan esa hi ow perthi an dineythyans kales, yn-medh an welivedhes dhedhi, ‘Na borth own; hemma a vydh mab ragos ynwedh.’

¹⁸ Ha pan esa hy enev ow mos yn-mes anedhi, hi a'n henwis Benoni; mes y das a'n henwis Benyamin.

¹⁹ Ha Raghel a verwis hag a veu ynkleudhys y'n fordh dhe Efrath, henn yw Bethlehem.

²⁰ Ha Yakob a worras peulven war hy bedh. Henn yw peulven bedh Raghel bys y'n jydh hedhyw.

²¹ Hag Ysrael a dravalyas ha drehevel y dylda war an tu arall dhe Migdal-eder.

²² Pan esa Yakob trigys y'n pow na, Rewben eth ha growedha gans Bilha, iswreg y das, hag Ysrael a glewas anodho. Lemmyn yth esa dewdhek mab dhe Yakob.

²³ Mebyon Lea: Rewben kynsa-genys Yakob, ha Simeon, ha Levi, ha Yuda hag Yssakar ha Zebulun.

²⁴ Mebyon Raghel: Yosep ha Benyamin.

²⁵ Ha mebyon Bilha, maghteth Raghel: Dan ha Naftali.

²⁶ Ha mebyon Zilpa, maghteth Lea: Gad hag Asher. An re ma yw mebyon Yakob a veu genys dhodho yn Padan-aram.

²⁷ Ha Yakob a dheuth dhe Ysak y das, dhe Mamre, Kiryath-arba, henn yw Hebron, le may feu Abraham hag Ysak trigys avel alyons.

²⁸ Ha dydhyow Ysak o naw-ugens bloedh,

²⁹ Hag Ysak a dremenas hag a verwis, hag a veu kuntellys dh'y bobel, leun a dhydhyow; ha'y vebyon Esaw ha Yakob a'n ynkleudhyas.