Jenesis 32 - An Bibel Kernewek 20234 (Kernewek Kemmyn)

¹ Ha Yakob a besyas mos war y fordh hag eledh Duw a dheuth er y bynn.

² Hag yn-medh Yakob, pan y's gwelas, ‘Kamp Duw yw hemma’, hag ev a elwis hanow an tyller na, Mahanaym.

Yakob a Dhannvon Kannasow dhe Esaw

³ Ha Yakob a dhannvonas kannasow a-dheragdho dhe Esaw y vroder, dhe bow Seir, gwel Edom,

⁴ hag erghi dhedha, ow leverel, ‘Hwi a lever yndella dhe'm arloedh, dhe Esaw: Yndellma y lever dha was Yakob, “My re beu trigys gans Laban ha gwithys veuv ena bys lemmyn.

⁵ Yma dhymm oghen hag asenes, flokkys, kethyon ha maghtethyon; ha my re dhannvonas dhe dherivas hemma dhe'm arloedh, may kyffiv gras y'th wolok.” ’

⁶ Ha'n kannasow a dhehwelis dhe Yakob ow leverel, ‘Ni a dheuth dhe'th vroder, dhe Esaw; hag yma ev ow tos dhe'th vetya, ha ganso peswar kans gour.’

⁷ Ena Yakob a borthas own bras ha troblys veu; hag ev a rannas an dus esa ganso ha'n flokkys ha'n chatel ha'n kowrvergh yn dew vagas

⁸ ha leverel, ‘Mar teu Esaw dhe'n unn bagas ha'y weskel, ena an bagas yw gesys a yll fia.’

⁹ Hag yn-medh Yakob, ‘A Dhuw ow thas Abraham, ha Duw ow thas Ysak, an Arloedh, neb a leveris dhymm, “Dehwel dhe'th wlas ha dhe'th kerens ha my a vynn dha dhyghtya yn ta”:

¹⁰ nyns ov wordhi a'n tregeredhow oll ha'n lelder oll re wruss'ta gans dha was; rag gans ow lorgh my a dremenas dres an Yordan ma, ha lemmyn yth ov devedhys ha bos dew gamp.

¹¹ Delirv vy, my a'th pys, yn-mes a leuv ow broder, a leuv Esaw, rag my a berth own anodho, ev dhe dhos ha'm gweskel, an mammow gans an vebyon.

¹² Ha ty a leveris, “Yn sur my a wra da genes, ha my a worr dha has kepar ha tewes an mor na yll bos reknys drefenn an niver bras anodho.” ’

¹³ Hag ev a spenas an nos na ena, ha kemmeres dhiworth an pyth esa ganso ro rag y vroder Esaw,

¹⁴ dewkans gaver, ugens bogh, dew kans davas hag ugens hordh,

¹⁵ deg kowrgasek-wodra warn ugens gans aga mebyon, dew-ugens bugh ha deg lodhen, ugens kasek-asen ha deg asen gorow.

¹⁶ Hag ev a dhelivras yntra diwla y gethyon pub gre yn tiblans ha leverel dh'y gethyon, ‘Tremenewgh dheragov, ha gasa spas yntra pub gre.’

¹⁷ Hag ev a erghis dhe'n kynsa ow leverel, ‘Pan dheffo Esaw ow broder er dha bynn ha govynn orthis, “Piw osta dhodho?” ha “Py tyller yth es'ta ow mos dhodho?” ha “Piw dhodho yth yw an re ma a-dheragos?”

¹⁸ ena ty a lever, “Dhe'th was, dhe Yakob. Ro yw, dannvenys dhe'm arloedh, dhe Esaw. Hag awotta, yma ev y honan war agan lergh keffrys.” ’

¹⁹ Hag ev a erghis ynwedh dhe'n nessa ha'n tressa hag oll an re esa ow mos war-lergh an greow, ow leverel, ‘Hwi a gews orth Esaw yndella pan y'n kyffowgh,

²⁰ ha hwi a lever ynwedh, “Awotta, yma dha was Yakob war agan lergh.” ’ Rag yn-medh ev, ‘My a vynn y dhiserri gans ro ow mos a-dheragov, ha my a wel y fas wosa henna. Martesen ev a'm degemmer.’

²¹ Ha'n ro a dremenas dheragdho; hag ev y honan a spenas an nos y'n kamp.

Yakob a Striv gans Duw

²² Hag ev a sevis yn-bann an nos na ha kemmeres y dhiw wreg ha'y dhiw vaghteth ha'y unnek flogh ha tremena rys Yabbok.

²³ Hag ev a's kemmeras ha'ga dannvon dres an gover; hag ev a dhannvonas pup-tra esa ganso ynwedh.

²⁴ Yakob a veu gesys y honan, ha gour a omdewlis ganso bys dydh-tardh

²⁵ Pan welas na ylli y fetha, ev a weskis kraw y glun; ha kraw klun Yakob a veu digevelsys, hag ev owth omdewlel ganso.

²⁶ Hag yn-medh ev, ‘Dannvon vy yn-kerdh, rag an jydh re dardhas.’ Hag yn-medh ev, ‘Ny vynnav dha dhannvon yn-kerdh marnas ty a wra ow benniga.’

²⁷ Hag yn-medh ev, ‘Pyth yw dha hanow?’ hag yn-medh ev, ‘Yakob.’

²⁸ Hag yn-medh ev, ‘Ny vydh dha hanow gelwys Yakob namoy mes Ysrael, rag ty re strivyas gans Duw ha gans mab-den ha fetha.’

²⁹ Ha Yakob a wovynnas orto, ow leverel, ‘Lavar dhymm dha hanow, my a'th pys.’ Hag yn-medh ev, ‘Prag y fynnydh govynn ow hanow orthiv?’ hag ev a'n bennigas ena.

³⁰ Ha Yakob a elwis hanow an tyller Peniel, ‘Rag my re welas Duw fas orth fas, ha gwithys saw yw ow enev.’

³¹ Ha'n howl a dhrehevis warnodho hag ev ow tremena Penuel; hag yth esa ow kloppya drefenn y glun.

³² Rag henna ny vynn mebyon Ysrael dybri giowenn an nervenn yn kraw an glun bys y'n jydh hedhyw, rag ev a weskis kraw klun Yakob, yn giowenn an nervenn.