Jenesis 33 - An Bibel Kernewek 20234 (Kernewek Kemmyn)

Yakob ow Metya gans Esaw

¹ Ha Yakob a dhrehevis y dhewlagas ha mires, hag awotta, yth esa Esaw ow tos ha ganso peswar kans gour. Ytho ev a rannas an fleghes yntra Lea ha Raghel ha'n dhiw vaghteth.

² Hag ev a worras an maghtethyon ha'ga fleghes kynsa, ha Lea ha'y fleghes war aga lergh ha Raghel ha Yosep yn tiwettha.

³ Ev y honan a dremenas a-dheragdha, hag omblegya dhe'n leur seythgweyth bys pan dheuth nes dh'y vroder.

⁴ Mes Esaw a boenyas er y bynn ha'y vyrla ha koedha war y gonna hag amma dhodho; hag i a oelas.

⁵ Hag ev a dhrehevis y dhewlagas ha gweles an benynes ha'n fleghes ha leverel, ‘Pyth yw an re ma dhiso jy?’ Hag yn-medh ev, ‘An fleghes a ros an Arloedh dhe'th was a'y ras.’

⁶ Ena an maghtethyon a dheuth nes, i ha'ga fleghes, hag omblegya.

⁷ Ha Lea ha'y fleghes ynwedh a dheuth nes hag omblegya, ha wosa henna, Yosep ha Raghel a dheuth nes hag omblegya.

⁸ Hag yn-medh ev, ‘Pyth yw dhiso jy oll an kamp ma re vetis?’ Hag yn-medh ev, ‘Rag kavoes gras yn golok ow arloedh.’

⁹ Mes yn-medh Esaw, ‘Genev vy yma pals, ow broder. Bedhes dhiso an pyth usi genes.’

¹⁰ Hag yn-medh Yakob, ‘Nansi, my a'th pys, mar kwrug vy kavoes gras y'th wolok, kemmer ow ro dhiworth ow leuv; rag my re welas dha fas, kepar ha pan ve gweles fas Duw, ha plesys osta genev vy.

¹¹ Kemmer, my a'th pys, ow bennath yw dres dhiso, rag Duw re beu grassyes dhymm, hag yma dhymm pup-tra.’ Ev a ynnias warnodho, hag ev a'n kemmeras.

¹² Ena ev a leveris, ‘Gwren mos yn-rag, ha my a vynn mos a-dheragos.’

¹³ Hag yn-medh ev dhodho, ‘Ow arloedh a woer bos an fleghes tender ha bos an flokk ha'n chatel ow tena genev. Mars yns drivys kales unn jydh, oll an flokk a vydh marow.

¹⁴ Re dremenno ow arloedh dherag y was, ha my a wra mos yn-rag yn lent orth kamm an bestes usi dheragov, hag orth kamm an fleghes, erna dhyffyn dhe'm arloedh dhe Seir.’

¹⁵ Ytho Esaw a leveris, ‘Gas vy dhe asa genes rann a'n bobel usi genev.’ Hag yn-medh ev, ‘Prag? Re gyffiv gras yn golok ow arloedh.’

¹⁶ Ytho Esaw a dhehwelis an jydh na war y fordh dhe Seir.

¹⁷ Mes Yakob a lavuryas dhe Sukkoth ha drehevel chi dhodho, ha rag y jatel ev a wrug skovvaow. Rag henna ev a elwis hanow an tyller Sukkoth.

¹⁸ Ha Yakob a dheuth yn sawder dhe sita Shekem, usi yn pow Kanan, hag ev ow tos dhiworth Padan-aram; hag ev a gampyas dherag an sita.

¹⁹ Hag ev a brenas rann a'n gwel may hwrussa drehevel y dylda dhiworth mebyon Hamor, tas Shekem, a gans bath a vona.

²⁰ Hag ev a dhrehevis ena alter, ha'y elwel El-elohe-ysrael.